Read Sidama_Qullaawa _Maxaafa EFESOONI SOKKA 4 Bible Online

EFESOONI SOKKA 4 - Sidama_Qullaawa _Maxaafa bible

EFESOONI SOKKA 4

¹Mootichaho soqqama'yanni usuranya ikkoommohu ani Phaawuloosi, woshshama'nera labbino heeshsho heedhinanni gede jawaachisheemmo'ne.

²Wo'manka woyite jooguulle, shaqqaddanna cincaaleeyye ikke; mimmito'ne baxillunni duqqe!

³Maganu Ayyaani aanno keerinni mitteenni usurantine mittimma agadhate jawaatte.

⁴Woshshantini yannara mitte hexxora woshshantinoonninte gede, mittu bisinna mittu Ayyaani no.

⁵Hattonni mittu Mootichi, mitte amma'nanna mitte cuuama no.

⁶Qoleno baalunkura aliidihu, baalunku giddo loosannohu, baalunku giddo hee'rannohu, baalunku Anni mittu Magani no.

⁷Ikkollana Kiristoosi mitti mittinkera hedino garinni baxxitino elto uyinonke.

⁸Kunnira qullaawa borro, «Gordo fuli woyite qafado haa'ri; mannahono elto uyi» yitanno.

⁹Baattote woroonni dirrinoha ikka hoogiro, «Gordo fuli» yaa ma yaate?

¹⁰Kuni baattote woroonni dirrihu, baalankare wonshara yee gordoho ka'aanni alira fulinohu isooti.

¹¹Isi mito mito soqqamaasine, woloota himanaano, mito mito Dancha Duduwo kultannore, woloota qole ammanaano allaaltannorenna gamisoota rosiisaano ikkitanno gede assino.

¹²Hatto assinohuno, Maganu manna soqqanshote qixxeesseenna, bisosi ikkitinori dhaawantanno gedeeti.

¹³Kuni ikkannohu, Maganu Beetto egennatenni, amma'natenni afi'nanni mittimmawa iilline, Kiristoosi guutanna wo'ma ikkinonte gede, ninke baalunku wo'ma manna ikkinammo geeshshaati.

¹⁴Kunni ka'a mannu awaawurshinninna xagarrotenni, so'rote bubbenna dambalu ka'anna kawa shafanna gatantarranni qaaqquullu gedeere ikkinoonke.

¹⁵Hatteentenni, halaale baxillunni amandanni umo ikkinoha Kiristoosa lawate baalunku coyinni lophino.

¹⁶Manninatu sufatto baalatenni sufame xaadinohu isinniiti. Mittu mittunku bisi loososi loosanno woyite manninatu baalu lophanno; baxillunni dhaawamanno.

¹⁷Kunnira, tidhitinokki hedori Maganiweello gosa heedhanno garinni heedhinannikki gede, seekke kuleemmo'ne; Mootichu su'minni seejjeemmo'ne.

¹⁸Afa hoogansanninna mokkookkansanni kainohunni, wodaninsa tunsino; Maganuwiinnino baxxitino.

¹⁹Saala hooggino daafira, addi addi batte assate umonsa sarmitannokki hamaandera sayisse uyitino. Yortonsarano gawalo dino.

²⁰Ki'ne kayinni Kiristoosire hakko garinni dirossinoonni.

²¹Addinta Yesuusire macciishshitinoonni; isire ikka'nenni giddosi noo halaale rossinoonni.

²²Xagarrote yortonni doofaartinota albita akkala mannimma ki'newiinni fushshitine hooltinanni gede rosiinsoonni'ne.

²³Wodani'nenna hedo'ne haaroo'mito.

²⁴Magano lawate kalaqantinota, halaalaancho qullaawanna keeraanchimmannita haaro mannimma uddidhe.

²⁵Kunnira, kapho fushshitine tugge. Ninke mimmitinke ledo mitto biso ikkinoommo daafira, mimmitinkera halaale coyi'no.

²⁶Hanqitiniro, cubbo loossinoonte. Hanqitine heedhineenna arrishsho e'oonke.

²⁷Sheexaanehono faro uyitinoonte.

²⁸Moorannohu kunni ka'a mooroonke; hatteentenni hoogginorira aannore afi'rate, angasinni dancha looso loosanni daafuro.

²⁹Afii'nenni bushu coyi fuloonke. Wole manna hasiisinonsa garinni dhaawatenna macciishshitannorira qiniite ikkanno gede dancha coye coyidhe.

³⁰Wodamate barrira sumudantinoonniha Qullaawa Maganu Ayyaana dadillissinoonte.

³¹Qaraaro, aara, hanqo, gibbo, hemenna bunshe baala ki'newiinni hunne.

³²Mimmiti'nera shaqqaddanna shooshaqoota ikke; Maganu Kiristoosinni cubbo'ne agurino'nente gede, ki'neno mimmiti'ne sao agurre.