Read Sidama_Qullaawa _Maxaafa FILIPHISIYUSI SOKKA 4 Bible Online

FILIPHISIYUSI SOKKA 4 - Sidama_Qullaawa _Maxaafa bible

FILIPHISIYUSI SOKKA 4

¹Kunni garinni, baxeemmo'nerinna sinsinnaaweemmo'neri, hagiirsiissinannierinna ku'leemmo'neri roduuwi'ya, Mootichunni jawaattine heedhe.

²Ki'ne lamenti Ewoodiyanna Siinxiki Mootichunni roduuwa ikkitine, sumuu yitine heedhinanni gede huucci'reemmo'ne.

³Hakkiicho noottohu ati ammanamoottohu soqqanshote miila'ya: Anenna Qelentoosi, qoleno su'mansa heeshshote taje giddo borreessinoonniri wolootu soqqanshote miilla'ya ledo mitteenni Dancha Duduwo iillishate lowo geeshsha sharramino daafira, hakkore lamenka meento kaa'linsa.

⁴Wo'manka woyite Mootichunni hagiidhe. Lede yeemmona, hagiidhe!

⁵Danchumma'ne manna baalaho leelto! Mootichu gambise no.

⁶Baalunku coyira galaxxitinanninna huuccidhinanni hasidhinoonni coye Maganoho ku'le ikkinnina, mittu coyirano yaaddinoonte.

⁷Mannu hedora aleenni ikkinohu Maganu keeri, Kiristoosi Yesuusinni wodana'nenna hedo'ne agaranno.

⁸Roduuwa'ya, hakkiinni sairo, halaale ikkinoha, ayirrado, taalo, minshanniri nookkiha, baxille, dancha su'ma, seyinohanna naandanni coye baala wodani'nera wodhe!

⁹Ani rosiisanna macciishshitinoonnihanna adhitinoonniha, ani loosanna la'inoonniha baalano asse. Hatto assitiniro, keeru Magani ledo'ne hee'ranno.

¹⁰Lowo yanna gedensaanni, xaano ane daafira heda hanaffinoonnihura Mootichunni lowo geeshsha hagiidheemmo. Injaalla hoogino'nena, ane daafira heda diagurtinoonni.

¹¹Hatto yeemmohuno, qarru amadinoe daafira di"ikkino. Ani, «Nooehu ikkinoe» yaa rosoommo.

¹²Afi'rano hoongeno egennoommo. Hiikkiichono ikko, hiikka woyiteno hudenna duuwo, afi'ranna hoonge rosoommo.

¹³Wolqa aannoehunni Kiristoosinni baalankare assa dandeemmo.

¹⁴Ikkirono, ki'ne qarri'ya beeqqaasine ikka'ne danchate.

¹⁵Umo asse Dancha Duduwo kulammora Meqedooniyunni fulummo yannara, ki'ne Filiphisiyusi ammanaasine agurranna, aatenna adhate ane ledo kaa'lantinori wole ammanaasine nookkita ki'nenni affinoonni.

¹⁶Teselonqe hee'reenna qarru amadinoeta affine, mitte lame higgine kaa'litinoonnie.

¹⁷Hatto yeemmo'ne woyiteno, ki'newiinni mitore yore ikkikkinni, uyitinoonnie afanshi daafira maasso lexxitanno'ne gede halcheeti.

¹⁸Hasiisannoehanna hakkiinnino saino afansha Ephafiroditusi widoonni qoltine sokkineennae adhoommo. Kuni afanshi'ne su'niitanno kakkalo gede Maganu hagiidhannohonna adhannoho.

¹⁹Magani'yano gawalo nookki jironni Kiristoosi Yesuusi widoonni qole hasiisanno'nere baala wonshanno'ne.

²⁰Maganu Anninkera hegerenni hegere geeshsha ayirrinyu ikkosi. Hamii'ni!

²¹Kiristoosi Yesuusinni qullaawoota ikkitinorira baalaho keere'ya kullensa! Ane ledo noo roduuwino, keere dhaantino'ne.

²²Qullaawoota ikkitinori baalu, wolootunkunni moote Qeesaari mine soqqantannori, keere dhaantino'ne.

²³Mootichu Yesuusi Kiristoosi elto ki'ne wo'munku ledo heedho.