Read Sidama_Qullaawa _Maxaafa UMI TESELONQE 3 Bible Online

UMI TESELONQE 3 - Sidama_Qullaawa _Maxaafa bible

UMI TESELONQE 3

¹Kunnira, cinca hoongummoti calluwinke Ateenaho gata woyya labbinonke.

²Kiristoosiha Dancha Duduwo kulate Maganu loosaasincho ikkinoha, rodoonke Ximootewoosi sonkoommo'ne. Sonkoommo'nehu ammanatenni jawaachisha'neranna kaajjisha'nera yineeti.

³Qoleno iillino'ne qarrinni hembeelantinannikki gedeeti. Kunni qarrira doorammoommotano egentinoonni.

⁴Ki'ne ledo hee'noommo woyiteno qarru iillannonketa balanxe kulloommo'ne. Yinoommo coyi ikkinotano ki'nenni affinoonni.

⁵Kunni garinni kunni ka'a cince afeemmokki daafira, ammana'ne gara afammora yee Ximootewoosi ki'newa soommo. Iso soommohuno, miteekke Daawuloosi mite doogonni jifeenna'ne daafurinke mullawa gatanno yee waajjeeti.

⁶Xa kayinni Ximootewoosi ki'newa galagale hige, ammana'nehanna baxilli'neha tashshi assanno duduwo kulinonke. Qoleno wo'manka woyite danchatenni qaagginanninketanna ninke ki'ne la"ate sinsinnaambeemmo bikkinni ki'neno ninke la"ate sinsinnaabbinannita kulinonke.

⁷Kunnira roduuwa, qarrunna mitiimma baala amaddunkerono, ammana'nenni kainohunni jawaantoommo.

⁸Ninke hee'noommohu, ki'ne Mootichu Yesuusinni kaajje hee'ra'nenniiti.

⁹Kuneeti xa ki'ne daafira Maganonke galaxxineemmo; ki'nenni kainohunni Isiwa noonke hagiirri daafirano galaxxineemmosi.

¹⁰Hashshanna barra jaatanaambe huucci'neemmohu, ammana'ne giddo xeino coyi wo'manno gedeetinna ki'neno illenkenni la'nammora yineeti.

¹¹Xaano Maganinkenna Anninke, Mootichinke Yesuusino ki'newa dangeemmo gede doogo qineessonke.

¹²Ninke banxeemmo'nente gede, Mootichu ki'ne ki'neneewanna wolu manni baalu ledo noo'ne baxilli lophannonna hala'lanno gede asso'ne.

¹³Kunni garinni, Mootichinke Yesuusi isire ikkitinori baalu ledo daanno waro, Maganu Anninke albaanni minshanniri nookkirenna qullaawoota ikkitinanni gede wodana jawaachishanno'ne.