Read Sidama_Qullaawa _Maxaafa GALATIYU SOKKA 4 Bible Online

GALATIYU SOKKA 4 - Sidama_Qullaawa _Maxaafa bible

GALATIYU SOKKA 4

¹Xa ani yeemmotino tenneeti; ragi'rannohu qaaqqimmatenni noo yannara, jajju baalu anna ikkirono, borojjicho dirooranno.

²Annisi hedino yanna dagga geeshsha awuuttannorinna towatannori anga keeshshanno.

³Ninkeno hakko garinni qaaqqimmatenni hee'noommo waro, tenne gobba seerira borojje ikkine galloommo.

⁴Ikkollana, yinoonni yanna iillituta, Maganu Beettosi tenne gobba soyino. Isino, meyati ilteenna Seeru garinni lophino.

⁵Hatto ikkinohu, Seeru anga galtinore wodeenna, ninkeno Maganu ooso ikkineemmo gedeeti.

⁶Ooso ikkinoommo daafira Maganu, «Annaanna» yine woshshi'neemmoha Beettisi Ayyaana wodaninke giddora soyino.

⁷Kunnira, kunni ka'ira Maganu oosooti ikkinnina borojje di"ikkitinoonni. Oososi ikkitiniro, Maganu oososira qixxeessinore baala ragisiisanno'ne.

⁸Kunnira albaanni Magano affinikkinni, maganna ikkitinokkirira borojje ikkitine heedhinoonni.

⁹Xa Magano affini woyitenna, hakkiinnino roore, Maganu egenni'ne yannara, wolqiweelonna tidhitinokki golfawa higa mayira baxxini? Galagaltine hakkurira borojje ikka hasidhini?

¹⁰Barruwanna aganna, wogganna dirra seekkitine ayirrissinanni.

¹¹Ki'ne daafira mulla haafa daafuroommoha laweennae yaadoommo.

¹²Roduuwa'ya! Ani ki'ne lawummonte gede, ki'neno ane labbinara huucci'reemmo'ne. Ki'ne ane aana mitte saono diassitinoonni.

¹³Dhiwame ki'newa hee'ra'ya, umo Dancha Duduwo kulammo'nera doogo ikkitinoeta affinoonni.

¹⁴Dhibbi'ya qarrisannoha ikkirono, dicee'mitinoonnie; didiqattinoonnie. Maganu sokkaasinchi gede assitine haadhinoonnie. Kiristoosi Yesuusi gede assitine adhitinoonnie.

¹⁵Kunni albaanni noo'ne hagiirri baalu hiikka higi? Dandiitinoommero, noo'nere baala woy ille'ne nafa fushshitine aate marartinannikkire ikkitinoonnita farci'reemmo.

¹⁶Ani xa ki'nera halaale kuloommo'ne daafira diina ikkummo'ne?

¹⁷Wolu manni ki'ne daafira lowo geeshsha xissiisi'ranno. Ikkollana, tenne heddannohu didanchummateeti. Ki'ne anewiinni badde insa ledo mitto ikkitinanni gede hasidheeti.

¹⁸Wodanunni hendanni hedo dancha ikkituro, ani ledo'ne noommo yannara calla ikkikkinni, xeerti're noommo yannarano diinaggaawa danchate.

¹⁹Ooso'ya! Kiristoosi wodani'ne giddo leella geeshsha, xaano ki'ne daafira game amadde nooe.

²⁰Ki'ne daafira lowo geeshsha yaadoommohura, ledo'ne hee'roommoro hedoommo coye kuleemmo'nehu baino.

²¹Hanni kulle"e; Muse Seeri anga galtinara hasidhinanniri, Seeru mayaannoro dimacciishshitinanni?

²²Abirihaamira lame ooso noosita, mittu borojjicho iltinoha, mittu qole galtesi iltinoha ikkinota borreessinoonni.

²³Borojjicho iltinohu, ronsoonni garinni calla ilamino.

²⁴Kuri lamenti meenti lamu gondoori lawishshaati. Siina Ilaali gondoori lawishshi Aggaaraati; ise ooso borojjimmate ilantinote.

²⁵Aggaara oosose ledo borojjimmate giddo noo daafira, Arabete gobbara noohu Siina Ilaali lawishshaati. Qolteno xa noo Yerusaalame labbanno.

²⁶Gordoho noo Yerusaalame kayinni borojjimmate giddo dinoote; ise amankeeti.

²⁷Maganu qaali giddo, «Ati iloottakki gaana hagiidhi! Ati gamaa'mite egennoottakkiti, qoonqokki naggi assite ilillisi. Galte afidhinotenni roore, galte afidhinokki mancho lowo ooso iltino» yine borreessinoonni.

²⁸Roduuwa'ya! Ki'neno Yisihaaqi gede hexxote oosooti.

²⁹Ikkollana, hatte yannara ronsoonni garinni calla ilaminohu Maganu Ayyaani wolqanni ilamino beetto qarrisino. Techono hakku coyi ikkanni no.

³⁰Maganu qaali kayinni mayaanno? Maganu qaali, «Borojjicho iltinohu minaama iltino beetti ledo ragi'rannokki daafira, borojjicho mancho beettise ledo mininni fushshite ha'risi» yaanno.

³¹Kunnira roduuwa'ya! Ninke galtete oosooti ikkinnina, borojjichote ooso di"ikkinoommo.