Read Sidama_Qullaawa _Maxaafa EJJEETTO 1 Bible Online

EJJEETTO 1 - Sidama_Qullaawa _Maxaafa bible

EJJEETTO 1

¹Israeele Iyyaasu reyihu gedensaanni, «Kana"aanoota qasate albaanni aye sayisi'no?» yite Kaaliiqa xa'mitu.

²Kaaliiqino, «Baatto angasira sayise eemmona, Yihudu balaxe fulona» yee dawari.

³Yihudu ga're Simiooni ga're, «Kana"aanoota qasate ninkera iillitino gobba mitteenni fullo; ninkeno ki'nera iillitanno gobba ledo'ne fulleemmona» yitunsa.

⁴Kunnira, Simiooni ga're Yihudu ga're ledo Kana"aanootanna Ferizoota qassara gaaddu. Kaaliiqi angansara sayise eenna, Bezeeqi yinanniwa 10,000 manna shitu.

⁵Hakkiicho Adonibezeeqi ledono xaadde olantu.

⁶Adonibezeeqino hakkiichinni xooqi; insa kayinni shorrite amadde, anguwasitanna lekkuwasita lowiidi qubbe murmurtu.

⁷Hakkunni gedensaanni Adonibezeeqi, «Anguwansanna lekkuwansa qubbe murmurroonniri 70 mootoolla ani itanna giggilino giggilo xinqidhino. Xa kayinni, Maganu insa assoommo beebba anera qolinoe» yii. Insano haadhe Yerusaalame abbiteenna hakkiicho reyi.

⁸Yihudu manni Yerusaalame qase amadi; mannano bisetenni doddole, katamano giiri.

⁹Hakkunni gedensaanni Yihudu manni gaaraame gobbara wodiidi halallitteranna galchimi gaarira lekkaalloonni noo Kana"aanoota qasara dirri.

¹⁰Albaanni Qiriyaati Arbai yinannihura Kebirooni Katamira heedhanno Kana"aanootira gaadde, Sesiini, Akimaaninna Talmayi gosa qeeltu.

¹¹Hakkunni gedensaannino, albaanni Qiriyaati-Sefeeri yinannihura Debiiri Katamira hee'ranno mannira gaaddu.

¹²Kaaleebino, «Qiriyaati-Sefeeri qase amadannohura beetto'ya Akisa eemmosi» yiino.

¹³Hatte yannara, Kaaleebihu maa'nu rodii Qeneezi ilinohu Gotooniyaali katama qase amadi. Kaaleebino beettosi Akisa uyisi.

¹⁴Minisira daggu yannara, «Annikki loosi'nanni baatto aannohe gede seekkite xa'mi'ri» yiinose.[1] Kaaleebino harrichote aaninni dirritanni heedheennanni, «Ma"assammohera hasi'ratta?» yee xa'mise.

¹⁵Iseno, «Mittoricho ledattoera hasi'reemma; halallitte Negebi baatto uyittoente gede, wayi buichono aattoe gede huucci'reemmahe» yitusi. Kaaleebino aliiditanna woriidi bu'a uyise.

¹⁶Qenaawichu Muse balli ayiddi, Yihudu manni ledo saattu wo'mino katami Iyyaarkonnihunni kae, Yihudaho Araadira wodiidoonni halallitte gobbara noo manni ledo hee'rara ha'ri.

¹⁷Yihudu manni roduuwinsa Simiooni manni ledo Tsafaati heedhanno Kana"aanootira gaaddu; katamansano co'o assite huntu. Kunni daafira hakko katamira su'ma Herma[2] yine fushshini.

¹⁸Yihudu manni qole Gaaza, Asiqeloonanna Eqirooni yinanni katamma gashshitino gobba lede amadi.

¹⁹Kaaliiqi ledonsa noo daafira, Yihudu manni gaaraame gobba amadi. Ikkollana, xeichaame baattora hee'ranno manni siwiilu faradi gaare afi'rinoha ikkino daafira, hakkiichinni fushshite shorra didandiitino.

²⁰Muse hajajino garinni, Kebirooni Kaaleebira uyini. Isino, sasenta Enaaqi gosa giddonni fushshe shorri.

²¹Biiniyaami ga're kayinni, giddonsa heedhannore Iyaabuusoota hakkiinni fushsha didandiitino. Kunnira, Iyaabuusootu techo geeshsha Biiniyaamootu ledo mitteenni heedhanno.

²²Efireeminna Minaase ga're kayinni, hatte yannara, Looza yinanniwa Beeteli Katama gaaddu. Kaaliiqino ledonsa no; insano katama dooyyitannore fushshite sokku.

²⁴Dooyyaanono marte mittu manchi katamunni fulanna affe, «Katama e'nanni gara kulinke; ate assineemmoheri dinona» yitusi.

²⁵Isino e'nanni gara kulinsa. Lamenti Israeelete ga're dagge, manchonna minisi manna agurranna katamaho noo manna baala guddu.

²⁶Hakko manchino Hitootu gobba fule ha're katama kalaqi'ri. Hakko katamira su'ma Looza yee fushshi. Techo geeshshano kunni su'minni woshshinanni.

²⁷Minaase ga're kayinni Beetisaani, Tainaaki, Doori, Yubileaami, Megido katami mannanna qooxeessinsara noo qachuwara hee'ranno manna fushshite huntinokki daafira, Kana"aanootu hakkiicho heedhu.

²⁸Israeele jawaattu yannara, wolqate looso loosiisidhinota ikkinnina giddonsanni fushshite dihuntinonsa.

²⁹Hattonni Efireemi ga're Gezeeri heedhanno Kana"aanoota fushshite huntinokki daafira, Kana"aanootu sammi yite ledonsa heedhu.

³⁰Zaabilooni ga'reno Qidirooninna Nahalali heedhanno Kana"aanoota giddonsanni fushshite dihuntino. Ikkollana wolqate looso loossanni heedhanno gede assitinonsa.

³¹Aseeri ga'reno Akko, Sidoona, Ahilaabi, Akiziibi, Hiiliba, Afeeqinna Rehoobi heedhannore fushshite dihuntino.

³²Aseeri ga'reno gobbansara heedhanno Kana"aanooti ledo mitteenni heedhu.

³³Nifitaalemi ga'reno Beeti-Shemeshinna Beeti-Anaati heedhannore fushshite dihuntino. Nifitaalemi ga'reno gobbansara heedhanno Kana"aanooti ledo mitteenni heedhu. Ikkollana, wolqate looso loossanni heedhanno gede assitinonsa.

³⁴Amooraawootu Daani ga're gaaraame gobba widira qolte xiibbe, taalo gobba dirritannokki gede hooltinonsa.

³⁵Amooraawootu Hereesi, Ayalooninna Sha"alibiimi Ilaali aana heedhu. Ikkollana, Efireeminna Minaase ga're jawaattu yannara, wolqate looso loossanno gede assitinonsa.

³⁶Amooraawootu danni Seelaira aliyyeenni Aqirabiimi massitanno doogo geeshsha iillanno.