Read Sidama_Qullaawa _Maxaafa LAYINKI QORONTOOSI 7 Bible Online

LAYINKI QORONTOOSI 7 - Sidama_Qullaawa _Maxaafa bible

LAYINKI QORONTOOSI 7

¹Kunnira baxillaasine'ya, tini hexxo heedhunke woyite, Magano waajjatenni co'onta qullaawoota ikkine manninatenna ayyaana batteessannori baaluwiinni umonke keereensi'no.

²Ninkera wodana hala'lenke. Ayerano sao diassinoommo; ayeno dimiincoommo; aye qiniiteno diadhinoommo.

³Togo yeemmohu bushiishammo'nera ikkikkinni, balaxe kulummo'nente gede mitteenni reyinammoranna mitteenni hee'nammora wodaninke giddo heedhinoonni yoommohuraati.

⁴Ki'ne lowo geeshsha addaxxeemmo'ne; ki'nenni lowo geeshsha naaxxeemmo; lowo geeshsha jawaatoommo. Qarrinke baalu giddo hagiirri'ya bati'raho.

⁵Meqedooniya iillinummo yannara nafa, ragu baalunni qarru bati'rinonketa ikkinnina manninatinke horonta fooliishsho diafi'rino. Gobbaanni koma, giddoonni qole waajjillu amadinonke.

⁶Dadillitinore jawaachishanno Magani kayinni, Tiito daa widoonni qole jawaachishinonke.

⁷Jawaantoommohu Tiito daa callatenni ikkikkinni, sinsinnaawa'nenna yaada'ne, qoleno anera noo'ne laala kuleennanke albinni roore hagiidhoommo.

⁸Borreesse soyummo'ne sokka dadillissino'neha nafa ikkiro, soya'yara digaabbeemmo. Gaabbeemmoha ikkoommerono, shiima yanna calla dadillissino'neta afoommo.

⁹Hagiidhoommohu ki'ne dadillitinoonnihura ikkikkinni, dadilla'nenni aagintaabbine higginoonni daafiraati. Dadilli'ne Maganu hedo garinni ikkinohura, ninke dimiincoommo'ne yaate.

¹⁰Maganu hedo garinni dadillinanni dadilli aagintaambanni gede asse gatote widira qole haa're ha'ranno. Tenne gobba dadilli kayinni reyo abbanno.

¹¹Maganu hedo garinni ikkino dadilli: hiittoo hixamanya, ki'nenee keereensi'rate hiittoo diinaggaawa, hiittoo hanqo, hiittoo waajja, hiittoo quqquxama, hiittoo laala, hiittoo qoricha mereero'ne wori! Kunni coyinni fayyaaleeyye ikkitinoonnita duuchunku garinni egensiissinoonni.

¹²Borrote sokka soyummo'nerono, ninke daafira jaatanaabbinoonni gara Maganu albaanni leellishate ikkinnina, sao assinohuranna sao assinoonnisi manchira yee di"ikkino.

¹³Jawaantoommohu kunninniiti. Ninke jawaante calla ikkitukkinni, Tiito wodani ki'ne baalunkunni fooliishshi'rinota anfe lowo geeshsha hagiidhinoommo.

¹⁴Ki'nenni naaxxoommota Tiitora kuloommo; ki'neno disaalfachishshinoonnie. Kulloommo'ne coyi baalu kayinni halaaleho. Ki'nenni naaxxanke Tiito albaannino adda ikkitino.

¹⁵Tiito hajajantinoonnisitanna haadhinisi yannara waajjitine huxidhinoonni gara qaaganno woyite, ki'nera noosi baxilli lowo geeshsha bati'rino.

¹⁶Ki'ne wo'mantenni addaxxoommo'ne daafira tashshi yiinoe.