Read Sidama_Qullaawa _Maxaafa LAYINKI QORONTOOSI 2 Bible Online

LAYINKI QORONTOOSI 2 - Sidama_Qullaawa _Maxaafa bible

LAYINKI QORONTOOSI 2

¹Kunnira, xaano ki'ne qarrisa giwe galagale dayemmokki gede murci'roommo.

²Ani dadilliseemmo'neha nafa ikkiro, dadillisummo'ne ki'ne agurranna ane hagiirsiisannoehu wolu nooni?

³Togo yee borreessoommo'nehu, ane hagiirri ki'ne wo'munku hagiirre ikkino daafira, ki'newa dayemmo woyite hagiirsiissannoe yoommori dadillissannoekki gede hedeeti.

⁴Lowo dadillinni, hinciiccamatenninna lowo hindiiddonni borreessoommo'nehu, lowo geeshsha baxeemmo'neta affinara yeeti ikkinnina dadillisammo'nera di"ikkino.

⁵Manna dadillisinohu hee'riro, ane dadillisinoha di"ikkino. Saosi batise kulate ikka hoogirono addi addi deerrinni ki'ne baala dadillisinoho yaate.

⁶Hakko manchira, ki'ne giddonni rooru manni yiino qorichi ikkannosi.

⁷Kuni manchi dadillunni kainohunni hexxo mudhannokki gede, saosi kiira agurtine jawaachishshinisiro woyyate.

⁸Baxxinannisita afanno gede assitinara huucci'reemmo'ne.

⁹Borreessoommo'nehu, baalunku coyira hajajantinannironna hoogginanniro afate hasi'reeti.

¹⁰Ki'ne saosi agurtinannihura anino agureemmosi. Agureemmosi sao heedhuro, saosi agureemmohu Kiristoosi albaanni ki'ne daafira yeeti.

¹¹Hatto asseemmohu, Sheexaanu xagarro egenninoommo daafira, dogammeemmokki gede hedeeti.

¹²Kiristoosiha Dancha Duduwo kulate Xiroaada ha'rummo yannara, Mootichu loosira doogo fa'nantinoe.

¹³Ikkollana, rodoo'ya Tiito afa hoogoommo daafira lubbo'ya difooliishshidhino. Kunnira, hakkiicho noore keerunni yee Meqedooniya ha'roommo.

¹⁴Ikkollana, wo'ma woyite Kiristoosinni qeellennire assanni, ninke widoonni qole darga baalaho egennosi su'niille iillishanno Maganira galatu galosi.

¹⁵Ninke ba'annoriranna gattannorira Maganoho Kiristoosi su'niilleeti.

¹⁶Ninke ba'annorira reyote fooleeti; gattannorira kayinni heeshshote su'niilleeti. Kunni coyira ikkannohu ayeti?

¹⁷Lowo manni Maganu qaalinni dadda'le qiniite afi'rara hasi'ranno. Ninke kayinni Maganu soyino manni gede taalotenni Kiristooosinni hee'ne Maganu albaanni coyi'neemmo.