Read Sidama_Qullaawa _Maxaafa FILIMOONA 1 Bible Online

FILIMOONA 1 - Sidama_Qullaawa _Maxaafa bible

FILIMOONA 1

¹Kiristoosi Yesuusi daafira yee usuranya ikkoommohu, ani Phaawuloosinna rodiinke Ximootewoosi. Baxaminohu rodiinkenna loosu miilinke Filimoonira,

²rodoonke Afibiyara, ninke ledo Yesuusi olamaancho ikkinohura Arkiphaasira, hattono minekki xaaddanno beetekiristaanera:

³Anninke Kaaliiqinna Mootichinke Yesuusi Kiristoosiwiinni eltonna keeru ledo'ne hee'ro.

⁴Huuccatto'yanni ate qaaganni wo'manka woyite Magano'ya galaxxeemmo.

⁵Mooticha Yesuusi Kiristoosa amma'nootto amma'nanna ammanaasine baxatto baxille macciishshe,

⁶Kiristoosire ikkankenni, noonkehu danchu coyi baalu xawo fule leellanno gede, ammanakki woleho beehate jawaatattora Magano huucceemmohe.

⁷Rodoo'ya! Atenni kainohunni ammanaasinete wodani fooliishshi'rino daafira, baxillikki lowo hagiirrenna jawaante uyinoe.

⁸Kunnira, hasiisanno coye assatto gede hajajate Kiristoosinni fe'roommohe.

⁹Ikkirono, hatto assantenni, Yesuusi Kiristoosira yee usuranya ikkoommohu ani geerchu Phaawuloosi, baxillunni huucci'ra doodheemmo.

¹⁰Ani usuru mine hee're, beetti'ya Anaasimoosi daafira ate huucci'reemmo.

¹¹Anaasimoosi kunni albaanni dikaa'linohe. Xa kayinni ateno aneno kaa'lannoha ikkino.

¹²Xa kune iso galagalche atewa soommo; iso atewa soya'yanni, ane wodana soommohu gede asse kiireemmo.

¹³Danchu Duduwi daafira yee konne usurame hee'reenna daye, ate lekka ikke soqqamoommoera baxoommo.

¹⁴Ikkollana atehu danchu loosi wolqatenni ikkikkinni baxillunni ikkara hasi're, atenni malummokkinni mittoreno assa dihasi'roommo.

¹⁵Anaasimoosi atewiinni shiima yanna baxxe keeshshinohu, miteekke kunni ka'a wo'manka woyite ate ledo hee'rannoha ikkanno.

¹⁶Kunni ka'a ate ledo borojjichu gede ikkikkinni, ayirradu rodii gede ikke hee'ranno. Isi anera ayirrado rodoo'yaati; ikkollana maalunni atera soqqamate kaa'lannohe daafiranna Ayyaanunni qole Kiristoosinni rodookki ikkino daafira, roorenka atera ayirrado rodoo ikkanno.

¹⁷Kunni kaa'a ane rodiikki gede assite kiirittoero, isono ane gede assite haa'risi.

¹⁸Assinohe sao heedhuro, woy atewiinni adhino asali hee'riro, anera kiiri.

¹⁹Kune ani Phaawuloosi, «Asalesi baateemmohe» yee anga'yanni borreessoommo. Ikkollana ati umikki heeshshokkinni ane asalaancho ikkoottota qaagiissammohera dihasi'reemmo.

²⁰Kunnira rodoo'ya! Konne dancha coye assattoe gede Mootichu su'minni huucci'reemmohe. Eeggakkiitina Kiristoosinni wodana'ya fooliishshiishie.

²¹Konne borreesse soommohehu hajajamattoeta amma'neeti. Ani yoommohunni roore assattotano afoommo.

²²Maganu huuccatto'ya macciishshe, ki'newa dayemmo gede assannoeta hexxe noommo daafira, daye fooliishshi'reemmo mineno qixxeessie.

²³Kiristoosi Yesuusira yee ane ledo usuraminohu Ephafirano keere dhaaminohe.

²⁴Loosu miilla'ya Maarqoosi, Arisxirookoosi, Deemaasinna Luqaasi keere dhaantinohe.

²⁵Mootichu Yesuusi Kiristoosi elto ate ledo heedho.