Read Sidama_Qullaawa _Maxaafa LAYINKI XIMOOTEWOOSI 2 Bible Online

LAYINKI XIMOOTEWOOSI 2 - Sidama_Qullaawa _Maxaafa bible

LAYINKI XIMOOTEWOOSI 2

¹Xaate ati beetto'ya! Kiristoosi Yesuusinni afi'nanni eltonni jawaati.

²Lowo naqaashshe albaanni ani rosiisoommohere woloota rosiisa dandiitannoriranna ammanantinorira eeggo uyi.

³Atino Kiristoosi Yesuusiha dancha olamaancho ikkite ane ledo qarra adhi.

⁴Olaho fulanno manchi, hajajaanchosi hagiirsiisara qixxaawa hasiissannosi ikkinnina wole haja giddora dieanno.

⁵Qolchamannohuno worroonni seeri garinni qolchama hoogiro, qeellete ba'latto adha didandaanno.

⁶Daafure loosi'rannohu daafurisinni afi'rannoha umi laalcho ita hasiissannosi.

⁷Ani yeemmore wodanchi; Mootichu baalunku coyira wodancha oohe.

⁸Reyotenni kainoha Daawiti sircho ikkinoha Yesuusa Kiristoosa qaagi. Ani lallaweemmohu Danchu Duduwino isooti.

⁹Kunni Danchu Duduwi daafira yee sao assinohu gede usurame qarra adheemmo. Maganu qaali kayinni diusuramanno.

¹⁰Kunnira, insano Yesuusi Kiristoosi widoonni afi'nanni gatonna hegere ayirrinye afidhanno gede, Maganu doodhino manni daafira yee baalanka coye cinceemmo.

¹¹«Isi ledo reyinummoro, qolle isi ledo lubbotenni hee'neemmo.

¹²Cincine hee'nummoro, isi ledo moonkeemmo. Badhe wodhinummosiro kayinni, isino badhe wodhannonke.

¹³Ninke ammanama hoongummoro, isi isiniira badhe wodhannokki daafira, wo'manka woyite ammaname hee'ranno» yaannohu qaalisi ammanaminoho.

¹⁴Konne coye qaagiissinsa; qaalunni kainohunni giwantannokki gede Maganu albaanni qorophisiisinsa. Hattoo coyi, macciishshitannore hunannota ikkinnina mittoreno dikaa'lanno.

¹⁵Halaalu qaale taashshite coyi'rattoha fokkisiisoottokki loosaasincho ikkite, atenee haa'nannihe gedeeha assite Maganoho shiqishate jawaati.

¹⁶Tenne gobbahu haafu hasaawiwiinni xooqi. Hattoo hasaawi, manna roore Maganuwiinni fafanno gede assanno.

¹⁷Insa hasaawi, hurtannokki mada gede itanno. Hemenewoosinna Filixoosino insa giddo no.

¹⁸Kuni manni, «Reyotenni ka"a bi'renni ikkite sa'ino» yee moromanni halaaluwiinni fafino. Mitu mitu manni ammanano shashshafanno.

¹⁹Ikkollana, «Mootichu isire ikkitinore afino» qoleno, «Mootichu su'ma ganannohu baalu bunshetewiinni xooqo» yitannoti shashshafantannokkiti Maganu safo sigiigge heedhanno.

²⁰Lowo mini giddo culkunninna birrunni seekkinoonni uduunne calla ikkikkinni, haqqunninna dorunni seekkinoonni uduunnino hee'ranno. Insa giddonni gamu ayirrado hajara, gamu qole shaa"a hajara ikkanno.

²¹Sholladu coyiwiinni baxxe keeraa'me hee'rannohu, ayirrado hajara hasi'nanni uduunnicho ikkanno. Dancha soqqanshora qixxaawinohu, Mootichaho qullaawanna kaa'lanno uduunnicho ikkanno.

²²Busha qeedhichimmate yortowiinni xooqi. Xalalu wodaninni Mooticha woshshidhannori ledo keeraanchimma, ammana, baxillenna keere ha'runsi.

²³Gibbo abbannota affe, hawanyunna egenno afi'rinokki manni moronshowiinni xooqi.

²⁴Mootichu Yesuusi soqqamaancho ikkinohu baalanka mararannoha, rosiisa dandaannohanna cincannoha ikka hasiissannosi ikkinnina giwama dihasiissannosi.

²⁵Gibbannosire shaqqillunni amaala hasiissannosi. Miteekke Maganu aagintaabbe higge halaale affanno gede yanna aansara dandaanno.

²⁶Kunni garinni galfatte higge, Daawuloosi hedosi wonshitara woshshaadinonsawiinni gatte fultanno.