Read Sidama_Qullaawa _Maxaafa YAIQOOBI 1 Bible Online

YAIQOOBI 1 - Sidama_Qullaawa _Maxaafa bible

YAIQOOBI 1

¹Gobba baalate billaallite noorira tonaa lamente Israeelete ga'rera, Maganunna Mootichu Yesuusi Kiristoosi soqqamaancho ikkoommohu ani Yaiqoobi soommo sokka. Keeru ki'ne ledo hee'ro.

²Roduuwa'ya! Addi addi jifama iillitu'nero, tashshi assanno coye afidhinoonnihu gede assitine kiirre.

³Ammana'ne jifanturo, cinca afidhinanni gede assitannota egentinoonni.

⁴Cincatenni kaajja'ne mitturino xei'nekkinni guutanna wo'ma manna assitanno'neta ikkito.

⁵Ki'ne giddo egenno xe'inosihu hee'riro, Magano huucci'ro; Maganuno aannosi. Isi ayeno mishikkinni baalunkura elate shooshaqa Maganooti.

⁶Ikkollana mannu mittoreno huluullamikkinni ammanatenni huucci'ro. Huluullamanno manchi bubbe ganteenna shashshafaminoha baaru dambala lawanno.

⁷Hattoo manchi Maganuwiinni mittoreno afi'reemmo yee hedoonke.

⁸Lame hedo noosihuranna yiinowa kaajje uurrannokki daafira afi'rara didandaanno.

⁹Gadadaame heeshsho hee'ranno ammanaanchi, Maganu aliidiha assannosi daafira hagiidho.

¹⁰Mannu jiro daraarchu gede giggiltanno daafira hee'ranno heeshshonni aliidiha ikkinohu amma'nate rodii, Maganu heeshshosinni woriidiha assisirono tashshi yoosi.

¹¹Arrishsho iibbitanno yannara hayisso mooshshitanno; daraarono giggiltanno; biinfillisino ba"anno. Hattono dureessu manchi loosisinni raankanni ba"anno.

¹²Jifamate yannara cincanno manchi ba'raa'rinoho. Jifamihu gedensaanni, Maganu baxannorira uyino hexxonna heeshshote ba'latto adhanno.

¹³Ayino jifamanno yannara, «Maganu jifinoe» yoonke. Maganu bushu coyinni dijifanno; horontanni isi ayeno dijifanno.

¹⁴Ikkollana mittu mittunku manchi jifamannohu umisi yortonni goshooshamanninna dogamanniiti.

¹⁵Hakkunni gedensaanni yorto godobbe cubbo iltanno; cubbu lophiro reyo qalanno.

¹⁶Baxantinoonni roduuwa'ya! Sodhinoonte!

¹⁷Dancha eltonna wo'mu atooti baalu Maganuwiinniiti. Kuni daannohu caalu gede doyannokkihu woy soorramannokkihu xawaabbu Anni Maganuwiinniiti.

¹⁸Maganu kalaqama baalaho umire ikkinammora isi umisi hedonni halaalu qaalinni ilinonke.

¹⁹Baxantinoonni roduuwa'ya! Konne habbinoonte; mannu baalu macciishshate rahinoha, coyi'ratenna hanqoho muddamannokkiha ikko.

²⁰Mannu hanqi Maganu keeraanchimma afi'nanni gede diassanno.

²¹Kunnira battetenna bunshete batinye baala huntine, Maganu wodani'ne giddo kaasinohanna lubbo'ne gatisa dandaanno qaale joongillunni adhe.

²²Qaalesi guuttinannire ikke ikkinnina, umo'ne dogginanni macciishshaasine calla ikkitinoonte.

²³Qaalesi macciishshe guutannokki manchi, kalaqamunniha albasi hincilaallotenni layi'ranno manchi gedeeho.

²⁴Hakku manchi, albasi hincilaallotenni layi'rihu gedensaanni ha'ranno; hiittoohoro hakkawoyintenni hawanno.

²⁵Ikkollana wolassannoha guuta seera buuxe afe isinni kaajje hee'rannohu, macciishshe hawannoha ikkikkinni, loosu aana hosiisanno manchi loosisinni maassaminoho.

²⁶Arrawosi eemadhikkinni Magano magansi'reemmo yaanno manchi umosi doganno; isi magansi'ra haafaho.

²⁷Maganu Annu albaanni keeraanchonna battaabbinokki amma'no: Annanna ama shiidhino ooso, hattonni galte shii'rino meento kaa'la, tenne gobba ishinchiwiinni meessaneete agadhate.