Read Sidama_Qullaawa _Maxaafa IYYAASU 3 Bible Online

IYYAASU 3 - Sidama_Qullaawa _Maxaafa bible

IYYAASU 3

¹Layinki soodo Iyyaasunna Israeelete manni baalunku gutte ka'u. Shixiimi qacha agurte Yordaanoosi Wayiwa martu. Waa fultara albaanni, hakkiicho shiima yanna keeshshitu.

²Sasu barri gedensaanni, Israeelete manni albisaano qacha e'e,

³manna, «Leewaawootu qeesooti Magani'ne Kaaliiqiha Gondooru Taaboota dukke ka'anna affinanni woyite, qacha agurtine insa hoode hadhe.

⁴Kunni albaanni konne darga affinoonnikkiha ikkinohura hadhinanni doogo insa kultanno'ne. Ikkollana, Gondooru Taabootiwa gamba yitinoonte; ki'nenna Gondooru Taabooti mereero 1,000 qaafo ikkanno geeshshi xeertinyi hee'rona» yite hajajju.

⁵Iyyaasuno mannaho, «Kaaliiqi ga'a mereero'ne maalale assannona, manninate'ne keereensidhe» yii.

⁶Qeesootuno Gondooru Taaboota dukke manna balaxxe albaanni higge hadhanno gede kulinsa; insano hajanjoonninsa gede assitu.

⁷Kaaliiqi Iyyaasura, «Techo barra ani alba'neenni asseemmo coyinni, Israeele baalanti ate jawu manchi gede assite ayirrissannohe gedenna Muse ledo hee'rummonte gede ate ledono noommota huwattanno gede asseemmo.

⁸Gondooru Taaboota dukkanno qeesooti wayi gamira iillitanno yannara, giddora e'e uurritanno gede kulinsa» yiisi.

⁹Hakkunni gedensaanni Iyyaasu mannaho, «Kawa shiqqi yitine Kaaliiqi Magani'ne yaannore macciishshe.

¹⁰Ki'ne alba higgine hadhinanni bikkinni, isi Kana"aanoota, Hitoota, Hiwoota, Ferizoota, Gergesoota, Amooraawootanna Iyaabuusoota albi'nenni hoolanno. Heeshshote Magani mereero'ne noota affinannihu,

¹¹baatto baalate Mootichi Kaaliiqihu Gondooru Taabooti balaxe alba'neenni hige Yordaanoosi Waa fulanno yannaraati.

¹²Kuneeti mitte mittente Israeelete ga'rera lekka ikkannoha mitto mitto mancho haadhine 12 manna doorre.

¹³Baatto baalante Mootichiha Kaaliiqiha Gondooru Taaboota dukkino qeesooti lekkuwa waa kissanno yannara, Yordaanoosi Wayi ha'ra aguranno. Aliidinni lolahanni daanno wayino mittowa gamba yee eelanno» yii.

¹⁴Hatti wogga gide gamba assinannita ikkitinohura, wayi wo'me no. Mannu Yordaanoosi Waa fulara qacha agure kai yannara, Gondooru Taaboota dukkino qeesooti balaxxe albaanni higge ha'ra hanaffu; qeesootu wayi giddora e'anni heedheennanni,

¹⁶wayi lolaha aguri. Tsaritaani mule, Adaami yinanni qachira kofame fafe duunami. Reyote Baariwa hige du'namanni noo lolahino co'onta uurri. Kunnira, mannu qarru nookkiha fule Iyyaarko mulira iilli.

¹⁷Mannu baalunku moola baatto kaxxanni fulanno yannara, Kaaliiqiha Gondooru Taaboota dukkino qeesooti mannu baalu fule ka"a geeshsha Yordaanoosi Wayi giddo moola baatto aana uurrite no.