Read Sidama_Qullaawa _Maxaafa FILIPHISIYUSI SOKKA 3 Bible Online

FILIPHISIYUSI SOKKA 3 - Sidama_Qullaawa _Maxaafa bible

FILIPHISIYUSI SOKKA 3

¹Maahoyyena xaate roduuwa'ya, Mootichunni hagiidhe. Albaanni borreessummo'ne coye lede borreessoommo'nero digiwoommo. Hakku coyi ki'ne so'rotenni agara'nera dandaanno.

²Hakkonne biso murmurannoha busha woshshu gedee manna agadhe.

³Magano Qullaawu Ayyaaninni magansi'neemmorenna, illete leellanno seerinni ikkikkinni Kiristoosa Yesuusa adawadhineemmore ikkinoommohura halaalunni barcimmoommori ninkeeti.

⁴Adawadha hasiisiro, anera adawadheemmori lowo coyi nooe. Illete leellannorinni adawadhannohu hee'riro, anera kayinni hakkiinni roorino coyi nooe.

⁵Ani ilamummohunni settikki barra barcimoommo; ilama'ya Israeelete giddo Biiniyaami ga'reeti; karsu nookki Ibiraawichaati; Ayihudete Seera agadhateno ikkiro, fullaha Farisichaati.

⁶Maganu laalara yee Kiristoosa ammantinore shorreemmoho. Seera agadhateno ikkiro, minshanniri nookkiha ikke hee'roommo.

⁷Ikkirono, kaa'lannoe yee hedoommore baala, Kiristoosi daafira gawajjannori gede asse aguroommo.

⁸Mooticha Yesuusa Kiristoosa egennatenni roorinori mitturino nookkita afe, baalankare mullare asse aguroommo. Isi daafira yee wole baalanka coye hune aguroommo; Kiristoosiha ikkammora yee wo'mankare ishinu gede asse aguroommo.

⁹Hatto assoommohu, Seeru aana xintantinota umi'ya keeraanchimma agure, amma'nate aana xintantinota Maganu keeraanchimma Kiristoosi widoonni afi're isi ledo hee'rateeti.

¹⁰Qoleno, Kiristoosinna isita reyotenni ka"asi wolqa afammora, reyotennino iso lawatenna qarrasi beeqqate yeeti.

¹¹Reyote gedensaannino kae, hegere geeshsha hee'reemmota hexxeeti.

¹²Hedoommowa di"iilloommo; woy konne baala guutoommo yee diafeemmo. Ikkollana, Yesuusi Kiristoosi ane isiha assi'rinoe daafira, anino qixxeessinoere adhammora dodanni noommo.

¹³Roduuwa'ya, ani xaano hakka di"iilloommo; ikkollana mitto coye asseemmo; badhe'yaanni nooha hawanni, alba'yaanni nooha amadammora hiixateemmo.

¹⁴Aannoe ba'raa'ra adhate marre gawa'linanniwa hige dodeemmo. Kuni ba'raa'rino Maganu Yesuusi Kiristoosi widoonni qole gordo woshshe aannoe heeshshooti.

¹⁵Ayyaanaame heeshshonni jawaantoommo baali togoo hedo heda hasiissannonke. Wole xaaddinokki hedo heedhu'nerono, Maganu hattenneno xawisanno'ne.

¹⁶Ikki garano ikkiro, kulloonninke garinni hee'noommowiinni alba hinge qaanfo.

¹⁷Roduuwa'ya, ane labbinannire ikke! Ki'nera leellinshummoha dancha lawishsha adhitinore wolootano seekkitine la'e.

¹⁸Kunni albaanni batinye hige kulummo'nente gede, xaano wi'lanni kuleemmo'neri, lowo manni Kiristoosi masiqalira diina ikke hee'ranno.

¹⁹Godowinsa maganonsaati; shollinyinsa ayirrinyensaati; hedonsa tenne uullate. Kunnira, goofimarchinsa baote.

²⁰Ninkera kayinni gobbanke gordoho. Hakkiinni daannoha Gatisaanchonke Mootichanke Yesuusa Kiristoosa quqquxammanni agadhineemmo.

²¹Isi tenne reyitanno mannimmanke soorre, isita ayirrado mannimma labbanno gede assanno. Hatto assannohuno, wo'manka roorresinni gashshate noosi wolqanniiti.