Read Sidama_Qullaawa _Maxaafa TIITO 2 Bible Online

TIITO 2 - Sidama_Qullaawa _Maxaafa bible

TIITO 2

¹Ati kayinni heeshsho aanno roso rosiisi.

²Diro xiiwino labballi jilbunni heedhannore, ga'labboota, umo qee'litinore, ammanatenni, baxillunninna cincatenni fayyaaleeyye ikkitanno gede seejjinsa.

³Diro xiiwino meentino, heeshshonsa qullaawa soqqanshora maltinota ikkito; he'mannokkire, agoho saankaawannokkirenna mannaho dancha coye rosiisannore ikkona.

⁴Aju meenti galtensanna oosonsa baxanno gede,

⁵umonsa qee'linorenna kullanniri nookkire, shaqqaddanna galtensara hajajamannore ikkanno gede amaaltonsana. Konne assitannohuno, Maganu qaali mishamannokki gedeeti.

⁶Wedelluno umonsa qee'lite heedhanno gede seejjinsa.

⁷Atino dancha coye assitanni, baalunku coyira lawishsha ikkinsa. Rosiisatto rosinnino halaalaanchimmanna sirnyaawa leellishinsa.

⁸Minshanniri nookki hasaawa hasaawinsa. Kunni garinni qoxxissannonkeri ninke aana haadhe kultannore hoogge saalfattanno.

⁹Borojju biillansara hajajantanno gede, baalunku coyinni hagiirsiissannonsa gede, busha dawaro qoltannonsakki gedenna,

¹⁰jajjansa moggannokki gedeno seejji. Gatisaanchinke Maganu rosi baalunku coyinni ayirranno gede, wo'manka woyite co'o yitine ammanamme.

¹¹Maganu manna gatisannota eltosi baalunkura leellishino.

¹²Tini eltono ammana giwanna maalu yorto agurre umo qee'line, sumbetenninna ayyaanaame heeshshonni tenne gobbara hee'neemmo gede rosiissannonke.

¹³Kunni garinni maassantinota hexxonke, jawa Maganonke, Mootichinke Yesuusi Kiristoosita ayirrinyunni leella agadhineemmo.

¹⁴Kiristoosi bunshe baalatewiinni gatisankeranna dancha looso loosate diinaggaamboommorenna Isira baxxinoommore fayyaaleeyye manna ikkineemmo gede keereensankera isonoo sayise uyinonke.

¹⁵Konne coye baala rosiisi; wo'ma roorrenni seejji; hayi yii; ayino mishoonkehe.