Read Sidama_Qullaawa _Maxaafa QOLASIYAASI SOKKA 1 Bible Online

QOLASIYAASI SOKKA 1 - Sidama_Qullaawa _Maxaafa bible

QOLASIYAASI SOKKA 1

¹Maganu hedonni Yesuusi Kiristoosi soqqamaasincho ikkoommohu ani Phaawuloosinna rodiinke Ximootewoosi,

²Qolasiyaasi heedhinannirira, Kiristoosinni qullaawoota ikkitinoonnirira ammanantinoonni roduuwira, Maganu Anninke eltonna keeri ledo'ne hee'ro.

³Ki'nera huuccineemmo yannara, Mootichinke Yesuusi Kiristoosi Anna Magano wo'manka woyite galanteemmo.

⁴Yesuusi Kiristoosinni noo'ne ammananna ammanaano baalate noo'ne baxille macciishshinoommo.

⁵Halaalu qaali, Danchu Duduwi balaxe ki'newa dayi yannara, isi aanno hexxo macciishshitinoonni. Kunnira, ammana'nenna baxilli'ne gordoho qixxaabbe noo'ne hexxo aana xintamino.

⁶Ki'ne Dancha Duduwo macciishshitinihunna Maganu elto halaale ikkitinota huwattinihunni kayise giddo'ne hee'rinte gede, kuni Danchu Duduwi alame baalateno guma laalanninna lophanni no.

⁷Maganu eltore, ninke afoo ikke soqqaminohu Kiristoosira ammanaminohu ledonke soqqamaanchi Ephafira hasaawinonke.

⁸Isi, Maganu Ayyaaninni afidhinoonni baxilleno kulinonke.

⁹Kunnira, konne coye macciishshinummo barrinni kayinse, ki'nera ayyaanaame egennonninna buuxa baalatenni Maganu hedo afate egenno wonshanno'ne gede huuccanna Magano xa'ma diagurroommo.

¹⁰Qolleno, Mootichaho maltino heeshsho heedhinanni, baalunku coyinni dancha guma laaltinanninna Maganu egennonni lophitinanni wo'mante doogonni hagiirsiissinannisi gede huuccatto assineemmo'ne.

¹¹Mootichu jawa wolqasinni jawaantesi baala oo'ne. Cincatenni baalanka coye dandaate hagiirrunni qixxaabbinoonnire asso'ne.

¹²Qoleno xawaabbu gashshooti giddo qullaawootu ledo iqqa adhitinanni gede assino'neha Magano Anna hagiirrunni galattesi.

¹³Isi tunsichu gashshooti giddonni fushshe, baxannohu Beettisi gashshooti giddora eessinonke.

¹⁴Isi wodeennanke cubbinke aguraminonke.

¹⁵Kiristoosi illete leellannokki Maganira halaalaancho lawishshaati. Isi kalaqamu baalunkura umiidiho.

¹⁶Gordohonna baattote aana noore illete leeltannorenna leeltannokkire wolqaataamma, mootoolla, gashshaanonna roorroota baala kalaqinohu isooti. Maganu baalanka coye kalaqinohu isinniiti; qoleno isiraati.

¹⁷Isi baalunku coyira albaanni no; baalunku coyi mimmito amade uurrinohu isinniiti.

¹⁸Isi bisosi ikkitinotera beetekiristaanete umoho. Baalunku coyira albiidiha ikkanno gede, reyotenni ka"atennino albiidihanna umiha ikkino.

¹⁹Kuni ikkinohuno, wo'ma maganimmasi Beettisi aana heedhanno gede Maganu Annu hedo ikkitinohuraati.

²⁰Isi widoonni gordohono ikko baattote aana noo coye baala isinii ledo araarsino. Masiqalu aana du'nantino mundee Beettisitenni keere kalaqino.

²¹Kunni albaanni Maganuwiinni xeertidhine heedhinoonni; hedo'nenninna bushu loosi'nenni isira diina ikkitine heedhinoonni.

²²Xa kayinni qullaawootanna fayyaaleeyye, kullanniri nookkire asse albisira shiqisha'nera, maalu reyo Beettisite widoonni qole Maganu umisi ledo araarsino'ne.

²³Kuni ikkannohu, xintantinenna sigiiggine, Danchu Duduwinni daggino hexxowiinni miliqqi yitinikinni ammanatenni kaajjitine heedhinirootilla. Kuni Danchu Duduwi, ki'ne macciishshitinoonnihonna kalqe baalate kulloonniho. Ani Phaawuloosino soqqamaancho ikkoommohu kunni Danchu Duduwiraati.

²⁴Xa ki'ne daafira yee adheemmo qarrinni tashshi yaannoe. Bisosi ikkitino beetekiristaanera Kiristoosi qarra beeqqatenni xeinoere maali'yanni wonsheemmo.

²⁵Maganu Qaale ki'nera gudise kulate, Maganu uyinoe annimma garinni beetekiristaanete soqqamaancho ikkoommo.

²⁶Kuni Maganu qaali sa'u yannara mannaho go'le keeshshinohonna xa kayinni Maganu ammantinosirira baalaho leellishinoho.

²⁷Maganu hedo, daga baalate malinota go'lite keeshshitinota ayirrinyisi jiro qullaawootaho leellishate; go'le keeshshino coyino, ki'ne gutantinannihu Maganu ayirrinyi Kiristoosi giddo'ne hee'rate.

²⁸Mittu mittunku Kiristoosinni guuta ikkanno gede assine shiqishate, manna baalaho hayyo baala rosiisatenninna seejjatenni Kiristoosire kulleemmo.

²⁹Maganu jawa wolqasinni giddo'ya loosanno daafira, hatte wolqanni tini hedosi wo'mitanno gede sharramanni daafureemmo.