Read Sidama_Qullaawa _Maxaafa LAYINKI QORONTOOSI 13 Bible Online

LAYINKI QORONTOOSI 13 - Sidama_Qullaawa _Maxaafa bible

LAYINKI QORONTOOSI 13

¹Ki'newa daa'yara tini sayikkite. Baalanka coye haa'nannihu lamu woy sasu naqqasihu gedensaanniiti.

²Layinkimeeshsho ki'newa dayummo yannara, qorophisiise coyi'roommo. Xaano xeertote hee're kunni albaanni cubbo loossinorenna woloota qorophisiiseemmo. Xa ki'newa galagale dayemmo woyite ayeno dimarareemmo.

³Ki'ne ane giddo hee're coyi'rannohu Kiristoosa ikkinota huwattinara hasidhinanni. Ki'ne giddo leeltannoti wolqasiiti ikkinnina wolqiweellesi di"ikkitino.

⁴Isi masiqalu aana sutame wolqiweelu gede ikke reyinoha ikkirono, xa Maganu wolqanni lubbotenni no. Ninkeno isi ledo wolqiweeloota ikkinoommo. Ki'ne ledo noonke xaadooshshinni kayinni isi ledo Maganu wolqanni hee'neemmo.

⁵Amma'natenni kaajjitine hee'ra'ne buuxate ki'nenee qonqolchitine la'e; ki'nenee fonqoltine la'e. Yesuusi Kiristoosi giddo'ne noota dibuuxxinoonni? Hakkunni ka'a kayinni fonqolote ubbinoonni yaate.

⁶Ninke fonqolote umboommokkita affinanni yine hexxineemmo.

⁷Busha coye assitinannikki gede Magano huucci'neemmo. Huucci'neemmohu ninke aye geeshshano seera guuntoommore ikka hoongummorono, ki'ne wo'manka woyite dancha looso loossinanni gedeeti ikkinnina ninke guunte leellishate di"ikkino.

⁸Ninke halaaleho uurrineemmo ikkinnina halaalu gobbaanni mittoreno diassineemmo.

⁹Ninke wolqiweeloota ikkineenna ki'ne jawaatoota ikkitiniro tashshi yaannonke. Ninke huuccatto ki'ne guuta manna ikkitinanni gedeeti.

¹⁰Tenne sokka ki'newiinni fafe hee're borreessoommo'nehu kunniraati. Kunni garinni ki'newa dayemmo yannara, Mootichu uyinoe roorrenni diqarriseemmo'ne. Mootichu roorre uyinoehu ki'ne dhaawammoraati ikkinnina diigammo'nera di"ikkino.

¹¹Xaate roduuwa'ya keerunni heedhe! Heeshsho'ne biddi assidhe; seejjo'ya adhe. Mimmiti'ne ledo sumuu yiiyye. Keere heedhe; baxillunna keeru Magani ledo'ne hee'ranno.

¹²Qullaawa sunqamanni mimmito'ne keere haadhe.

¹³Ammanaano baala keere sokkino'ne.

¹⁴Mootichu Yesuusi Kiristoosi elto, Maganu baxilli, Qullaawu Ayyaani mittimma ki'ne baalunku ledo heedho.