Read Sidama_Qullaawa _Maxaafa UMI PHEEXIROOSI 1 Bible Online

UMI PHEEXIROOSI 1 - Sidama_Qullaawa _Maxaafa bible

UMI PHEEXIROOSI 1

¹Yesuusi Kiristoosi soqqamaasinchi ani Pheexiroosi, Manni gobba manna ikkitine Phanxoosi, Galaatiyaho, Qephedooqiyaho, Issiyahonna Biitaaniyaho billaallitine heedhinannirira,

²Maganu Annu alba asse hedino garinni doorantinoonnirira, Yesuusi Kiristoosira hajajantinanninna mundeesi winxa'nera Ayyaanu qullaawoota assino'nerira: Eltonna keeru batiro'ne.

³Yesuusi Kiristoosi reyotenni ka"asinni heeshshote hexxo uyinke. Jawa maarosinni haaro ilamanni oososi assinonkehu, Mootichinke Yesuusi Kiristoosi Anni Maganu galatamo.

⁴Isino ba"annokkiha, dukukkannokkihanna akkalannokki iqqa gordoho qixxeessino'ne.

⁵Ki'neno goofimarchu barra xawo fultara noo gato adhitinanni gede, ammanate widoonni Maganu wolqanni agarantinoonni.

⁶Shiima yanna geeshsha addi addi qarri amadi'nero nafa, kunni coyinni hagiidhe!

⁷Hakku qarri iillanno'nehu ammana'ne halaalaanchimma buuxateeti. Ba"anno culka nafa giiratenni fonqolle la'nanni; culkunni roore ayirrado ammana'neno hattonni fonqolama hasiissannose. Tini fonqolantinoti ammana'ne Yesuusi Kiristoosi daanno barra galata, ayirrinyenna gaamaarre uyitanno'ne.

⁸Yesuusa Kiristoosa la'inoonnikkiha ikkirono baxxinannisi. Xa la'inoonnisikkiha ikkirono, ammantinannisi; kulle dandiinannikkihanna ayirrado hagiirre hagiidhitinanni.

⁹Ammana'nenni agadhitinannita lubbo'ne gatono afidhinanni.

¹⁰Ki'nera hendoonni eltore himantino himanaano, tenne gatore lowo geeshsha diinaggaabbe xiinxallitino.

¹¹Insa giddo noohu Kiristoosi Ayyaani Kiristoosira iillanno qarranna qarru gedensaanni afi'ranno ayirrinye alba asse qummi assino. Insano kuni baalu ma yannaranna ma garinni ikkannoro buuxxino.

¹²Tini himanaano ki'nera ikkinnina uminsara soqqantinokkiti xabbe leeltinonsa; soqqantino'nehuno gordunni sonkoonnihu Qullaawu Ayyaani widoonni xa Dancha Duduwo kuli'ne manni hasaawinore xawisatenniiti. Konne coye sokkaasine nafa la'ara halchitanno.

¹³Kunnira wodana'ne feeffachishshine, jilbunni heedhe. Yesuusi Kiristoosi daanno yannara afidhinanni eltora wo'ma hexxo heedho'ne.

¹⁴Hajajantanno ooso gede ikkitine, alba affinikkinni heedhinita busha yorto ha'runsitinoonte.

¹⁵Woshshino'ne Magani qullaawa ikkinonte gede, ki'neno heeshsho'ne baalatenni qullaawoota ikke.

¹⁶«Ani qullaawa ikkoommonte gede, ki'neno qullaawoota ikke!» yine borreessinoonni.

¹⁷Ayerano godowa hosikkinni mittu mittunkura loosisi garinni yoo yaanno Magano, «Annanke» yitine woshshidhinanniha ikkiro, tenne gobbara wosinchimma heedhinoonni yannara, iso waajjitinanni heedhe.

¹⁸Annuwa'newiinni ragidhinoonnita haafu heeshsho heedhinanniwiinni wondoonni'nehu ba"anno birrinni woy ba"anno culkinni di"ikkino.

¹⁹Ki'ne wondoonnihu kullannire woy minshannire afi'rinokki ge'rechite gedeetenni ayirrado Kiristoosi mundeenniiti.

²⁰Isi egennaminohu gobba kalaqantara albaanniiti; xa goofimarchu yannara kayinni ki'ne daafira leellino.

²¹Ammana'nenna hexxo'ne Maganunni ikkitanno gede, Yesuusi widoonni amma'nitinoonnihanna iso reyotenni kayise ayirrinye uyinosi Magano addaxxe.

²²Ammanaano taalu baxillinni baxxinanni gede, halaaleho hajajamatenni lubbo'ne keereensidhinoonni. Kunnira mimmiti'ne ledo xalalu wodaninni seekkitine baxamme.

²³Layinkimeeshsho ilantinoonnihu, heeshshonnihunninna hegere geeshsha hee'rannohunni Maganu qaalinni ba"annokki wixinniiti ikkinnina, ba"anno wixinni di"ikkino.

²⁴«Mannu baalu hayissote gedeeho; ayirrinyisino xawu daraaro gedeeho. Hayisso mooltanno; daraarono giggiltanno.

²⁵Mootichu qaali kayinni, hegere geeshsha hee'ranno» Kulli'nehu Danchu Duduwino konneeti.