Read Sidama_Qullaawa _Maxaafa EFESOONI SOKKA 1 Bible Online

EFESOONI SOKKA 1 - Sidama_Qullaawa _Maxaafa bible

EFESOONI SOKKA 1

¹Maganu hedo garinni Kiristoosi Yesuusi soqqamaasincho ikkoommohu ani Phaawuloosi, Efesooni Katamira hee'rannohura qullaawaho, Kiristoosa Yesuusa ammanino mannira:

²Maganu Anninketi, Mootichinke Yesuusi Kiristoosi eltonna keeru ki'ne ledo hee'ro!

³Gordu gobbara Kiristoosinni ayyaanaame maasso baala ee maassi'rinonkehu Mootichinke Yesuusi Kiristoosi Maganinna Anni galatamo!

⁴Albasiinni qullaawootanna arrasso nookkire ikkine hee'neemmo gede, kalqe kalaqantukkinni Kiristoosinni doorinonke. Baxillisinni kainohunni,

⁵Yesuusi Kiristoosinni oososi ikkineemmo gede Maganu alba asse hirqino.

⁶Baxannoha Beettosi calla uyinonketera ayirrado eltosi daafira Magano galanto!

⁷Maganu elto wo'ma ikkitinohura, Beettisi Yesuusi mundeenni wodamme, cubbinkera maaro afi'noommo.

⁸Eltosino ninkera lede lede uyinonke. Hayyosinna egennosi baalatenni Maganu hedino hedo wonshino.

⁹Kiristoosi widoonni qole wonshara balaxe hedinoha dahaawe noo coye anfeemmo gede assino.

¹⁰Tini hedosi wo'mitannohu Maganu yiino yanna dagganno warooti. Hedosino gordohonna baattote noo coyi baalu mitteenni gamba yee, mittu Kiristoosi anga galanno yannaraati.

¹¹Baalankare hedosi gede loosannohu Maganu, balaxe hedino garinni Kiristoosi widoonni qole mannasi ikkinammora doorinonke.

¹²Kuni ikkinohu, balanxe Kiristoosa hexxinoommori ninke, Maganu ayirrinye galatunni leellinsheemmo gedeeti.

¹³Ki'neno halaalunniha gatote qaale macciishshitine Maganu manna ikkitinoonni. Kiristoosa amma'nitineenna aa'nera hexxo uyino'nehunni Qullaawu Ayyaaninni sumudantinoonni.

¹⁴Maganu isire ikkitinore baala gudise wode wolassa geeshsha, Qullaawu Ayyaani iqqinkera uyinoonninke tajeeti. Kunnira Maganu ayirrinye galatunni leellinsho.

¹⁵Kunnira, ani qole Mooticha Yesuusa amma'na'nenna qullaawa Maganu manna baala baxxinannita macciishshe,

¹⁶huuccatto'yanni qaaganni'ne ki'ne daafira Maganoho galata aa diaguroommo.

¹⁷Ayirradu Anni Mootichinke Yesuusi Kiristoosi Magani, leddine buuxxinannisi gede, egennonna go'lino coye leellishanno Ayyaana aanno'ne gede huucci'reemmo.

¹⁸Woshshino'ne hexxo hiittootero qullaawu manni ragi'rannohu ayirradu iqqi mageeshshi geeshsha lowohoro affinara wodani'ne ille xabbanno gede huucci'reemmo.

¹⁹Ninke ammannoommori giddo noo wolqa dannu nookkita bati'ra ikkitinota affinanni gede huucci'reemmo. Tini ninke giddo loossanno wolqa,

²⁰Maganu Kiristoosi reyotenni kayise, gordu gobbara qiniitesiinni ofollanno gede assinote.

²¹Kiristoosi gordoho qiniitesiinni ofollinohu, iimi gashshaano, roorrootu, wolqaataammunna mootoolla baalate aleenni gashshateeti. Isi tenne xa nooterano daggara noo alamera aliidiha ikkinoha ayirrado su'ma afi'rino.

²²Wo'manka isi anga galanno gede asse, baalanka gashshanno gedenna beetekiristaaneteno umo ikkanno gede assinosi.

²³Beetekiristaane Yesuusi bisooti; iseno baalanka coye wo'mante doogonni wonshannohunni wo'ma ikkitino.