Read Sidama_Qullaawa _Maxaafa UMI XIMOOTEWOOSI 3 Bible Online

UMI XIMOOTEWOOSI 3 - Sidama_Qullaawa _Maxaafa bible

UMI XIMOOTEWOOSI 3

¹Mittu manchi, «Beetekiristaanete albisa ikka hasi'riro ayirrado looso halchanno» yaanno qaali halaaleho.

²Kunnira, beetekiristaanete albisi minshanniri nookkiha, mitte galteha, jilba sa"annokkiha, umosi qee'linoha, amanyoote agadhannoha, wosina adhannoha, rosiisa dandaannoha,

³dimbannokkiha, yekkeeramannokkiha, anja egemminoha, gibbo giwannoha, woxeho hagaagannokkiha,

⁴minesi seekke gashsha dandiinoha, oososi kawajjeessi'rinoha ikka hasiissannosi.

⁵Manchu minisi manna gashsha dandaannokkiha ikkiro, Maganu mine gashsha hiitto dandaanno?

⁶Boo'natenni bedeedameenna Sheexaaneho iillitu yoo yinannisikki gede, haaro ammanaancho ikkoonke.

⁷Mishamatenna Sheexaanu woshshaado giddo uwannokki gede, ammaninokki manni mereero dancha su'ma afi'rinoha ikka hasiissannosi.

⁸Kaa'laasine ayirraddanna yitinowa hossannore ikkitona; woyinete xajjera saankaabbannokkire, woxeho hagaaggannokkire ikkitona;

⁹keeraanchu tii"inni ammanate halaale agara dandiitannore ikkitona;

¹⁰insa balanxe fonqolle la'nona; minshanniri nookkire ikkitinota anfihu gedensaanni soqqantona.

¹¹Mittu mittunku galte kawajjaame, manna he'mitannokkita, jilba sa'annokkita, baalunku coyira ammanantinota ikka hasiissanno.

¹²Cimeeyyete kaa'laasine mitte galtere, oosonsanna minensa danchu amanyootinni gashshitinore ikka hasiissannonsa.

¹³Kaa'lote loosinni dancha soqqansho soqqanturo, lowo ayirrinye afidhanno. Yesuusa Kiristoosa ammantino ammana daafira afoo wonshite coyi'ra dandiitanno.

¹⁴Tenne sokka borreesse soommohehu, mulenni atewa dayemmota hexxo assi'reeti.

¹⁵Keeshshummoha ikkiro kayinni, heeshshote Magani beetekiristaanera halaalu heelliichonna safo ikkinohu Maganu mini manni assa hasiissannore afatto gedeeti.

¹⁶Amma'nonke halaali, huluullo nookkiha jawaho. Hakku halaalino, «Manna ikke leellinohu; halaalaanchimmasi Qullaawu Ayyaaninni egennantinohu; sokkaasinete leellinohu; manna baalaho kulloonnihu; alamete aana noo manni ammaninosihu; ayirrinyunni gordo ha'rinohu» yaannoho.