Read Sidama_Qullaawa _Maxaafa UMI XIMOOTEWOOSI 4 Bible Online

UMI XIMOOTEWOOSI 4 - Sidama_Qullaawa _Maxaafa bible

UMI XIMOOTEWOOSI 4

¹Qullaawu Ayyaani xawise, «Gedensiidi yannara mitu mitu manni so'risiissanno ayyaannanna durriisu rosi hoode ha'ranni ammana aguranno» yaanno.

²Hattoo rosi, siwiilunni giirroonni bisi gede dillaabbino awaawuraasinewiinni fulanno.

³Hattoori manna adhanna adhama hooltanno. Ammaninohunna halaale afino manni iso galaxxanni itanno gede Maganu kalaqino sagale, «ittinoonte» yite hooltanno.

⁴Maganu kalaqinohu baalu danchaho; galatunni adhiniro, hunnannihu mittuno dino.

⁵Maganu qaalinninna huuccattotenni faansinoonniho.

⁶Konne roso ammanino mannira seekkite kulittoro, ammanate qaalenna ha'runsattohu danchu rosinni lophattoha Yesuusi Kiristoosiha dancha soqqamaancho ikkatto.

⁷Maganittennire afi'rinokki hasaawinna haafu maattowiinni xooqqe Magano magansi'ra rosi.

⁸Manninate kaajjishi'rate rosi shiimarella kaa'lanno. Magano magansi'ra rosa kayinni xaarano dagganno heeshshorano hexxo noota ikkitino daafira, baalunkurira kaa'litanno.

⁹Kuni coyi mannu baalu adha hasiissanno halaaleeti.

¹⁰Ninke manna baala, roorenka ammantinore baala gatisannoha heeshshote Magano hexxineemmore ikkinoommo daafira, daafurre loonseemmo; sharrammeemmo.[1]

¹¹Konne coye hajaji; rosiisi.

¹²Anjekki ayino mishoonkehe; coyi'ratto coyinni, hee'ratto heeshshonni, baxillunni, ammanatenninna fayyaaleessimmatenni ammanaasinete dancha lawishsha ikki.

¹³Ani daammo geeshsha qullaawa maxaaffa mannaho nabbawate, kulatenna rosiisate jawaati.

¹⁴Himana kullihe woyitenna cimeeyye anga aanaho wortuhe yannara uyinoonniheta atewa noota Maganu elto lashshi assitooti.

¹⁵Lophakki mannu baalu afanno gede kunni coyira diinaggaawi; jaatte assi.

¹⁶Ateneenna rosiisatto roso seekkite agadhi; konne coye jaatte assi. Hatto assittoro, ateneenna macciishshitannohere gatisatto.