Read Sidama_Qullaawa _Maxaafa GALATIYU SOKKA 3 Bible Online

GALATIYU SOKKA 3 - Sidama_Qullaawa _Maxaafa bible

GALATIYU SOKKA 3

¹Ki'ne hawanya Galatiyu manna! Tenne so'ro giddora e'inanni gede wodana amadino'neri maati? Yesuusi Kiristoosi dawete aana sutama alba'neenni leeltanni noo'ne.

²Mitto coye calla kultinaera hasi'reemmo; Qullaawa Ayyaana adhitinoonnihu Seera agadhitineetinso kulloonni'neha Dancha Duduwo amma'natenniiti?

³Hada ki'ne kageeshshi geeshsha hawanyootahoni? Maganu Ayyaaninni hanaffine umi'ne wolqanni guddinanni?

⁴Ammanate heeshshohu daafuri'ne baalu mulla beebba gati yaate? Dee'ni, mulla digatino.

⁵Maganu Ayyaanasi aanno'nehunna ki'ne giddo maalale loosannohu, agadhitinoonnihuraatinso kulloonniha Dancha Duduwo amma'nitineennaati?

⁶Hanni Abirihaami qaagge; Maganu qaali, «Abirihaami Magano amma'ni; amma'nasino keeraanchimmate kiirantusi» yaanno.

⁷Amma'nitinori baalu Abirihaami ooso ikkitinota egenne!

⁸Maganu qaali, Maganu daga amma'nansanni keereensannota balaxe afino. Abirihaamirano, «Daga baala atewidoonni higge maassantanno» yee Dancha Duduwo balaxe kulino.

⁹Kunnira, amma'nitinori ammanate manchi Abirihaami ledo mitteenni maassantanno.

¹⁰«Seeru maxaafi giddo noo hajajo baala wonshannokkihu duuchu rumaminoha ikko» yine borreessinoonni. Kunnira, Seera agadhatenni keeraa'mara hasi'rannohu baalu rumote giddo no.

¹¹«Keeraanchu kayinni amma'natenni heeshsho afi'ranno» yine borreessinoonni daafira, Seera wonshatenni ayino Maganu albaanni keeraa'mannokkiti egennantinote.

¹²Seeru amma'nate aana xintaminoha di"ikkino. Maganu qaali, «Seera guute agadhannohu gatanno» yaanno.

¹³Maganu qaali, «Haqqu aana sutame reyinohu baalu rumammoho» yiinonte gede, Kiristoosi ninkera yee rumaminoha ikke, Seeru rumo giddonni wodinonke.

¹⁴Kuni ikkinohu, Maganu Abirihaamira uyino maasso Kiristoosi Yesuusi widoonni dagate iillitanno gedeetinna Maganu aara coyi'rinoha Qullaawa Ayyaana amma'natenni adhineemmo gedeeti.

¹⁵Roduuwa'ya! Hanni konne coye mannu hee'ranno heeshsho ledo xaadissine la'e. Mannu gondooro eihu gedensaanni, ayino ledara woy xeisara didandaanno.

¹⁶Abirihaami sirchisira hexxo uyinoonnita afe, Maganu qaali lowo mannira coyi'noonnihu gede asse, «Sirchuwakkira» diyaanno. Mitto calla kullannihu gede, «Sirchikkira» yaanno. Hatto yinoonnihu Kiristoosaati.

¹⁷Xa ani yeemmoti, 430 diri gedensaanni uyinoonni Seeri, Maganu egenne eino gondooro diiganna hexxote qaale huna didandaanno.

¹⁸Maganu afansha Seera agadhatenni afi'nanniha ikkoommero, Maganu aanno hexxo agadha dihasiissanno. Maganu kayinni Abirihaamira afansha uyinohu hexxote qaali widoonniiti.

¹⁹Seera uyinoonnihu mayiraati? Seera lendoonnihu Abirihaamira hexxotenni uyinoonni sirchi daa geeshsha cubbu hiittoohoro egensiisateeti. Seera, mittu mereeri manchinni sokkaasinete widoonni qolle uyinoonni.

²⁰Mereeri manchi lameho ikkinnina mittoho dihasiisanno. Maganu kayinni mittoho.

²¹Seeru Maganu uyino hexxo ledo xaada giwannoni? Heeshsho Seeru widoonni afi'nanniha ikkoommero, keeraanchimmano Seeru widoonni afi'nanni.

²²Ikkollana, Maganu qaali yaannonte gede, mannu baalu cubboho hirame cubbu usuranya ikkino. Yesuusa Kiristoosa amma'natenni afi'nanni hexxono amma'nitinorira calla uyinanni.

²³Tini dagganno amma'na leelta geeshsha, Muse Seeri cufe usuranya asse keeshshiishinonke.

²⁴Kunni garinni amma'natenni keeraa'mineemmo gede, Kiristoosiwa iillinammo geeshsha Seeru kaajjado awuuto ikke keeshshinonke.

²⁵Xa amma'na daggino daafira, kunni ka'a Seeru awuuto di"ikkannonke.

²⁶Amma'nate widoonni ki'ne baalunku Kiristoosi Yesuusinni Maganu oosooti.

²⁷Kiristoosi ledo mitto ikkate cuuantinoonniri baalu, Kiristoosi uddidhinoonni.

²⁸Ki'ne baalunku Kiristoosi Yesuusinni mitto ikkitinoonnihura, Ayihudete woy Giriikete, borojjichoho woy biiloho, labbaaho woy meyate yinanniri dino.

²⁹Ki'ne Kiristoosinni heedhiniro, Abirihaami sirchooti; hexxote qaali garinnino ragidhinannireeti.