Read Sidama_Qullaawa _Maxaafa UMI YOHAANNISI 4 Bible Online

UMI YOHAANNISI 4 - Sidama_Qullaawa _Maxaafa bible

UMI YOHAANNISI 4

¹Jaalla'ya! Ayyaana baala amma'nitinoonte. Maganu Ayyaanaatironna wolehoro buuxxe. Haammata kaphaasine himanaano ka'e no.

²Yesuusi Kiristoosi manna ikke dayinota ammanannohu baalu Maganu Ayyaanaati. Maganu Ayyaana baddine affinannihu kunninniiti.

³Yesuusi Kiristoosi manna ikke dayinota ammanannokki ayyaani baalu Maganunniha di"ikkino. Hakku Kiristoosa qoxxisanno ayyaanaati. Hakku ayyaani daannota macciishshitinoonni; xa nafa tenne gobbara no.

⁴Ooso! Ki'ne Maganunnireeti; insano qeeltinoonni. Ki'ne ledo noohu, tenne gobbaha rooreho.

⁵Insa tenne gobbareeti; kunnira, tenne gobbare coyidhanno; tini gobbano macciishshitannonsa.

⁶Ninke Maganunnireeti; Magano egenninohu, yineemmore macciishshannonke; Maganunniha ikkinokkihu kayinni dimacciishshannonke; halaalu Ayyaananna so'rote ayyaana bande anfeemmohu kunninniiti.

⁷Jaalla'ya! Ninke mimmitinke ledo baxammo; baxillu Maganunniho; baxamannohu baalu Maganu ilaati; Maganono egennino.

⁸Maganu baxilleho; baxillu nookkihu Magano diegennino.

⁹Ninkera Maganu baxilli xawinonkehu kunninniiti; isi widoonni heeshsho afi'neemmo gede, Maganu afi'rinoha mitto Beettosi tenne gobba soyino.

¹⁰Baxillu togooti; Magano ninke banxoommoha ikkikkinni, isi ninke baxe cubbonke agursiisate Beettosi soyinonke.

¹¹Jaalla'ya! Maganu asse baxinke garinni ninkeno mimmitonke baxa hasiissannonke.

¹²Magano illetenni afinohu ayino dino; mimmitonke banxummoro, Maganu giddonke hee'ranno; baxillisino ninke giddo guuta ikkanno.

¹³Maganu Ayyaanasi uyinonke daafira, ninke isi giddo hee'neemmotanna isino ninke giddo hee'rannota kunninni anfeemmo.

¹⁴Ninkeno la'noommo; Maganu Annu Beettosi tenne gobba Gatisaancho asse soyinota farci'neemmo.

¹⁵Yesuusi Maganu Beetto ikkinota farci'rannohura baalaho Maganu giddosi hee'ranno; isino Maganu giddo hee'ranno.

¹⁶Ninkeno Maganu baxannonke baxille egenninoommo; ammannoommono. Maganu baxilleho; baxillu giddo hee'rannohu Maganu giddo hee'ranno; Maganuno isi giddo hee'ranno.

¹⁷Tenne gobbara Kiristoosi hee'ri garinni hee'neemmo daafira, baxillinke guuta ikkanno. Yoote barrano, komo yinummokkinni albisira shinqeemmo jawaante afi'neemmo.

¹⁸Guutu baxilli waajjille fushshe hunanno ikkinnina baxillu giddo waajjillu dino; waajjille, qorichu agare no; waajjanno manchi baxillino guuta di"ikkino.

¹⁹Maganu ninke balaxe baxinonke daafira ninkeno banxeemmosi.

²⁰«Magano baxeemmo» yaanni rodoosi giwannohu, kaphaanchoho; la"anni nooha rodoosi baxinokkihu illetenni afinokkiha Magano hiitto asse baxa dandaanno?

²¹Magano baxannohu rodoosi baxanno gede, tenne hajajo isiwiinni adhinoommo.