Read Sidama_Qullaawa _Maxaafa LAYINKI QORONTOOSI 9 Bible Online

LAYINKI QORONTOOSI 9 - Sidama_Qullaawa _Maxaafa bible

LAYINKI QORONTOOSI 9

¹Yihudaho hee'rannoha qullaawa manna kaa'linanni kaa'lo daafira ani borrote sokka soyammo'nera dihasiisanno.

²Ki'ne kaa'late ka'ine heedhinoonnita afoommo daafira, sai dirinni kayissine Akayaho aate qixxaabbinoonnita hasaawanni, Meqedooniyu mannira ki'ne ku'leemmo. Ki'ne diinaggaawa lowo manna kakkayissino.

³Kunni garinni ki'ne ku'lanke mullawa gattannokki gede, konne roduuwa ki'newa soyemmo. Ki'neno alba kuloommo'ne garinni qixxaabbine agarre.

⁴Meqedooniyu manni ane ledo daye qixxaabbinoonnikkita afanno woyite, ki'ne calla ikkitinikkinni ninkeno ki'ne hexxankera hakko garinni saalleemmo.

⁵Kunnira uyitinara afoo fultinoonni afansha balaxxine qixxeessitinanni gede qaagiissita'nera kuni roduuwi ane balaxxe daa woyyitanno yee hedoommo. Kunni garinni uyitinanni afanshi balaxe qixxaawanno; ki'neno gadadinseenna ikkikkinni baxxine uyitinoonniti leeltanno.

⁶«Shiima wixi'rinohu, shiima mixxanno; lowoha wixi'rinohu lowoha mixxanno» yinanni maammaashsha qaagge!

⁷Maganu hagiidhe aannoha baxanno daafira, mittu mittunku wodanisinni baxe hagiidhanni oo ikkinnina, lamu wodaninni woy baxikkinni qarrame oonke.

⁸Duuchanka woyite baalanka coye ikkanno geeshshiha afidhine, danchu loosi baalunkura halashshitine uyitinanni gede Maganu baalankare batise aa'nera dandaanno.

⁹Kuni ikkannohu, «Fincino; buxanete beehino; keeraanchimmasi hegere geeshsha heedhanno» yine borreessinoonni garinniiti.

¹⁰Wixi'rannohura wixa, itannohura tima halashshe aanno Magani wixidhinanni wixano fakkanche aanno'ne. Keeraanchimma'ne gumano halashshanno'ne.

¹¹Uyitinanniri ninke widoonni iillannonsa manni baalu Magano galatanno gede, wo'manka woyite hagiidhitine uyitinara Maganu baalunku coyinni dureeyye assanno'ne.

¹²Tini kaa'litinanni kaa'lo ammanaanote qarra tiratenni sa'e, mannu Maganoho lowo galata aanno gede assitanno.

¹³Kiristoosiha Dancha Duduwo ammantine, insaranna wolootaho leellishshinoonni shooshanqenna fonqolante sa'ino soqqansho'nenni kainohunni baalunku Magano galatanno.

¹⁴Maganu batise uyino'ne elto qaagganni, ki'nera Magano huuccate lowo geeshsha quqquxantanno.

¹⁵Kulle gundannikki eltosi daafira Maganoho galatu galosi!