Read Sidama_Qullaawa _Maxaafa FILIPHISIYUSI SOKKA 2 Bible Online

FILIPHISIYUSI SOKKA 2 - Sidama_Qullaawa _Maxaafa bible

FILIPHISIYUSI SOKKA 2

¹Kiristoosinni heedhinanni heeshsho jawaachishshanno'ne; baxillisino sheshifachishanno'ne; Qullaawu Ayyaani ledo mittimma afidhinoonni; mimmiti'nera mararronna shaqqillu noo'ne.

²Maahoyyena, xa mitte hedonni, baxillunni, ayyaanunninna gawalotenni sumuu yitine hagiirre'ya wonshe.

³Umo'ne roorsidhine haafu adawarshinni mittore nafa assitinoonte. Hatteentenni wolu manni ki'nenni roorinohu gede assitine hedde.

⁴Mittu mittunku woleho woyyannore hedo ikkinnina, umisira woyyannore calla laoonke.

⁵Kiristoosi Yesuusira nooti tini hedo ki'nerano heedho'ne:

⁶Isi Maganu dana afi're hee'renni, afi'rino wolqa ku'le, Maganu ledo taalamara dihasi'rino.

⁷Hattenne agure, umosi mullicho asse, borojjichu daniha ikke, manna lawe ilamino.

⁸Mannu gedeeha ikki yannara, umosi heeshshi assino. Dawete aana sutame, reyate nafa hajajaminoha ikkino.

⁹Kunni daafira, Maganu wo'munkura aliidi darga worisi. Su'ma baalaho rooriidi su'mano uyisi.

¹⁰Kunninni kainohunni, gordoho, baattotenna baattote woroonni noori baalu, Yesuusi su'mi ayirrinyira, guluphitanno.

¹¹Arrawu baaluno, «Yesuusi Kiristoosi Mootichaho» yee farci'ranni, Magano Annaho ayirrinye aanno.

¹²Kunnira, ki'ne baxillaasine'ya! Ani ledo'ne noommo yannara wo'ma woyite hajajantinanni heedhinoonni. Xa ki'newiinni fafe hee'reenna kayinni albinni roore hajajantinanni gede qaagiisseemmo'ne. Waajjatenninna huxi'ratenni gato'ne wo'ma ikkitanno gede assidhe.

¹³Hatto assitinannihu, dancha hedosi daafira, heddinannireno ikko assitinannire ki'ne giddo loosannohu Magano ikkinohuraati.

¹⁴Loossinannire baala gungummenna moronsho nookkiha asse.

¹⁵Hatto ikkiro, bushanna shokkashsho ilama mereero saalsiisannorinna mishiishannori nookkiha fayyaaleeyye Maganu ooso ikkitine gobba baalate aana beeddahimma xabbinanni.

¹⁶Kuni ikkannohuno, heeshsho afi'nanniha Dancha Duduwo agurtinikkinni farcidhinirooti. Kunni garinni dodansho'yanna daafuri'ya mullawa gatannokki gede, Kiristoosi galagale daanno Barra hexxeemmo coyi hee'rannoe.

¹⁷Maganoho ammanatenni shiqishshinanni kakkalonna soqqansho gede, ane mundee lexxite du'nantoommero nafa, ki'ne baalunku ledo hagiidheemmo.

¹⁸Ki'neno hagiidhitine aneno hagiirri'ne beeqqaancho assitinannie.

¹⁹Ki'ne heedhinoonni gara macciishshe hagiidhate, rahe Ximootewoosi ki'newa soyemmo gede Mooticha Yesuusa hexxeemmo.

²⁰Ki'ne daafira ane gede ikke yaadannohu iso agurranna wolu dinoe.

²¹Wolootu baalu, Yesuusi Kiristoosire ikkikkinni uminsa qiniite calla shorritannoreeti.

²²Ximootewoosi kayinni egennineennasi, ane ledo annunna beettu gede ikkineenna ledo'ya Danchu Duduwi looso loosanni hee'rinota affinoonni.

²³Kunnira, ikkeemmota afummohu gedensaanni, iso rahe ki'newa soyate hedoommo.

²⁴Ani umi'yano rahe dayemmo gede Mooticha hexxeemmo.

²⁵Ane kaa'lara sokkinoonniha, ledo'ya olamaancho, ane ledo loosannoha, rodoonke Ephafiroditusi qole ki'newa soya woyyitanno yee hedoommo.

²⁶Iso ki'newa soyemmohu, ki'ne sinsinnaawinohuranna dhiwamasi macciishshitinoonnita afe dadillino daafiraati.

²⁷Addinta lowo geeshsha dhiwame ree hoogino. Maganu kayinni marare hursinosi. Dadillu aana dadillu lexxannoekki gede, Maganu iso gatisatenni aneno mararinoe.

²⁸Kunnira, roorse halchoommohu, ki'ne iso la'ine hagiidhitinanninna ane yaaddono aaninni hawacci yitannoe gedeeti.

²⁹Mootichunni rodoo'ne ikkinota affine hagiirrunni haadhesi. Isi gedee manna baala ayirrisse.

³⁰Isi, ki'ne mule'ya heedhine kaa'la dandiitinannikki coye assaera yee, Kiristoosi loosi daafira lubbosi mararikkinni reyote geeshsha iille gatino.