Read Sidama_Qullaawa _Maxaafa UMI PHEEXIROOSI 3 Bible Online

UMI PHEEXIROOSI 3 - Sidama_Qullaawa _Maxaafa bible

UMI PHEEXIROOSI 3

¹Ki'ne meentu, galte'nera hajajamme! Kunni garinni mitu mitu Maganu qaale ammana hooggurono, qaale affukkinni meentinsa amanyoote la'e tenne heeshshowa gamba yaa dandiitanno.

²Gamba yaa dandiitannohu, xalalanna manna ayirrisate heeshsho'ne la'urooti.

³Ki'ne biinfilli umo shura assi'ratenni, culka irri'ratenninna maareekote uddano uddi'ratenni gobbayidi seesiha ikkoonke.

⁴Biinfilli'ne Maganu albaanni iibbadu waagihanna ba'annokki xummeha, ga'labbichunna wodanaamu suudi seesiha, wodanu giddo nooha giddoyidi manninate ikkona.

⁵Bi're albi yannara Magano hexxinohu qullaawu meenti seesinohu hakko garinniiti; galtensarano hajajamino.

⁶Saarano Abirihaami, «Mooticha'ya» yitanni hajajantinosi; ki'neno dancha coye assitinironna masisanno coye mittono waajja hoogginiro, ise seenneeti.

⁷Ki'ne labballuno meenti'ne ledo wodanchatenni heedhe; ki'nenni roore wolqiweelo kalaqama ikkinohuranna ki'ne ledo heeshshote elto ragi'ranno daafira ayirrissensa. Hakko garinni heedhiniro, huuccatto'ne macciishsha hoolannori dihee'ranno.

⁸Hakkiinni sairo, baalunku mimmiti'ne ledo sumuu yitine heedhe; wolu manni qarra umi'nehu gede assitine hedde. Rodiimmate baxillinni baxamme; shaqqaddanna jooguulle ikke.

⁹Maassidhe ikkinnina, bunshe bunshetenni, xonono xonotenni qoltinoonte. Ki'ne woshshinoonni'nehu hakko garinni maasso ragidhinaraati.

¹⁰Qullaawa Borro yitannonte gede, «Heeshsho baxannohunna dancha barra la"ara hasi'rannohu, arrawisi busha coyi'rannokki gede, suumesino sao coyidhannokki gede hoo'lo.

¹¹Bushu coyiwiinni xeerti'ro; dancha coye asso; keere hasi'ro; keeru hoodeno ha'ro.

¹²Mootichu ille keeraanote widira higge la'anno; maccasino huuccattonsa macciishshate fa'nante no; busha assitannorira kayinni, Mootichu hanqu alba qolanno.»

¹³Dancha coye assate laalaattiniro, qarrisanno'nehu ayeti?

¹⁴Dancha coye assatenni qarra adhitiniro nafa, baraadhinoonni; waajjishiishshannoreno waajjitinoonte; yaaddinoonte!

¹⁵Mooticha Kiristoosa wodani'nenni ayirrisse. Ki'nera noo'ne hexxo garinni xa'mitanno'nerira baalaho dawaro qolate wo'manka woyite qixxaabbinoonnire ikke.

¹⁶Qoltinanni dawaro kayinni shaqqillunnitanna owaantennita ikkito; Kiristoosire ikka'nenni danchu akati'nera sabba buurtannori, bunshe coyi'ransara saalfattanno gede, danchu tii"i hee'ro'ne.

¹⁷Maganu yiinoha ikkiro, busha coye assatenni qarrantinantenni, dancha coye assitine qarra adhitiniro woyyanno.

¹⁸Kiristoosino ninke Maganunniwa shiqishara yee, keeraancho ikke hee'renni, keeraanchimma afi'noommokkirira cubbinkenni kainohunni mitte hige qarra adhe reyino. Isi manninatunni ree, ayyaanunni kayinni heeshshonniha ikkino.

¹⁹Hakko Ayyaaninni mare usuru mine noo lubbuwara Dancha Duduwo lallawino.

²⁰Kuri usuru mine noo lubbuwa bi're Nohi markaawe boci waro Maganu cince agare hee'reennansanni, hajajama gibbureeti. Hatte markaawe giddora e"e wayinni gatinohu kiiro shiimu sette mannaati.

²¹Kuni wayino xa ki'ne gatisate cuuamate lawishshaati; tini cuuama mannimmate xure hayishshi'nannita ikkitukkinni keeraancho tiia afi'rate Maganunniwa shiqqanno huuccattooti. Gatisanno'nehuno Yesuusi Kiristoosi kao widoonniiti.

²²Isi gordo ha're Maganoho qiniiteenni no; sokkaasine, gashshaanonna wolqaataammu angasira higganno.