Read Sidama_Qullaawa _Maxaafa LAYINKI QORONTOOSI 5 Bible Online

LAYINKI QORONTOOSI 5 - Sidama_Qullaawa _Maxaafa bible

LAYINKI QORONTOOSI 5

¹Hee'neemmohu baattote aani dukkani diigamiro, gordoho mannu mininoha ikkikkinni Maganu mininonkehu hegere mini noonketa egenninoommo.

²Gordu mine uddi'rate quqquxammanni kunni giddo hee'ne urranni hee'noommo.

³Uddi'ne hee'ne dikallineemmo.

⁴Reyannoha heeshsho egemmitanno gede, uddi'nammora ikkinnina mullootu hee'nammora halchineemmokki daafira, xa dukkanu giddo hee'neemmo ninke ayirreennanke urranni hee'noommo.

⁵Tennera qixxeessinonkehu Maganoho. Isi albillitte daara noorira Ayyaanasino taje asse uyinonke.

⁶Kunnira, baattote aani manninatinni hee'noommo yannara Mootichuwiinni xeerti'ne hee'noommota anfummorono, wo'manka woyite be'e yinummokkinni hee'neemmo.

⁷Ammanatenni ikkinnina la"atenni dihee'neemmo.

⁸Maalinkewiinni baxxine Mootichinke ledo hee'ra halchineemmo; kunnira hawaqi'ne hee'neemmo.

⁹Kunni maalinke ledo hee'nummoro woy baxxinummorono, halchonke iso hagiirsiisate.

¹⁰Mittu mittunku maalunni hee're loosinoha dancha woy busha loosisi guma adhate, baalunku Kiristoosi barcimi yoonnihu albira shinqeemmo.

¹¹Mooticha waajjate yaa mayaatero anfe manna ammanchiinsheemmo. Ninke ewelummano Maganu egennino. Ki'ne wodanino afino yee hedeemmo.

¹²Wodanu giddo noo coyinni ikkikkinni, la'nanni coyinni naaxxitannorira dawaro qoltine ninkenni naaxxitinanni gede ki'nera doogo fanneemmo'ne ikkinnina galagalle ninkenee dijanjeemmo.

¹³Macharaaraamma ikkinummoro Maganoho yineeti. Wodana fayyo ikkinummoro ki'neraati.

¹⁴Kiristoosi mitte hige baalunkura yee reyinota egenninoommo daafira, baxillisi fula ho'linonke. Kunnira baalunku isi reyo gutamino.

¹⁵Lubbotenni noori, insa daafira yee ree, reyotenni kainohu daafira ikkinnina insaneete heedhannokki gede isi baalunkura yee reyino.

¹⁶Kunni ka'a ayeno mannu hedanno garinni dihendeemmo. Kiristoosano hakko garinni hendoommoha ikkiro, kunni ka'a hakko garinni dihendeemmo.

¹⁷Kunnira ayino Kiristoosinni hee'riro haaro kalaqamaati. Akkalu sae ha'reenna kune haaru dayino.

¹⁸Kuni baalunku, ninke isinii ledo Kiristoosi widoonni qole araarsihunna araarsate soqqansho uyinonke Maganiwiinni dayino.

¹⁹Hatto yaa, Maganu Kiristoosi widoonni qole kalqe isinii ledo araarsino yaate. Saonsa dikiirino; ninkerano araarsate sokka uyinonke.

²⁰Kunnira, Maganu manna ninke widoonni qole woshshanno daafira, ninke Kiristoosi lekkaati. Kunni daafira, «Maganu ledo araaramme!» yine Kiristoosi su'minni huucci'neemmo'ne.

²¹Kiristoosinni Maganu keeraanchimma ikkineemmo gede, Maganu cubbo loose egenninokkiha Kiristoosa ninke daafira yee cubbaataamo asse kiirinosi.