Read Sidama_Qullaawa _Maxaafa IBIRAAWOOTA 9 Bible Online

IBIRAAWOOTA 9 - Sidama_Qullaawa _Maxaafa bible

IBIRAAWOOTA 9

¹Umi gondoorira magansi'rate woganna uullannihu Qullaawu Dukkani noosi.

²Qullaawu Dukkani lamewa beehaminoho. Albaanni noo kifilera caabbicho worranni uduunnichi, xarapheezzunna qullaawu timi no. Hakko dargano, Qullaawa Dargaati yinanni.

³Layinki dargi dukkote giddoonni nooho; konne darga Qullaawa Holgeeti yinanni.

⁴Hakko holgi giddo culkunni seekkinoonnihu hixaana giirranni udiinnichinna culka xalline seekkinoonnihu ayirradu gondooru taabooti no. Kunni gondooru taabooti giddo, mennaho yinanni sagale worroonnihu culkunni seekkinoonni xilti, lattinoti Aarooni siqqicho, gondooro aanaho borreessinoonniri lame bocame kinna no.

⁵Gondooru taabooti aana nooha maarote barcima qoolinsanni guggushshitannori kirubeeli yinanni kalaqami no. Ikkollana konne coye baala xa gunde coyi'ne dianfeemmo.

⁶Baalunku coyi kunni garinni qixxaawanno yannara, qeesootu soqqantara dukkanu giddo noo darga qullaawa barru baala e'anno.

⁷Qullaawu Holgira kayinni, dirunni mitte hige qeesootu qari callu eanno. Isino umisi cubbiranna mannu afikkinni loosino cubbi daafira mundee haa'rikkinni dieanno.

⁸Umi dukkani noo geeshsha, Qullaawu Holgira massitanno doogo xaara xabbe leeltinokkita, Qullaawu Ayyaani kunni garinni leellishanno.

⁹Kuni coyi xaa yannara lawishshaho. Kunni garinni shiqinshanni fushshaatinna kakkalo shiqishi'ranno manchi tiia dixalashshitanno.

¹⁰Kuni coyi haaroo'manno yanna dagga geeshsha, gobbayidi woga calla horoonsi'noonni. Tini woga itatenna agate, qoleno hayishshi'ne keeraa'mate daafira calla worroonnite.

¹¹Ikkollana Kiristoosi Qeesootu Roorricha ikke dayinohu xa noohu danchu coyi daafiraati. Isi soqqamannohu qullaawu dukkani roore jawahonna guutaho. Kuni dukkani mannu anganni seekkinoonnihanna tenne gobba kalaqami ledoha di"ikkino.

¹²Isi Qullaawu Holgira layinkimeeshsho lendannikki garinni umisi mundee haa're einota ikkinnina, meunnitanna boottate mundee haa're dieino. Kunni garinni hegere gato abbinonke.

¹³Meunna boottate mundeenna kakkalote giirroonni adde buluulo lagaawino manni aana finciniro, gobbayidi mannimma keereensite faansitanno.

¹⁴Hatto ikkannoha ikkiro, hegere Ayyaani widoonni qole isonoo mishamme nookki kakkalo asse Maganoho shiqishinohunniti Kiristoosi mundee heeshshote Maganira soqqammeemmo gede, reyote loosiwiinni[4] tiianke hiitto roorsite keereensa hoogganno!

¹⁵Woshshantinori Maganu hexxotenni uyinonsaha hegere iqqa ragidhanno gede, Kiristoosi haaru gondoorira mereerima ikkino. Kuni ikkinohu manna umi gondoori anga hee're loosino cubbinni wode gatisara yee isi reyinohuraati.

¹⁶Reyino manchi dhaammo dhaansi hee'riro, dhaamino manchi reyo halaalehoro buuxa hasiissanno.

¹⁷Dhaansu wo'mannohu dhaaminohu reyihu gedensaanniiti. Dhaamino manchi lubbotenni hee'reenna dhaansu assannori dino.

¹⁸Kunnira umi gondoori nafa mundee nookkiha assannori dinooho.

¹⁹Umo asse Muse Seeru hajajo manna baalaho kulino. Hakkunni gedensaanni boottatenna meu mundee wayi ledo karse, Seeru borroranna mannu baalu aana garambichunninna duumu ge'rechi ordanni wixino.

²⁰Wixinohuno, «Maganu agadhitinanni gede hajajino'nehu mundeete gondoori konneeti» yeeti.

²¹Qullaawu dukkaninna soqqanshote uduunni baalu aanano mundee wixi.

²²Muse Seeri garinni shiima coye calla agurranna hakkuyi ka'i coyi baalu mundeetenni keeraa'manno. Mundee du'nantukkinni cubbunni dikeeraa'minanni.

²³Kunnira, kuri gordu coyi lawishsha ikkitinori baalu, kunni gari woganni keeraa'ma hasiissannonsa. Gordu coyi kayinni hakkiinni sa'ino kakkalonni keeraa'ma hasiissannosi.

²⁴Kiristoosi halaalaancho Qullaawu Mini lawishsha ikkinohanna mannu anganni minnoonni Mine dieino. Isi xa ninke daafira Maganu albaanni leellara yee gordo eino.

²⁵Ayihudennihu qeesootu qari saadate mundee haa're diru dirunkunni Qullaawu Holgira eanno. Kiristoosi kayinni isonoo kakkalo asse shiqishate wo'ma woyite dieino.

²⁶Hatto ikkoommero, alame kalaqantunkunni kayise batinye hige qarra adha hasiisse hoogginosi. Xa kayinni yannate goofimarchira cubbo hunate isonoo kakkalo asse layinkita lendannikki garinni leellino.

²⁷Mannaho mitte hige reya noote; reyihu gedensaanni Maganu yoo noosi.

²⁸Kiristoosi lowo manni cubbo hunara mitte hige kakkalamino. Qoleno cubbo duqqara ikkikkinni, iso agadhitannore gatisara layinkimeeshsho daanno.