Read Sidama_Qullaawa _Maxaafa EFESOONI SOKKA 3 Bible Online

EFESOONI SOKKA 3 - Sidama_Qullaawa _Maxaafa bible

EFESOONI SOKKA 3

¹Kiristoosi Yesuusi usuranya ikkoommohu ani Phaawuloosi, ki'ne Dagate daafira Magano huucci'reemmo.

²Ki'ne qiniitira yee Maganu anera soqqamate elto uyinoeta addinta macciishshitinoonni.

³Balaxe haranse borreessoommonte gede, Maganu go'le noo coye xawise leellishinoe.

⁴Borreesse soyemmo'neha nabbabbinanni woyite, Kiristoosiha go'le noo coye asse buuxoommo gara afa dandiitinanni.

⁵Konne go'le noo coye Maganu Qullaawu Ayyaani widoonni qole qullaawa soqqamaasinesiranna himanaanosira xa xawise kulino garinni, sa'u yannara noo mannira hatto asse dikulino.

⁶Hatto yaa, Danchu Duduwi widoonni Daga Ayihudete ledo Maganu maasso beeqqite mitto biso ikkitanno gede, Maganu Kiristoosi Yesuusinni uyino hexxo afidhannota xawise dikulinonsa yaate.

⁷Maganu wolqasi loosi garinni uyinoetenni baxxitino eltonni Danchu Duduwira soqqamaancho ikkoommo.

⁸Ani Maganu manni baalaho woriidiha ikkummorono, dannu nookkita Kiristoosi jiro Dagate kuleemmo gede tenne elto uyinoonnie.

⁹Qoleno albi yannara wo'manka kalaqino Magani maaxe worino coyi hiitto ikke leellannoro baalunkura xawise kuleemmo gede elto uyinoonnie.

¹⁰Kuni ikkannohu, gordu gobba gashshaanonna roorrootu beetekiristaanete widoonni addi addi danita Maganu egenno affanno gedeeti.

¹¹Maganu konne Mootichinke Kiristoosi Yesuusi widoonni qole wonshinohu, hegere hedosi garinniiti.

¹²Kiristoosire ikkinoommohuranna Kiristoosa amma'ninoommo daafira, Maganu albira be'e yinummokkinni jawaante shiqa dandiineemmo.

¹³Ki'ne daafira yee qarrama'ya ki'nera ayirrinyeho. Kunnira, wolqa ba'inannikki gede seejjeemmo'ne.

¹⁴Maganu Annu albaanni guluphe huucci'reemmohu kunniraati.

¹⁵Gordohonna baattote aana hee'rannohu mittu mittunku mini manni halaalaancho su'ma afi'rannohu Maganuwiinniiti.

¹⁶Maganu ayirrinyisi jironni Ayyaanisi wolqa widoonni qole giddoyidi mannimma'ne jawaachishanno gede huucci'reemmo.

¹⁷Qoleno Kiristoosa amma'na'nenni wodani'ne giddo galanno gedenna, ki'neno baxillunni rumuxxitine kaajjitine heedhinanni gede Magano huucci'reemmo.

¹⁸Kiristoosi baxilli mageeshshi geeshsha hala'ladonna hojjaameessa, seedanna diime ikkinoro qullaawu manni baalu ledo buuxxinanni gede,

¹⁹konne gudinse afa dandiinannikkiha Kiristoosi baxille affinaranna gudisantine Maganu suudinni wo'mitinanni gede huucci'reemmo.

²⁰Kunnira ninke giddo loossanno wolqanni huucci'neemmohunninna hendeemmohunni aleenni quwa sayise assara dandaanno Maganira,

²¹beetekiristaanetenna Kiristoosi Yesuusinni wo'mante yannara hegere ayirrinyi iillosi! Hamii'ni.