Read Sidama_Qullaawa _Maxaafa LAYINKI QORONTOOSI 4 Bible Online

LAYINKI QORONTOOSI 4 - Sidama_Qullaawa _Maxaafa bible

LAYINKI QORONTOOSI 4

¹Tenne soqqansho Maganu maaronni afi'noommo daafira wolqa diba'neemmo.

²Saalfachishannoha go'le noo coye facci assine agurroommo; dixagarreemmo; Maganu qaale diqadaawulleemmo. Halaale xawinse kulankenni, mannu baalu tii"ira yine umonke Maganu albaanni reqecci assineemmo.

³Danchu Duduwinke go'linoha ikkiro nafa, go'lannohu ba'annoriraati.

⁴Ammantinokkiri Maganu lawishsha ikkinohunniha Kiristoosiha Danchu Duduwi xawaabba ayirrinyunniha affannokki gede, wodanansa tenne gobba magani beeshshino.

⁵Yesuusi Kiristoosi Mooticha ikkinota kulleemmo ikkinnina ninke umonke dikulleemmo. Yesuusira yine ninke ki'nera borojje ikkineemmo.

⁶«Tunsichoho caabbichu xawo» yiino Magani, Kiristoosi daninni xawannoha Maganu ayirrinye afate xawaabba aankera caabbichosi wodaninke giddo xawisino.

⁷Tini jawa wolqa Maganunnite ikkinnina ninketa ikkitinokkita leellishate, kuni miinji doru uduunnichi giddo no.

⁸Ninke wo'munku raginni miicammoommo; ikkeennano dishenteemmo. Garuno bainonke; hexxo kayinni dimudhineemmo.

⁹Xiiwammoommo; ikkirono dihawammeemmo. Ganne tunganninke; ikkeennano diba'neemmo.

¹⁰Yesuusi heeshsho ninke aana leeltanno gede, wo'manka woyite mannimmanke aana Yesuusi reyo duqqine ha'rammeemmo.

¹¹Yesuusi heeshsho reyanno manninatinke aana leeltanno gede, xa lubbotenni hee'noommori wo'manka woyite Yesuusi daafira yine reyote sa'ne aamammeemmo.

¹²Kunnira, reyosi ninke aana heeshshosi qolte ki'ne aana loossanno.

¹³Ikkollana, «Ammanoommo daafira coyi'roommo» yine borreessinoonninte gede, ninkerano mittu ammanate ayyaani noonke daafira ammanneemmo; kunnira coyi'neemmo.

¹⁴Mooticha Yesuusa reyotenni kayisino Magani ninkeno Yesuusi ledo kayise ki'ne ledo albisira shiqishannonketa egenninoommo.

¹⁵Tini ki'nera qiniite ikkitu elto lowo mannira baqaqqu bikkinni, Maganu ayirrinyira galatu lexxanno.

¹⁶Kunnira, wolqa diba'neemmo. Gobbayidi manninatinke ba"annoha ikkiro nafa, giddoyidi manninatinke barru barrunkunni haaroo'manno.

¹⁷Kuni shetisannonkehu shiimu sa"anno qarri, hakko qarrira aliidiha dhaggeeffantanniha hegere ayirrinye haa're daannonke.

¹⁸Ninke illetenni leellannoha ikkikkinni leellannokkiha illachinsheemmo. Illetenni leellannohu shiima yannalla keeshshanno; illete leellannokkihu kayinni hegereho.