Read Sidama_Qullaawa _Maxaafa UMI PHEEXIROOSI 5 Bible Online

UMI PHEEXIROOSI 5 - Sidama_Qullaawa _Maxaafa bible

UMI PHEEXIROOSI 5

¹Xa ani insa ledo beetekiristaanete cimeessa ikkoommohu, Kiristoosi qarrire farci'reemmoha ikkoommohu, hattono albillitte leellara noo ayirrinyi beeqqaancho ikkeemmohu, giddo'ne noore beetekiristaanete cimeeyye amaaleemmonsa.

²Eeggo uyinoonni'neta Maganu hoshsha allaalle; allaaltinanni woyiteno Maganu hedo garinni baxxine allaalle; woxeho hagaagatenni ikkikkinni, soqqamate noo'ne halchonni ikkona.

³Hoshshate dancha lawishsha ikke ikkinnina, eeggo uyinoonni'nere gadadissine wolqatenni gashshitinoonte.

⁴Konne coye agadhitiniro, Qaru Allaalaanchi daanno yannara ba'annokkita ayirrinyu ba'latto adhitinanni.

⁵Ki'ne wedelluno, cimeeyyete hajajamme. Baalunku joongille uddanote gede uddidhine mimmitoho soqqamme. «Maganu boonaleeyye giwanno; jooguulleho kayinni elto aanno» yine borreessinoonni.

⁶Yannasinni gotti assanno'ne gede, wolqaataame Maganu anga woroonni umo'ne heeshshi asse.

⁷Ki'nere malannohu isootina, qarrisanno'nere baala isi aana tuqqe.

⁸Jilbunni heedhe; balala gede ikkitinoonte! Diini'ne Daawuloosi egemmannoha hasi'ranni ittananno doobbichi gede qooxeessi'nera doyanni no.

⁹Gobba baalate noori roduuwi'ne konne qarra adhitannota affine, ammanatenni iso kaajjitine gibbe.

¹⁰Shiima yanna geeshsha qarra adhitinihu gedensaanni, Kiristoosi Yesuusinni hegere ayirrinyiwa woshshino'nehu, elto baalate Magani, isinni amadino'ne qarriwiinni gatisanno'ne; irkisanno'ne; kaajjishanno'ne; teesiisanno'ne.

¹¹Hegerenni hegere geeshsha ayirrinyunna roorre isira ikkito. Hamii'ni!

¹²Ammanaminoho yee hedeemmo rodii Silaasi widoonni, tenne sokka haranchunni borreessoommo'ne. Borreessoommo'nehuno, amaalammo'neranna tini halaalaancho Maganu elto ikkitinota farci'rammo'nera yeeti. Kunnira, tenne Maganu eltonni kaajjitine uurre.

¹³Ki'ne gede doorantinoti Baabilooni heedhanno beetekiristaane keere dhaantino'ne. Beetti'ya Maarqoosino keere dhaamino'ne.

¹⁴Ammanaasinete baxillinni mimmito sunqitinanni keere haadhe. Kiristoosire ikkitinoonnirira baalaho keeru iillo'ne.