Read Sidama_Qullaawa _Maxaafa LAYINKI QORONTOOSI 3 Bible Online

LAYINKI QORONTOOSI 3 - Sidama_Qullaawa _Maxaafa bible

LAYINKI QORONTOOSI 3

¹Galagalle ninkenee jacca hananfoni? Woy kayinni mitu mitu gede ki'newiinni woy ki'nera borreessinoonniti irkote borro hasiissanke ikka?

²Mannu baalu egenninorinna nabbawannori, wodaninkera borreessantine heedhinoonniri sokkanke ki'neeti.

³Ninke soqqanshonni dagginoonniri ki'ne, Kiristoosi sokka ikka'ne xawoho. Tenne sokka heeshshote Magani Ayyaaninni ikkinnina kuulunni diborreessinoonni. Mannu wodani giddo ikkinnina bocame kinchi aana diborreessinoonni.

⁴Togo yineemmohuno ninke Kiristoosi widoonni Magano addaxxineemmohuraati.

⁵Soqqamate wolqa aannonkehu Maganoho ikkinnina ninke uminkenni mittore nafa assate guunte dianfeemmo.

⁶Haaru Gondoori soqqamaano ikkineemmo gede wolqa uyinonkehu isooti. Kunino borreessinoonni seerinni ikkikkinni Qullaawu Ayyaani kaa'lonniiti. Borreessinoonni seeri reyo abbanno; Qullaawu Ayyaani kayinni heeshsho aanno.

⁷Seera bocame kinna aana borreessinoonni; Seera uyini yanna xawaabbi agure ho'liha nafa ikkiro, Israeelootu Muse alba qasse la"a didandiitino. Reyo abbanno Seeri togoo ayirrinyinni daannoha ikkiro,

⁸Qullaawu Ayyaaninni soqqama roore ayirrado di"ikkitino?

⁹Manna saote kiirranni soqqansho hakkeeshshi ayirrinye afidhannoha ikkiro, keeraa'mate soqqansho roore ayirrinye hiitto afi'ra hoogganno?

¹⁰Albi ayirrinye xaahu ledo taashshine la'nanni woyite, albi ayirrinyi mite nafa diyinanniho.

¹¹Hakku ba"anno coyi kageeshshi ayirrinye afi'rannoha ikkiro, hegere geeshsha hee'rannohu hiitto roore ayirrinye diafi'ranno!

¹²Togoo hexxo noonke daafira, ruxxi yinummokkinni coyi'neemmo.

¹³Ninke, xawanni noohu albisi galagale darga higanni hee'reenna Israeele la'annosikki gede alba diphi Muse gedeere di"ikkinoommo.

¹⁴Insa wodani addinta dillaawino. Techo geeshsha nafa Albi Gondooro nabbabbanno woyite, wodanansa hakku guggu'laasinchi diwe no. Hatto ikkannohu, hakku guggu'laasinchi Kiristoosi callu hoolannoha ikkinohuraati.

¹⁵Techo geeshsha Muse maxaaffa nabbabbanno yanna baalate wodaninsara hakku guggu'laasinchi no.

¹⁶Mannu Mootichu widira higanno woyite kayinni, hakku guggu'laasinchi ho'lanno.

¹⁷Mootichu Ayyaanaho. Mootichu Ayyaani noowa wolapho no.

¹⁸Ninke baalunku diphinoommokki albinni Mootichu ayirrinye xawinseemmo. Ayyaana ikkino Mooticha lawate ayirrinyunni ayirrinyu widira hinge soorrammeemmo.