Read Sidama_Qullaawa _Maxaafa FILIPHISIYUSI SOKKA 1 Bible Online

FILIPHISIYUSI SOKKA 1 - Sidama_Qullaawa _Maxaafa bible

FILIPHISIYUSI SOKKA 1

¹Kiristoosi Yesuusi borojji Phaawuloosinna Ximootewoosi Filiphisiyusi Katamira heedhannorira geerrahonna daaqoonete Kiristoosa Yesuusa ammantinorira qullaawu mannira baalaho,

²Anninke Maganunnihunna Mootichinke Yesuusi Kiristoosi eltonna keeru ki'ne ledo hee'ro.

³Ki'ne qaageemmo yanna baalate, ki'nenni kainohunni Magano'ya galaxxeemmo.

⁴Ki'ne baalunku daafira Magano huucceemmo yannara, hagiidheemmo.

⁵Hakkuno, umi barrinni kayise techo geeshsha Dancha Duduwo kulate looso loosanna kaa'litinoonnie gara hedatenniiti.

⁶Konne dancha looso ki'nenni hanafino Magani, Kiristoosi Yesuusi galagale daanno Barri geeshsha wonshannota dihuluullameemmo.

⁷Ki'ne wodani'yanni diba'inannireeti. Hakkuno hasiisanno coyeti. Kuni ikkannohu, ki'ne baalunku Maganu uyinoe soqqanshora ane ledo kaa'lantinoonni daafiraati. Hatto assitinoonnihuno, xa ani usuru mine hee'reennanna alba Dancha Duduwo xiibbannore gargareemmo woyitenna konne halaale dhaawummo yannaraati.

⁸Ki'ne baalanka Kiristoosi Yesuusi baxanno'ne garinni baxeemmo'neti halaale ikkitinota Maganu egennino.

⁹Baxilli'ne halaalu egennonna wo'ma wodancha ledo mitteenni lede lede lophanno gede, Magano huucci'reemmo.

¹⁰Hatto asseemmohuno, Kiristoosi galagale daanno barrira qixxaabbine, fayyaaleeyyenna minshanniri nookkire ikkitine woyyanno coye baddine affinoonnire ikkitinanni gedeeti.

¹¹Kunni garinni heeshsho'ne Yesuusi Kiristoosi aanno'nehu keeraanchimmate gumi wo'minore ikkitine Maganoho ayirrinyenna galata abbitinannire ikkitinanni.

¹²Ikkollana roduuwa'ya, kuni iillinoe qarri halaalenka Dancha Duduwo halashshammora kaoommohura calla ikkinota affinara hasi'reemmo.

¹³Kunnira usurama'ya Kiristoosi daafiraati. Kuni coyi mootete mini agaraanowanna wolu manni baalunkuwa xawe leellinoho.

¹⁴Mootichunni noori lowo roduuwino usurama'ya halaalunnita ikkitinota ammante Maganu qaale kultara waajja nookkiha albinni roore jawaattanni no.

¹⁵Mitu mitu hinaasunninna heewotenni, wolootu kayinni dancha halchonni ka'e Yesuusire kultanno.

¹⁶Kuri Danchu Duduwira irko ikkammora dooramoommota affe baxillunni Yesuusire kultanno.

¹⁷Ku'uri kayinni, Kiristoosire kultannohu, suwashsho hedonni ikkikkinni umonsa baxate hedonni usurame noommohura qarra ledate heddeeti.

¹⁸Ikki garano ikkiro, danchatennino ikko busha hedonni, Kiristoosire kullanni. Anino kunninni hagiidheemmo. Eewanni, lede hagiidheemmo.

¹⁹Anino ki'ne huuccattonninna Yesuusi Kiristoosi Ayyaani kaa'lonni gate fuleemmota afoommo daafiraati.

²⁰Mittu coyinni nafa saaleemmokki gede, lowo halchonna hexxo nooe; ikkirono, xaante gede hedeemmorinnino ikko asseemmorinni, hee'rummorono reyummorono, Kiristoosi anenni ayirrannota afoo wonshe coyi'reemmo.

²¹Kunnira, ane heeshsho Kiristoosiraati; reyo'ya ane qiniiteeti.

²²Ikkollana, lubbotenni hee'ra'ya guma uyitannota ikkituro, reyatenna hee'rate woyite hiittenne doodheemmoro diafoommo.

²³Lamente hedonni daddawamoommo; ha're Kiristoosi ledo hee'rammora quqquxameemmo; hatti roore woyyitannoe.

²⁴Wole widoonni kayinni, lubbotenni hee'ra ki'nera lowo geeshsha woyyitanno.

²⁵Kunni daafira, ki'ne baalunku ledo hee'reemmota buuxi'roommo. Ki'ne baalunku ledo hee'reemmohu, amma'natenni lophonna hagiirre afidhinanni gedeeti.

²⁶Ani galagale ki'newa dayummoro, anenni kainohunni Kiristoosa Yesuusa hexxitinanni hexxo batidhanno.

²⁷Ikki garano ikkiro, qaru coyi, ki'ne Kiristoosihu Danchu Duduwira hasiisino garinni hee'rate. Ki'newa dayummorono woy fafe hee're mitte hedonni jawaattine uurra'nenna Danchu Duduwi amma'nara mittimmatenni sharrama'ne macciishsheemmo.

²⁸Gibbanno'nere mittu coyira nafa waajjitinoonte! Wo'manka woyite jawaatte. Hatti insara baote, ki'nera kayinni qeellete malaateeti. Konne assannohuno Maganoho.

²⁹Tenne kaayyo uyinoonni'nehu, Kiristoosa ammana callate ikkikkinni, isi daafira yitine qarra adhitinanni gedeeti.

³⁰Kunnira, xa ane ledo qarra beeqqitinannire ikkitinoonni; kuni qarri kunni albaanni iillinoe gede affinoonni; xaano qarru giddo noommota macciishshitinanni.