Read Sidama_Qullaawa _Maxaafa UMI YOHAANNISI 2 Bible Online

UMI YOHAANNISI 2 - Sidama_Qullaawa _Maxaafa bible

UMI YOHAANNISI 2

¹Ooso'ya! Cubbo loossinannikki gede konne coye borreessoommo'ne. Ayino cubbo loosiro kayinni, Maganu Annunniwa ninkera sae coyi'ramannohu noonke; isino keeraanchu Yesuusa Kiristoosaati.

²Isi cubbonke agursiisanno; ninke cubbo calla ikkikkinni gobba baalate cubbi diigamannohuno isi widoonniiti.

³Maganu hajajo wonshinummoro, iso egenninoommore ikkinoommota tennenni anfeemmo.

⁴«Magano egennoommo» yaanni, hajajosi wonshannokkihu hee'riro, hakku kaphaanchoho; halaaluno giddosi dino.

⁵Maganu qaale agadhanno baalira, Maganu baxilli giddosi guutaho. Isinni hee'noommota tennenni anfeemmo.

⁶«Maganunni hee'reemmo» yaannohu, Kiristoosi hee'ri garinni hee'ra hasiissannosi.

⁷Roduuwa'ya! Tini borreesseemmo'ne hajajo, bi're hundanni noo'netenna keeshshitinote ikkinnina haaro di"ikkitino. Tini albi hajajono macciishshitinoonni qaaleeti.

⁸Ikkollana haaro hajajo borreesse kuleemmo'ne; isino, isiwanna ki'newa egennamino halaaleeti. Tunsichu sae ha'reenna halaalaanchu xawaabbi xa xawanni no.

⁹«Xawaabbaho noommo» yaanni hee'renni, rodoosi giwannohu xaano tunsichu giddo no.

¹⁰Rodoosi baxannohu xawaabbaho hee'ranno; gufisiisannori isi aana dino.

¹¹Rodoosi giwannohu kayinni tunsichu giddo no; tunsichu giddo hee'ranno. Tunsichu illesi beeshshinohura ha'rannowa diafanno.

¹²Ooso! Cubbo'ne isi su'minni agurroonni'ne daafira, borreesse kuleemmo'ne.

¹³Annuwa! Bi're hundinni kayise noore egentinoonni daafira borreesse kuleemmo'ne. Wedella! Busha qeeltinoonnihura borreesse kuleemmo'ne. Shiimmaadda ooso! Magano Anna egentinoonni daafira borreesse kuleemmo'ne.

¹⁴Annuwa! Bi're hundanni egentinoonni daafira, borreesse kuleemmo'ne. Wedella! Ki'ne jawaatoota ikkitinoonnihura, Maganu qaalino giddo'ne noohura bushano qeeltinoonni daafira borreesse kuleemmo'ne.

¹⁵Tenne alame woy alamete aana noore baxxinoonte; tenne alame baxannohura Maganu Annu baxilli giddosi dino.

¹⁶Tenne alame aana noori baalu: maalu yorto, illete halchishannorinna jirote naaxxa tenne alamereeti ikkinnina, Maganu Annuwiinni dagginota di"ikkitino.

¹⁷Alamenna alamete halcho sa'anno; Maganu hedinore assannohu kayinni hegere geeshsha hee'ranno.

¹⁸Shiimmaadda ooso! Tini goofimarchu yannaati; Kiristoosi qoxxisaanchi daannota macciishshitinoonni. Kune xa nafa iso qoxxissannori ka'e no; kunninni goofimarchu yanna ikkitinota anfeemmo.

¹⁹Insa ninke giddonni fultino; ikkollana albano ninkere di"ikkitino. Ninkere ikkitoommero, ninke ledo heedhanno. Kayinnilla, baalunku ninkere ikka hoogansa bande anfanni gede ninkewiinni baxxite fultino.

²⁰Ki'ne kayinni Qullaawu buurino'ne; kunnira ki'ne duuchankare egentinoonni.

²¹Ki'nera borreesse kuleemmo'nehu, halaale egentinoonnikki daafira di"ikkino; halaale egentinoonni; halaalu giddo kaphu nookkitano affinoonni.

²²Yesuusi Buuramino Moote ikkinota ammana giwannoha agurranna, kaphaanchu wolu nooni? Magano Annanna Beetto ammanannokkihu hakku, Kiristoosi qoxxisaanchooti.

²³Beetto ammanannokkihura Maganu Annuno dinosi. Beetto ammanannohu Magano Annano ammananno.

²⁴Ki'ne kayinni alba macciishshitinoonni qaalinni kaajjitine heedhe! Macciishshitinoonnihunni kaajjitine heedhiniro, Beettunna Maganu Annu ledo mittimma heedhanno'ne.

²⁵Tini isi uyinonke hexxono hegere heeshshooti.

²⁶So'risiissanno'neri daafira konne coye borreesse kuloommo'ne.

²⁷Isiwiinni adhitinoonnihu buuranno Ayyaani giddo'ne hee'ranno daafira, wole rosiisaancho dihasiisanno'ne; isi Ayyaani duuchankare rosiisanno'ne. Rosiisanno'neri halaaleho ikkinnina kapho di"ikkino; ki'neno rosiisino'ne garinni isinni heedhe.

²⁸Ooso! Xaate kunni ka'a isi daanno yannara komo yinummokkinni albisira addaxxine shinqeemmo gede, isinni heedhe.

²⁹Isi keeraancho ikkinota affiniro, keeraanchimmate looso loosannohu baalu Maganu ila ikkinota egenne.