Read Sidama_Qullaawa _Maxaafa UMI PHEEXIROOSI 4 Bible Online

UMI PHEEXIROOSI 4 - Sidama_Qullaawa _Maxaafa bible

UMI PHEEXIROOSI 4

¹Kiristoosi manninatisinni qarra adhino daafira, ki'neno tenne hedo olu uduunnichi gede assitine qodhe. Manninatisinni qarra adhinohu cubbo loosa agurinona.

²Kunni ka'a gatte noo yanna giddo, maalunnita busha yorto ikkikkinni Maganu hedannore assanni hee'ranno.

³Daga assitanno gede akkimala ikkitonni, busha hamaandenni, dimbatenni, sirbatenni, dimbatenninna battennita kaphu maganna magansi'ratenni heedhinoonni diri ikkino.

⁴Xa kayinni insa gede aalimalete heeshsho hee'ra agurtinoonniti dhagge ikkiteennansa he'mitanno'ne.

⁵Ikkollana, nooriranna reyitinorira yoo yaara agare noohura dawaro qoltanno.

⁶Reyitinori nafa gattukkinni Dancha Duduwo kulloonnihu kunni daafiraati. Kunnira, baalunku manni gede manninatinsa aana yoo yinanni; ayyaanunni kayinni Maganu yiino garinni heedhanno.

⁷Xaate baalunku coyira goofimarchu iillino; jaattine huuccidhinanni gede geino wodani hee'ro'ne; jilbunni heedhe.

⁸Baxillu, batinye cubbo diwanno daafira, wo'munkuri aleenni mimmiti'ne ledo seekkitine baxamme.

⁹Gunguntinikkinni mimmito'ne wosinchimma adhe.

¹⁰Addi addiha Maganu elto afansha ammanamatenni amaddine mitti mitti'ne uyinoonni'ne elto garinni mimmiti'nera soqqamme.

¹¹Rosiisannohu, Maganu qaali garinni rosiiso. Soqqamannohuno Maganu aannosi wolqa garinni soqqamo. Kunni garinni, Maganu Yesuusi Kiristoosi widoonni baalunku coyinni galatamanno; ayirrinyunna roorre hegere hegerera isira ikkito. Hamii'ni!

¹²Jaalla'ya! Giirate gede fonqolanno qarri giddo heedhiniro, anfoonnikkihu haaru coyi iillino'nehu gede assitine dhaggeeffattinoonte.

¹³Hatteentenni, ayirrinyisi leellanno waro lowo geeshsha tashshi yaanno'ne gede, Kiristoosi qarra beeqqitinanni deerrinni hagiidhe.

¹⁴Kiristoosira yitineenna xonni'nero, ayirradu Maganu Ayyaani aana'ne fooliishshi'ranno daafira tashshi yoo'ne.

¹⁵Ki'ne giddonni ayino qarra adhanno woyite, manna shiinohu gede, mooraanchu gede, sao assinohu gede, woy manni coyira einohu gede ikke qarra adhoonke.

¹⁶Ammanaasincho ikkasinni qarru iillannosihu hee'riro kayinni, Kiristoosi su'mira yee Magano galato ikkinnina, saalfatoonke.

¹⁷Yoo yinanni yanna gamba yitino; yoo hananfannihu Maganu manni aanaati. Yoo ninke aana hananfanniha ikkiro, Maganunnihura Danchu Duduwira hajajamannokki manni gawalo hiitto ikkita ikka?

¹⁸Qullaawu Maxaafi, «Keeraanchu nafa quuxxote giddonni gatannoha ikkiro, Maganiweelunna cubbaataamu manni hiitto ikkaraati?» yaanno.

¹⁹Kunnira, Maganu hedo garinni qarra adhanno manni, dancha coye assitanni lubbonsa gudisse ammanamino Kalaqaanchira eeggo uyidho.