Read Sidama_Qullaawa _Maxaafa IBIRAAWOOTA 8 Bible Online

IBIRAAWOOTA 8 - Sidama_Qullaawa _Maxaafa bible

IBIRAAWOOTA 8

¹Hasaambeemmohu qaru coyi kuneeti: Gordoho Ayirradu Magani barcimira qiniiteenni ofollinohu togoo qeesichi noonke.

²Isi gordoho halaalaanchu dukkanira Qullaawa Holge soqqamanni no. Konne dukkana qasinohu, Mooticha Maganoho ikkinnina dimannaho.

³Mitto mittonka qeesootu roorroota worrannihu, Maganoho fushshaatenna kakkalo shiqishshanno gedeeti. Ninkehu Qeesootu Qarino shiqishannoha mitto coye afi'ra hasiissannosi.

⁴Muse Seeri garinni fushshaate shiqishshanno qeesooti noo daafira, isi tenne gobba aana hee'rannoha ikkoommero, qeesicha ikkanno gari dino.

⁵Insa soqqantannohu gordoho noo coyira lawishshanna caale ikkino coyiraati. Kuni ikkinohu Muse dukkana seekki waro Maganu, «Ilaalu aana leellishummohe garinni xiinxallite seekki!» yee hajajinosi garinniiti.

⁶Xa kayinni Yesuusi adhino soqqansho albira qeesootu roorrootinni roorete. Hattonni isi araarsaancho ikkino gondoori akkalu gondoorinni rooreho; hakku haaru gondoori woyyaabbino hexxo aana xintaminoho.

⁷Umi gondoori minshannire afi'rinokkiha ikkoommero, layinki gondoori dihasiisanno.

⁸Maganu mannu aana mishamme noota malaatisanni, «Kune Israeeletenna Yihudu mini ledo, haaro gondooro e"eemmo yanna dagganno» yaanno Mootichu.

⁹«Kuni gondoori Gibitsetenni fushshammora, angansa amadummo waro, annuwansa ledo eummohu gedeeha di"ikkino. Insa gondoori'yanni kaajja hooggino daafira, anino sammi yoommonsa» yaanno Mootichu.

¹⁰«Tenne yanna gedensaanni Israeelete ledo e"eemmo gondoori konneeti» yaanno Mootichu. «Seera'ya giddonsa woreemmo; wodaninsarano borreesseemmo. Ani Maganonsa ikkeemmo; insano manna'ya ikkitanno.

¹¹Ajuno akkaluno afannoe daafira, ‹Mooticha egenni!› yee jaalasi woy rodoosi rosiisannohu dihee'ranno.

¹²Kuni baalu ikkannohu, saonsa agureemmohuraatinna, kunni ka'ano cubbonsa qaageemmokki daafiraati» yiino.

¹³Maganu haaru gondoorire coyi'ranno woyite, albi gondooro akkala assino yaate. Kunnira, albihunna akkalu baalu ba"anno yanna rakke dagganno.