Read Sidama_Qullaawa _Maxaafa UMI XIMOOTEWOOSI 5 Bible Online

UMI XIMOOTEWOOSI 5 - Sidama_Qullaawa _Maxaafa bible

UMI XIMOOTEWOOSI 5

¹Geercho annu gede assite amaalisi ikkinnina ruffooti; wedella roduuwu gede,

²meyaa geerra, amuuwu gede assite hedi; aja meento, roduuwu gede assite wo'ma fayyaaleessimmanni hedi.

³Galte shii'rino meento ayirrisinsa.

⁴Galte shiidhino manchora ooso woy oosote ooso heedhusero, hatti ooso balaxxe mininsa manni daafira diinaggaabbannorenna iltinonsariranna ahaahinonsarira galata qola rossinore ikka hasiissannonsa. Kuni Magano tashshi assanno coyeti.

⁵Gunnimmatenni callase nooti, Magano hexxitanni hashshanna barra kaa'lannose gede jaatte huuccidhanno.

⁶Tenne gobba hagiirre calla baxxanno gunnitte kayinni uurronni reyitinote.

⁷Minshanninsari nookkiha hee'ranno gede konne coye rosiisinsa.

⁸Umisi fiixa, roorenka minisi manna kaa'lannokkihu, ammana agurinoho; ammaninokki manninni roore bushaho.

⁹Tajete su'mase borreessinanni gunnitte, 60 diri kawita ikkitoonke. Qolteno, mittu ayiddaannira calla assidhinota ikka hasiissannose.

¹⁰Oososeno danchu garinni lossi'rate, wosina adhate, keeraanote lekka hayishshate, qarrantinore kaa'latenna dancha looso baala loosate diinaggaabbannota ikka hasiissanno.

¹¹Galte shii'rinori aju meenti, maalu yorto qeelteennansa Kiristoosira noonsa baxille hooge mine assi'ra hasi'ranno daafira, insa gunnootu ledo kiirtooti.

¹²Kuni meenti alba Kiristoosira eino qaale diige, uminsa aana hanqo abbi'ranno.

¹³Qoleno, loosiweelo hee'ra roso assi'ranno; looso cee'ma calla ikkikkinni minunni mine sa"anni manna he'manno. Manni coyi giddora eanni, hasiisannokkire coyi'rannore ikkanno.

¹⁴Kunnira, aju meenti mine assi're, ooso ile, minensano amanyootunni amadanno gede amaaleemmo. Hatto ikkiro, baarigaaru haa're su'ma hunannore diafi'ranno.

¹⁵Kunni albaannino mitu mitu galte shii'rino meenti Sheexaanu hoode ha're ammanate doogo aaninni wirri yiino.

¹⁶Mitte ammanaancho mine galte shii'rino meenti hee'riro, beetekiristaanete duha ikkannokki gede ise kaa'litonsana. Hatto ikkiro, beetekiristaane horonta kaa'lannoha afi'rinokkire galte shii'rino meento kaa'la dandiitanno.

¹⁷Beetekiristaane garunni gashshitannorira, roorenka qaale kultanninna rosiissanni daafurtanno cimeeyyera erote ayirrinyi hasiisannonsa.

¹⁸Qullaawu Maxaafi, «Gide gananno hando afoo usurtooti» hattonni, «Loosannohu daafurisi guma adha hasiissannosi» yaanno.

¹⁹Lamu woy sasu manchi naqqasa hoogguro, beetekiristaanete cimeeyye bushiinshe kulleenna'ne macciishshitinoonte.

²⁰Woloota jiilchate, cubbo loossannore mannu baalu albaanni seejji.

²¹Assatto coye baala manna mimmituwiinni roorsittokkinni, woy ayerano godowa hosittokkinni, tenne amaale'ya baala guutatto gede, Maganunna Yesuusi Kiristoosi doorino sokkaasine albaanni eegga yeemmohe.

²²Aye aanano muddante anga aanaho wortooti. Umokki sarxuwiinni agadhi; wolootu cubbira karsantooti.

²³Godowikki gajaajjo daafira, shiima woyinete xajje agi ikkinnina kunni ka'a waa calla aggooti.

²⁴Mitu mitu manni cubbi xawoho leellanni noo daafira, albillitte daggasira noo yoo leellishanno. Wolu manni cubbi kayinni keeshshe leellanno.

²⁵Danchu loosi xawoho no; xawe leellinokkihuno go'le digatanno.