Read Sidama_Qullaawa _Maxaafa YAIQOOBI 5 Bible Online

YAIQOOBI 5 - Sidama_Qullaawa _Maxaafa bible

YAIQOOBI 5

¹Ki'ne dureeyyeno, qarru iilla'neraatina raartinanni wi'le.

²Jiro'ne baala dukukkite ba'ino; uddano'neno bile ittino.

³Culki'nenna birri'ne bulaase baino; bulaanseno ki'nera malaate ikkitanno'ne. Biso'neno giirate gede ittanno. Tenne goofimarchu yannara lowo jiro duu'nitinoonni.

⁴Gate'ne gide gamba assitanni hossino loosaasinera daafurinsa waaga aa gibbineenna, kuneeti raartanni no. Gide'ne gamba assitannori raare Olantote Mootichi macciishshino.

⁵Qawaaxxaamenna hagiirraame heeshsho heedhinanni, gorrinara qixxeessinoonni saada gede du'mitinoonni.

⁶Keeraancho beebbatenni bushiishshinoonni; gargadhe afannokkiha shitinoonni.

⁷Roduuwa'ya! Xaate Mootichu daa geeshsha cincatenni agadhe! Loosi'ranno manchi baattosi umihanna gedeni xeena afidha geeshsha cince agare, ikkado guma adhanno.

⁸Ki'neno hatto cince; Mootichu daanno yanna gamba yitino daafira kaajjitine uurre.

⁹Roduuwa'ya! Ki'nera yoo yinanni'nekki gede, mimmiti'ne ledo giwantinoonte; kuneeti yoo yaannohu daanno yanna iillitino.

¹⁰Roduuwa'ya! Mootichu su'minni coyidhino himanaano, cincite qarra adhatenni lawishsha ikkitinota affe.

¹¹Cincite uurritinore, «Ba'raadhinoreeti» yineemmonsa. Iyyoobi cincino gara macciishshitinoonni. Mootichuno goofimarchoho assinosiha dancha coye affinoonni. Kunninni Mootichu sao agurannohanna mararannoha ikkinota buuxxinoonni.

¹²Roduuwa'ya! Baalunkuri aleenni gordoho woy baattote, woy wolurinnino xaartinoonte. Yoo iillitanno'nekki gede, coye'ne ee yinannihoro «Ee», dee'ni yinannihoro «Dee'ni» yiiyye.

¹³Ki'ne giddo qarru amadinosihu hee'riro huucci'ro. Hagiidhinohu hee'riro galatunni faarso.

¹⁴Ki'ne giddo dhiwaminohu hee'riro, beetekiristaanete cimeeyye woshshi'rona; insano Mootichu su'minni zayite buurte huuccitosina.

¹⁵Ammanatenni huuccinanni huuccatto dhiwantinore hursitanno. Mootichuno dhiwaminoha hursanno; cubbu noosiha ikkirono agurannosi.

¹⁶Kunnira hurtinanni gede cubbo'ne ki'ne ki'neneewa aagintaabbe; ku'u ku'unnira huucco. Keeraanchu manchi huuccatto, lowo guma uyitannota jawa wolqa afidhino.

¹⁷Eeliyaasi ninke gedee manchooti. Ikkollana xeena ganannokki gede seekke huucci'ri yannara, sase dironna lee agana baattote aana xeena diganino.

¹⁸Galagale huucceenna gordunni xeenu dirri. Baattono galagalte laalcho fushshitu.

¹⁹Roduuwa'ya! Ki'ne giddonni mittu halaalu aaninni wirri yeenna, wolu qole halaalu widira qolisiro,

²⁰cubbaataamo so'rote doogonni qolasinni cubbaataamu lubbo reyotenni gatisinotanna lowo cubbosino agursiisinosita afona.