Read Sidama_Qullaawa _Maxaafa LAYINKI QORONTOOSI 8 Bible Online

LAYINKI QORONTOOSI 8 - Sidama_Qullaawa _Maxaafa bible

LAYINKI QORONTOOSI 8

¹Roduuwa'ya, Maganu Meqedooniyaho heedhanno ammanaanora uyino elto egensiiseemmo'ne.

²Lowo gadadi amade hee'reennansanni, hagiirrinsa batinyinna buximansa takko shooshanqensa lowo geeshsha halashshitino.

³Wolqansa uyitu bikkinninna wolqansara aleenni hagiidhite uyitinota farci'reemmo.

⁴Yihudaho noo ammanaanora uyitanno kaa'lo hoollanninsakki gede kaajjishshe huuccidhinonke.

⁵Insa assitinohu, ninke hendoommohura aleenniiti. Balaxxe insanaa Mootichaho uyitino; hakkiinni aanchite Maganu hedo garinni insanaa ninkera uyitino.

⁶Konne looso balaxe hanafinohu Tiito ikkino daafira, xaano konne shooshanqete looso goofimarchu geeshsha iillishanno gede isonni huucci'noommo.

⁷Ki'ne baalunku coyinni: ammanatenni, coyi'rate qarummanni, egennotenni, hixamanyatenninna ninkera noo'ne baxillinni roortinanni. Shooshanqe'nennino roortinanni gede ikke.

⁸Togo yeemmo woyite hajajanni noommo'neha di"ikkino. Wolu manni diinaggaawa widoonni qole baxilli'ne halaalaancho ikkino gedeenni afammora yeeti.

⁹Ki'ne Mootichinke Yesuusi Kiristoosi elto egentinoonni; isi dureessa ikke hee'renni buxe, ki'ne duroo'mitinanni gede ki'ne daafira yee buxicho ikkino.

¹⁰Kunni coyira woyyanno mala eemmo'ne. Sai diro aa callate ikkikkinni, albanni balaxxine konne coye assate hedo noo'ne.

¹¹Diinaggaawa'ne umo fultanno gede, assate heddinoonnire xa wonshe.

¹²Aate halchiniro, nookkihu aaninni ikkikkinni afi'noonnihu bikkinni aa danchate.

¹³Togo yeemmo woyite, baalunku taaltinara yee ikkinnina ki'ne mitii'mitinanna wolootu sammi yite heedhara di"ikkino.

¹⁴Ki'ne mitii'mitinanni yannara, insa jiro ki'ne qarra tirtanno gede, xa ki'ne jiro insa qarra tirtona. Kunni garinni baalunku taaltinanni.

¹⁵Kuni ikkannohu, «Lowoha gamba assi'rinohura wo'me digatino; shiima gamba assi'rinohurano dixeino» yine borreessinoonni garinniiti.

¹⁶Ani ki'ne daafira diinaggaawummonte gede, Tiito wodanirano hatte hedo worino Maganira galatu iillosi.

¹⁷Tiito ki'newa daannohu, umisinni hagiidheeti ikkinnina ninke kulloommosi daafira calla di"ikkino.

¹⁸Dancha Duduwo kulasinni beetekiristaanna baala galattino rodoo ledosi sonkeemmo.

¹⁹Hakkuyi aanano, isi ninke Mootichu ayirrinyiranna dancha hedonke leellishate soqqammeemmo soqqanshora badhe ikkannonke gede beetekiristaanna doortinosiho.

²⁰Kuni elle uyinoonni woxi afimaleenna mishammeemmokki gede seekkine qorophineemmo.

²¹Hedonke Mootichu albaanni calla ikkikkinni, mannu albaannino dancha coye assateeti.

²²Lowo yanna batinyu garinni fonqolle hixamanya ikkinota buunxoommo rodoono ledonsa sonkanni hee'noommo. Isi ki'ne lowo geeshsha addaxxino daafira, tenne kaa'lora lowo geeshsha diinaggaawino.

²³Tiitore afa hasidhiniro, isi ki'ne kaa'late anera ledo miilaati. Ledosi dagganno roduuwi, beetekiristaannate lekkaatinna Kiristoosi ayirrinyira uurritinoreeti.

²⁴Kunni daafira, baxille'nenna ninke ki'nenni naaxxinoommo naaxxa beetekiristaanna baalate leellishshe!