Read Sidama_Qullaawa _Maxaafa GALATIYU SOKKA 5 Bible Online

GALATIYU SOKKA 5 - Sidama_Qullaawa _Maxaafa bible

GALATIYU SOKKA 5

¹Wolaphine hee'neemmo gede Kiristoosi borojjimmatenni fushshinonke. Kunnira, kaajjitine uurre! Galagaltine borojjimmate qambari giddora e'inoonte.

²Kuneeti, ani Phaawuloosi yeemmo'neti: Barcima hasidhinanniha ikkiro, Kiristoosi mittoreno diledanno'ne.

³«Barcima gatissanno» yee barcimanno manni baalu, Seera baalanka wonsha hasiissannosita seekke kuleemmosi.

⁴Seerunni keeraa'mitine gattinara hasidhinanniri Kiristoosiwiinni murantinanni; Maganu eltorano gobbaanni gattinanni.

⁵Ninke kayinni, Maganu Ayyaani amma'nate widoonni qole keeraanchimmate hexxo agadhineemmo gede assannonke.

⁶Kiristoosi Yesuusinni hee'niro, barcima woy barcima hooga mittoreno dikaa'litanno. Hasiissannoti baxillunni leeltanno amma'na callate.

⁷Techo geeshsha dancha gede doddinanni keeshshitinoonni; konne mereero halaaleho hajajantinannikki gede ayi hooli'ne?

⁸Togoo amaale, woshshino'ne Maganiwiinni difultinote.

⁹Kunino, «Shiimu gamaanchi lowo abbicho hoqisanno» yinanni gedeeti.

¹⁰Ikkollana, wole hedo giddora e'inannikki gede Mootichunni hawaqi'reemmo. Gara hawisanno'nehu hee'riro, Maganuwiinni qorichasi adhanno.

¹¹Roduuwa'ya! Ani xaa geeshsha, «Barcima hasiissanno» yaanni kuleemmo'neha ikkoommero, digimboonnie. Hatto yoommoha ikkoommero, Kiristoosi sutama mannaho guficho di"ikkitanno.

¹²Ki'ne gara hawissanno'neri, barcima calla ikkikkinni, hasidhuro mureeyye ikkito.

¹³Roduuwa'ya! Ki'ne borojjimmatenni fultinara woshshantinoonni. Ikkollana borojjimmatenni fula'ne mimmiti'nera baxillunni soqqantinannita ikkito ikkinnina, maalu yorto wonshitinannita ikkitoonke.

¹⁴Mayira yitiniro, Seeru baalunku, «Manna umikki gede assite baxi!» yitannotenni mitte hajajonni qunqumaminoho.

¹⁵Ki'ne mimmiti'ne ledo itantinanniha ikkiro kayinni, mimmito'ne adhitine ba'inannikki gede agadhe!

¹⁶Kunnira ani yeemmo'neti, Ayyaanu garinni heedhe! Maalu yorto horonta wonshitinoonte!

¹⁷Maalu Ayyaanu hedannore dibaxanno; Ayyaanu qole maalu hedannore dibaxanno; lamunku mimmitu ledo giwantanno. Kunnira hasidhinoonnire assa didandiitinanni.

¹⁸Ayyaanu massagi'nero kayinni, Seeru anga digattinanni.

¹⁹Maalu loosi egennammoho; hakkuno: Foorrete, battete, saalimale heeshshooti,

²⁰kaphu maganna magansi'rate, baarigaarrete, ginyishamate, hinaasate, hanqate, umo baxate, gosoomate, babbaxxate,

²¹dhiibbete, manna shaate, dimbate, sirbatenna woluno kore lawannoho. Balaxe kulummo'nente gede xaano lede yeemmo'nena, hattoo coye assitannori Maganu gashshoote diragidhanno.

²²Ayyaanu laalo kayinni baxilleho, hagiirreho, keereho, cincate, shooshanqete, danchummate, ammanamate,

²³joongilleho, meessanaa qee'late; togoore giwanno seeri dino.

²⁴Kiristoosi Yesuusire ikkitinori maalansa yortonsa ledo suttino.

²⁵Ayyaanunni hee'neemmore ikkinummo geeshsha, Ayyaanu massagannanke hee'no!

²⁶Mimmitonke gibbote kakkayinsanni woy ku'u ko'onne hinaansanni mulla haafa adawadhinoonke.