Read Sidama_Qullaawa _Maxaafa UMI TESELONQE 4 Bible Online

UMI TESELONQE 4 - Sidama_Qullaawa _Maxaafa bible

UMI TESELONQE 4

¹Roduuwa'ya, Magano hagiirsiisate hiitto ikkine hee'ra hasiissannoro ninkewiinni rossinoonni; xa heedhinoonnihu hakko garinniiti. Leddine leddine hatte heeshsho heedhinanni gede Mootichu Yesuusi su'minni huucci'neemmo'nenna amaalleemmo'ne.

²Mootichu Yesuusi su'minni hiittoo wodho uyinoommo'nero affinoonni.

³Maganu halcho, ki'ne qullaawoota ikkitinanni gedeetinna horonta foorretewiinni xeertidhinanni gedeeti.

⁴Mittu mittunku galte'ne ledo hiitto ikkitine[1] qullaawanna ayirrado heeshsho heedhinanniro afa hasiissanno'ne.

⁵Magano affinokki daga gede foorrete hamaande heedhoonke'ne.

⁶Kunni coyinni ayino so'roonke; wole ammanaanono miicoonke. Kunni albaanni kullummo'nenna qorophisiinsummo'nente gede, hattoo coye assitannore Mootichu qorichishanno.

⁷Maganu battaambammora ikkikkinni qullaawoota ikkine hee'nammora woshshinonke.

⁸Kunnira tenne seejjo giwannohu, manna giwannoha ikkikkinni Qullaawa Ayyaanasi aanno'neha Magano giwinoho.

⁹Mimmitu lede baxama ki'nenni Maganuwiinni rossinoonni daafira, ayino tenne hajara ki'nera borreessa dihasiissanno.

¹⁰Addanko, Meqedooniyaho heedhanno roduuwa baala baxxinanni. Ikkollana xaano hakkiinni roorsitine baxxinanni gede huucci'neemmo'ne.

¹¹Ga'labbitte heeshsho heedhe; alba kullummo'nente gede diinagge'nenna anga'nenni loosi'ra habbinoonte.

¹²Kunni garinni amma'ninokki manni mereero ayirradda ikkitinanni ikkinnina manni anga dila'inanni.

¹³Roduuwa'ya, hexxo afi'rinokki manni gede ikkitine dadillitinoonte; reyino mannire baddine affinara hasi'neemmo.

¹⁴Yesuusi reyinotanna reyotenni kainota ammannoommo. Kunnira Yesuusa ammante heedhe reyitinore Maganu Isi ledo haa're abbannonsa.

¹⁵Mootichuwiinni macciishshinoommo qaali garinni kulleemmo'nehu, Mootichu daanno yanna geeshsha lubbotenni hee'neemmori reyitinore dibalanxeemmo.

¹⁶Mootichu hajajote hirbinni, sokkaasinete roorrichi huuronni Maganu woshshatto xurumbunnitenni dukkisame gordunni daanno. Kiristoosa ammante heedhe reyitinori balaxxe ka'anno.

¹⁷Hakkunni gedensaanni lubbotenni hee'noommori, Mootichu ledo bubbete aana xaandammora, insa ledo gomichu giddora hawulukammeemmo. Mootichu ledono hegerera hee'neemmo.

¹⁸Kunnira, mimmito'ne kunni qaalinni jawaachishshe!