Read Sidama_Qullaawa _Maxaafa UMI XIMOOTEWOOSI 1 Bible Online

UMI XIMOOTEWOOSI 1 - Sidama_Qullaawa _Maxaafa bible

UMI XIMOOTEWOOSI 1

¹Gatisaanchinke Maganunni hexxonke ikkinohu Yesuusi Kiristoosi hajajonni, Yesuusi Kiristoosi soqqamaasinchi Phaawuloosiwiinni:

²Ammanatenni halaalaancho beetto'ya ikkoottohura ate Ximootewoosira, Anninke Maganunna Mootichinke Yesuusi Kiristoosi elto, maaronna keeru ledokki hee'ro.

³Meqedooniya ha'ranni hee're eegamummohe garinni, hakkiicho hee'rannohu mitu mitu kaphu roso rosiissannokki gede assate ati Efesooni gati.

⁴Maattotenna gawalo nookki ilama kiirate giddora e'annokki gede hajaji. Hattoo coyi moronsho abbannota ikkinnina ammanatenni assinannihura Maganu loosira mittoreno dikaa'lanno.

⁵Tenne hajajo gawalo keeraanchu wodaninni, danchu tii"inni, halaalaancho ammananni afi'nanni baxilleeti.

⁶Mitu mitu manni kunni coyiwiinni baxxe, haafu moronsho widira higino.

⁷Hatto assitannohuno, seeru rosiisaano ikka hasidheeti. Ikkollana coyidhanni noore diaffino; wodanchitukkinni afoo wonshite coyidhanno.

⁸Garunni amandiro, seeru dancha ikkinota anfoommo.

⁹Seera uyinoonnihu danchu mannira ikkinokkita anfoommo; seera uyinoonnihu hajajantannokkirira, haxawarrootaho, maganittete heeshsho heedhannokkiriranna cubbaataammaho, qullaawoota ikkitinokkiriranna ayyaanaamo coye mishshannorira, anna woy ama shitannoriranna mannu lubbo huntannoriraati.

¹⁰Foortannoriranna labbaahu ledo akkimaltanno labballira, manna hirtannorira, kaphaasinete, kaphunni xaartannoriranna halaalaancho roso gibbannoriraati.

¹¹Halaalaancho roso anfannihu kayinni, galatamino Maganire kulannohu ayirrado Dancha Duduwooti. Kuni Danchu Duduwi anera eeggo uyinoonnieho.

¹²Ane soqqanshosira doore, ammanamoommoha asse kiire jawaante uyinoeha Mooticha Kiristoosa Yesuusa galaxxeemmo.

¹³Kunni albaanni Kiristoosa xonoommosiha, xiiwoommosihanna shollishoommosiha ikkiro nafa, isi kayinni sao'ya agurinoe. Sao'ya agurinoehu, ani konne baala assoommohu afa hoogatenninna ammana hoogatenni ikkinota afinohuraati.

¹⁴Kiristoosi Yesuusinni afi'noommo ammananna baxilli aana, Mootichinke elto hala'lite aamantinoe.

¹⁵«Yesuusi Kiristoosi cubbaataamma gatisara yee tenne gobba dayino» yaanno qaali halaalaanchohonna mannu baalu adha hasiissannoho. Cubbaataammu baalunni rooru cubbaataami aneeti.

¹⁶Ikkollana sao'ya agurroonnie; sao'ya agurroonniehuno, Yesuusi Kiristoosi dannu nookki garinni baalunkunni roore cubbaataamo ikkoommohure anere cince, iso ammante hegere heeshsho afidhannorira lawishsha ikkeemmo gedeeti.

¹⁷Kunnira hegere Mootera, reyannokkihura, illete leellannokkihura, mittu Maganira ayirrinyunna galatu hegerenni hegere geeshsha iillosi! Hamii'ni.

¹⁸Beetto'ya Ximootewoosi! Kunni albaanni atere himanunni kulloonninte gede, kunninni aante noo hajajo eeggo eemmohe. Himanu yaanno garinni dancha ola olami.

¹⁹Ammananna danchu tii"i hee'rohe. Mitu mitu manni tiiansa hunte, massagannohu nookki markaawe gede ikkite ammanansa huntino.

²⁰Insa giddo, Hemenewoosinna Isikindiri no. Insa Maganu aana sao coyidhannokki gede assate, Sheexaaneho sayise oommo.