Read Sidama_Qullaawa _Maxaafa LAYINKI PHEEXIROOSI 1 Bible Online

LAYINKI PHEEXIROOSI 1 - Sidama_Qullaawa _Maxaafa bible

LAYINKI PHEEXIROOSI 1

¹Yesuusi Kiristoosi soqqamaanchonna soqqamaasincho ikkinohu Simiooni Pheexiroosiwiinni, Maganinkenna Gatisaanchinke Yesuusi Kiristoosi keeraanchimma widoonni afi'noommo ammana gedeeta ayirrado ammana afidhinoonnirira:

²Maganonna Mootichanke Yesuusa afatenni eltonna keeru bati'ro'ne.

³Ayirrinyisinninna danchummasinni woshshinonkeha afankenni maganimmate wolqasinni heeshshotenna Magano magansi'rate hasiisannore baala uyinonke.

⁴Busha yortora tenne gobba bunshewiinni xooqqine, hexxote qaali garinni maganimmate suude gutantinoonni; hakkaanni qole ayirradonna lowo geeshsha jawa hexxo uyinonke.

⁵Kunni daafira kunninni aane noo coyi lexxanno'ne gede jawaatte: ammanate aana danchumma, danchummate aana egenno,

⁶egennote aana umo qee'la, umo qee'late aana cinca, cincate aana Magano lawa,

⁷Magano lawate aana roduuwu baxama, roduuwu baxama aana baxille ledde.

⁸Kuni coyi bati're hee'ri'nero, Mootichanke Yesuusi Kiristoosi egennate mullootanna gumiweeloota ikkitinannikki gede assanno'ne.

⁹Kuni coyi noosikkihu illiweeloho; mule nooha calla la"anno; albi cubbiwiinni keeraawinota hawino.

¹⁰Kunnira, roduuwa'ya! Woshshama'nenna doorama'ne buuxi'rate albinni roore quqquxamme. Hatto ikkitiniro horontanni digufidhinanni.

¹¹Kunni garinni hegereha Mootichinkenna Gatisaanchinke Yesuusi Kiristoosi gashshoote eate kaayyo uyinanni'ne.

¹²Konne coye affinoonnihanna amaddinoonni halaalinni kaajjitine heedhinoonniha ikkirono, ki'nera lede qaagiissa diagureemmo.

¹³Tenne heeshshonni noommo geeshsha, wo'manka woyite ki'ne qaagiissa hasiissanno yee hedeemmo.

¹⁴Mootichinke Yesuusi Kiristoosi kulinoe garinni ikkiro, tenne gobbanni rahe baxxeemmota afoommo.

¹⁵Ani xa diinaggaawanni noommohu, ki'newiinni ree baxxummoro nafa konne coye duuchanka woyite qaagginara yeeti.

¹⁶Mootichinke Yesuusi Kiristoosi wolqanna layinkimeeshshi daasire kullummo'ne yannara, ayirrinyesi illenkenni la'neeti ikkinnina, mannu hayyonni kalanqoonni maatto hoode ha'ratenni di"ikkino.

¹⁷«Baxeemmohu beetti'ya konneeti; isi yaannota macciishshe» yitanno huuro jawu ayirrinyisiwiinni daggusi yannara, ayirrinyenna gaacheena adhino.

¹⁸Qullaawu Ilaali aana ledosi hee'neenna, gordunni daggino huuro ninkenni macciishshinoommo.

¹⁹Konneno roorsine xunsineemmo gede assinonkehu himanaanote qaali noonke; kuni qaali hashshu sooda geeshshanna bakkalchu beeddakko wodaninke giddo xabba geeshsha, mannu tunsichu giddo xawanno caabbichira qorophannonte gede, konni qaalirano qorophitiniro danchaho.

²⁰Duuchunkuri aleenni Qullaawa Borro giddo nooha aye himanano, mannu umisi hedo garinni tira dandaannokkita wodana assa hasiissanno.

²¹Mayira yiniro, aye himanino mannu fajjonni didayino; ikkollana himana Qullaawu Ayyaani massagino manni Maganuwiinni adhe coyi'rino.