Read Sidama_Qullaawa _Maxaafa IYYAASU 7 Bible Online

IYYAASU 7 - Sidama_Qullaawa _Maxaafa bible

IYYAASU 7

¹Israeelootu kayinni batte ikkinore huntinokki daafira, sao assitino. Hakkuno Yihudu ga'renni Akaani yinanni manchi assino coyeti. Akaani Kariimiho; Kariimi Zabiidiho; Zabiidi Zaaraho. Akaani hoolloonniricho adhino daafira, Kaaliiqi hanqi Israeelete aana buwi.

²Iyyaasu Iyyaarkonni, Beetelira soojjaatoonni Beetiaweeni mule noohuwa Gayi katamira manna soye, «Hakkiichira fultine baatto dooyye» yiinsa. Mannootuno fulte Gayi dooyyitu.

³Galagalte higge Iyyaasura, «Gayi katamira bala tugate, noo manna baalanka gudinse gaadisiisa dihasiisanno; lamunni sasu kumi geeshsha ikkanno manna calla soyi. Hakkiicho noohu shiima manna calla ikkinohura, baalanta olanto sokkooti» yitusi.

⁴Kunnira, sasu kumi geeshsha ikkanno manni gaade bala tugi. Insa kayinni Gayi gaaddo albinni xooqqu.

⁵Gayi manni katamu huxxi waalchinni kayise, kincho darranni bayichi geeshsha shorranni, gaaru eelallittera 36 ikkanno manna shii. Kunninni kainohunni, Israeelootu masseenna, goonte ba'unsa.

⁶Iyyaasunna Israeelete albisooti dadillinsa batinyinni kainohunni, imaanansa dartu. Kaaliiqihu Gondooru Taabooti albaanni, hashsha geeshsha diriirte ubbinowa keeshshitu. Dadillensa leellishshara, uminsa aana buko giggishshidhu.

⁷Iyyaasuno, «Mooticha Kaaliiqi ballo! Yordaanoosi Waa fushshite kawiira abbittonkehu Amooraawootaho sayisse aattonkeranna hunattonkera yiteetini? Hakkiicho Yordaanoosira widoonni hee'noommoro maaho?

⁸Mooticha ballo! Israeele diininsa albinni xooqqunka woyite, hige mayeemmo?

⁹Kana"aanootunna wolootu, tenne baattora heedhannori baalunku konne coye macciishshitanno. Kunnira, gaangaawanke qoqqobbe baalanka guddannonke; ayirradu su'mikkira yite assattonkeri maatilla?» yee huucci'ri.

¹⁰Kaaliiqi Iyyaasura, «Kai! Togo ikkite baattote aana mayira diriiratto?

¹¹Israeele saowe assitino! Agadhitanno gede ane ledo e'ino gondooro diiggino. Huna hasiissannonsari giddonni gamare adhitino; moortuhu gedensaanni, mittoricho adhitinokkihu gede kaphite uminsa jajji ledo karsidhino.

¹²Huna hasiissannore adhitino daafira, Israeele uminsa ba'anno. Diinnansa ittisa hoogginohuno kunniraati. Adhitinannikki gede hoolle hee'neennanni haadhinoonnire huntina geeshsha, ani ki'ne ledo dinoommmo.

¹³Ka'e manna keereensite, kawa anewa shiqanno gede assi; ga'ara qixxaawanno gede kuli. Ani Israeelete Magani Kaaliiqi yeemmore, ‹Israeele! Huntinanni gede hajajoommo'neri giddonni gamare adhitinoonni. Konne coye huna hoogginiro, diina'ne ittissinara horonta didandiitinanni› yite kulinsa.

¹⁴Kunnira, mittu mittunku boosaallu boosaallunkunni ga'a soodo dirante albi'yara shiqqanno gede kulinsa. Ani badeemmo ga're mini mininsanni dirante albi'yara shiqqanno; ani badeemmo mini, maate maatensanni albi'yara dirame shiqanno. Badeemmo maate giddonni mittu mittunku manchi albi'yara shiqanno.

¹⁵Kunni gedensaanni, huna hasiisannoha batte ikkino uduunne angasi anfannihu callisi badamanno. Hakkunni gedensaanni, ane ledo eino gondooro diige, Israeele shollishino daafira, isinna afi'rinori baalunku mitteenni giiramanno» yii.

¹⁶Layinki soodo guto Iyyaasu, Israeeloota ga're ga'rensanni haa're shiqishi. Hakkunni gedensaanni, Yihudu ga're addinni baxxitu.

¹⁷Iyyaasu, Yihudu ga're boosaallu boosaallunkunni haa're shiqishi; hakkiinni aane Zaara boosaalli addinni baxxi. Zaara boosaallo minu minunkunni haa're shiqishi. Zabiidi maateno addinni baxxitu.

¹⁸Zabiidi maate annu annunkunni bade shiqishi. Goofimarchohono, Zabiidira beettu beetto ikkinohu Kariimi beetti Akaani callisi badami.

¹⁹Iyyaasu Akaani, «Beetto'ya! Israeelete Magano Kaaliiqa ayirrisse cubbokki ifaaxxi; assoottore baalanka maaxittokkinni kulie» yiisi.

²⁰Akaani daware, «Halaaleho; Israeelete Magani Kaaliiqi albaanni sao assoommo. Hakkuno,

²¹afi'noommo uduunni giddonni seyinoha Baabiloonootu kaabba, 2 kiilo keenanno geeshshiha kinchu birranna kiilote darate ikkannoha micciirote culka laoommo; yorsiisinoe daafira adhoommo. Kore, birra woroonni wore dukkani'ya giddo waameenna no» yii.

²²Hakkunni gedensaanni, Iyyaasu shiima manna fushshe soyi. Insano doddanni dukkana marte, birra woroonni wore waaminore batte ikkino uduunne affu.

²³Konne uduunne dukkanu giddonni fushshite, Iyyaasuwanna Israeelete manni baalunkuwa haadhe abbite, Kaaliiqi albaanni wortu.

²⁴Iyyaasu, Israeelete manni baalunku ledo, Akaani birrisi, kaabbisi, micciirote culkisi oososinna seennisi ledo lalosi, harresinna ge'reewisi, dukanasinna jajjasi baalanka gamba asse, Akoori[2] Lagicha haa're ha'ri.

²⁵Iyyaasu, «Konne baala qarra, mayira abbisiisittonke? Kuneeti, xa ate aanano Kaaliiqi qarra abbanno» yiisi. Hakkunni gedensaanni, mannu baalunku Akaani kinnatenni gane shii. Maatesino kinnatenni gane shee, jajjasi baalankano giiri. Hakkunni gedensaanni, Kaaliiqihu waajjishanno hanqi qiidi. Hakka waro, iso gannoonni kinna xaa geeshsha hakko duunante no. Hakkonne lagicha Akoori yinannihu kunniraati.