Read Sidama_Qullaawa _Maxaafa LAYINKI XIMOOTEWOOSI 1 Bible Online

LAYINKI XIMOOTEWOOSI 1 - Sidama_Qullaawa _Maxaafa bible

LAYINKI XIMOOTEWOOSI 1

¹Kiristoosi Yesuusinni afi'noonni hexxo heeshshonnite xintinni Maganu yiino garinni Yesuusi Kiristoosi soqqamaasincho ikkoommohu ani Phaawuloosi soommo sokka:

²Baxeemmohu beetti'ya Ximootewoosira: Maganu Annunna Mootichinke Yesuusi Kiristoosi elto, maaronna keeru ate ledo hee'ro.

³Wo'manka woyite hashshanna barra huuccatto'yanni qaageemmo woyite, annuwa'ya assitunte gede anino xalalu tii'inni soqqameemmo Magano galaxxeemmo.

⁴Hindiiddokki qaageemmo; kunnira lowo geeshsha tashshi yaannoe gede ate afammora halchoommo.

⁵Ateta halaalaancho ammana qaageemmo. Hattoo ammana alba ahaahekki Loyidaranna amakki Ewuniqera no. Aterano hatti ammana nooheta afoommo.

⁶Kunnira, anga aanaho worummohe yannara uyinoonnihehanna giddokki giirate gede ikkite noota Maganu elto galagalte bushshatto gede qaagiisseemmohe.

⁷Maganu wolqanniha, baxillunnihanna umo qee'late Ayyaana ikkinnina waajjillu ayyaana diuyinonke.

⁸Kunni ka'a Mootichinkere farci'rate saalfattooti; isi daafira yee usuramoommo aneno fokkitooti. Maganu aannohe wolqanni Danchu Duduwira yite ane ledo qarra adhi.

⁹Ninke loosinni ikkikkinni isi hedosinninna eltosinni gitisinonke. Qullaawa heeshshora woshshinonke; tenne elto lowo dirira albaanni Kiristoosi Yesuusi widoonni qole uyinonke.

¹⁰Tini elto, Gatisaanchinke Yesuusi Kiristoosi daanni xa leeltino. Isi reyote wolqa hune, Danchu Duduwi widoonni qole reyo nookkita hegere heeshsho leellishinonke.

¹¹Anino kunni Duduwi lallawaancho, soqqamaasinchonna rosiisaancho ikke shoomamoommo.

¹²Konne qarra adheemmohuno kunni daafiraati. Ikkollana ammanoommoha egennoommo daafira disaaleemmo. Uyinoonnie eeggo hakko barri geeshsha agadha hasiissannoeta huwatoommo.

¹³Anewiinni rosoottoha hawaqi'nanni qaale lawishsha assidhe, Kiristoosi Yesuusinni noonke ammananninna baxillinni agadhi.

¹⁴Uyinoonniheta dancha eeggo, ledonke noohu Qullaawu Ayyaani widoonni qolte agadhi.

¹⁵Issiyaho noori baalu ane agurte hadhinota afootto. Agurte hadhueri giddo Figeluusinna Hermogeneesi no.

¹⁶Mootichu Onesifoori mini mannira maaro oonsa. Isi ane lowo yanna kaa'linoe; usurama'yarano disaalino.

¹⁷Hakkiinnino sae Rooma dayi yannarano jaate hase afinoe.

¹⁸Goofimarchu barrano Mootichu maarosi oosi; Efesooni noommo yannara soqqaminoe gara ati seekkite afootto.