Read Sidama_Qullaawa _Maxaafa IYYAASU 16 Bible Online

IYYAASU 16 - Sidama_Qullaawa _Maxaafa bible

IYYAASU 16

¹Yooseefi sirchira uyinoonni baatto wodiidi danni Iyyaarkohu mulinni Yordaanoosi Wayinni ka'eeti. Kunino, Iyyaarko bu'ara soojjaati qaccenni kae, halallira iillanno. Iyyaarkonni kae, gaaraame gobba fule Beeteli geeshsha iillanno.

²Beetelinni kae, Looza sae, Arkootu heedhannowa Axaarooti-Adaari iillanno.

³Hakkiinni, galchimi ragaanni nooriwa Yafileexootu amado sae, woriidi Beetihorooni geeshsha iillanno. Hakkiinni Gezeeri sae, Mediteraaniyu Baarira uurranno.

⁴Yooseefi sircho ikkitinori Efireeminna galchimi ragaanni heedhannori Minaase ga're tenne baatto iqqansa assidhe adhitino.

⁵Efireemi ilama qeechi aane nooho: Danninsa Axaarooti-Adaarira soojjaati ragaanni aliidi Beetihorooni geeshsha iillanno.

⁶Hakkiinni sae, Mediteraaniyu Baari geeshsha iillanno; aliyye widiidi danni Mikimetaatiiti. Hakkiinni kae, Ta"anaati-Shiilora hige erame, soojjaati ragaanni hige Yaanoha iillanno.

⁷Yaanohanni kae, Axaarootinna Naira dirre Iyyaarko iille, Yordaanoosi Wayira gawa'lanno.

⁸Kuni danni galchimi ragaanni Tafuhanni kae, Qaana Xashshi geeshsha iille, Mediteraaniyu Baarira gawa'lanno. Efireemi ilama baalate iqqa assine uyinoonni baatto tenneeti.

⁹Tini baatto, Minaase danni qoqqowi giddo noore, Efireemootaho aamantino katammanna qachuwa giddo amaddanno.

¹⁰Kuri Efireemootu kayinni, Gezeeri heedhanno Kana"aanoota fushshite dihuntino. Kunnira, Kana"aanootu xaa geeshsha Efireemootu ledo heedhanno. Ikkollana, Efireemootaho borojje ikkite heedhanno.