Read Sidama_Qullaawa _Maxaafa EJJEETTO 11 Bible Online

EJJEETTO 11 - Sidama_Qullaawa _Maxaafa bible

EJJEETTO 11

¹Geleaadichu Yofitahe wolqaataamo bagadaanchooti. Isino Geleaadi yinanni manchi mitte gursumeettenni ilinoho.

²Geleaadira seemotenni ilinori wole labballi oosono noosi. Insa lophituhu gedensaanni Yofitahe, «Amankeha ikkoottokki daafira mininkenni iqqa adha didandaatto» yite xiibbusi.

³Kunnira Yofitahe, roduuwisiwiinni xooqe Xoobi yinanni gobbara hee'rino. Hakkiicho yawaawulootu gamba yite dukkissusi.

⁴Shiima yanna gedensaanni, Amoonootu Israeelete aana ola fantu.

⁵Hatte yannara, Geleaadi roorrooti Yofitahe abbate Xoobi gobba marte,

⁶«Amoonootu ledo olammeemmo gede dagge albisinke» yitusi.

⁷Yofitaheno, «Anni'ya mininni digibbine fushshitine huntinie? Qarru amadi'ne woyite affinieyya?» yiinsa.

⁸Geleaadi roorrootino, «Xa kune atewa hingoommo. Amoonoota qasate kai ledo ha'nona. Geleaadi hee'neemmori baalunku aana roorricha ikkattona» yitusi.

⁹Yofitaheno, «Gobba'ya higeemmo gede assitinieronna Amoonoota qaseenna Kaaliiqi anga'yara sayise uyiero addaho roorricha'ne ikkeemmo?» yiinsa.

¹⁰Geleaadi roorrootino, «Kaaliiqi naqaashshenkeeti; addaho yoottore assineemmo» yitusi.

¹¹Yofitaheno kae Geleaadi roorrooti ledo ha'ri. Mannuno roorrichanna gaadaanna assi'risi. Yofitaheno coyi'rinore wonshannota Mitsipha Kaaliiqi albaanni lede egensiisi.

¹²Hakkunni gedensaanni Yofitahe Amoonootu mootewa, «Ninkera mayi koma heedheennaheeti dagge gobbanke horrittohu?» yee manna soyi.

¹³Amoonootu mooteno Yofitahe sokkaanora, «Konne assoommohu Israeele Gibitsetenni fultu yannara Arinooni Wayira wodiidoonninna Yaabooqi Wayira aliyyeenni Yordaanoosi Wayira soojjaatoonni noota gobba'ya adhitinoehuraati. Xaano elletenni gobbanke qollenke» yiinsa.

¹⁴Yofitahe sokkaanosi galagalche Amoonootu mootewa,

¹⁵«Israeele Moaabitanna Amooni baatto diadhitino.

¹⁶Israeele Gibitsetenni fultu yannara, halallitte gobba widoonni higge Duumu Baarira qiniiteenni higge Qaadesi hadhino.

¹⁷Israeeleno Edoomi mootewa, ‹Gobbakki giddoonni hinge sa'noni?› yite manna soqqitino. Edoomi moote kayinni sa"a diuyinonsa. Moaabi mootewano hattonni sokka soqqitino; isino sa"a diuyinonsa. Kunnira Israeele marte Qaadesi ofoltino.

¹⁸Hakkiinni aanchite Edoominna Moaabira soojjaatoonni Arnooni Wayira soojjaati ragaanni noo lagichira marte baxxisidhino. Arnooni Moaabi danna ikkinohura Moaabi gobba giddora die'ino.

¹⁹Hakkunni gedensaanni, Hasebooni noohuwa Amooraawootu mootewa Sewooniwa manna soqqite, ‹Gobbanke ha'rate ate gobba giddoonni hinge sa'noni?› yite xa'midhino.

²⁰Sewooni kayinni Israeele waajjino daafira, gobbasi giddoonni higge sa'annota giwe, Yahaatsi yinanniwa olantosi gamba assi're Israeelete ledo olamino.

²¹Hakkunni gedensaanni Israeelete Magani Kaaliiqi Sewooninna mannasi baala Israeelete angara sayise uyi; insano qeelantu. Israeeleno hatte gobbara noota Amooraawootu baatto gudisse ragidhu.

²²Arnooni Wayinni Yaabooqi Wayi geeshsha, soojjaatoonni halallitte gobbanni kayisse galchimaanni Yordaanoosi Wayi geeshsha noo baatto gudisse ragidhu.

²³«Kune mannisi Israeelete daafira yee Amooraawoota shorrinohu Israeelete Magani Kaaliiqaati. Atera adhate mayi doogo noohe?

²⁴Maganikki Kamooshi uyinoheta adhite ofolli. Ninkeno Maganinke Kaaliiqi uyinonketa iqqanke assi'noommo.

²⁵Ati Moaabi moote Sefoori beetto Baalaaqi roorattoni? Isi nafa Israeelete ledo giwaminoni? Woy olaminoni?

²⁶Tini gobba ki'ne Amoonootunnita ikkitinoha ikkiro, Israeele Hasebooninna olluuwasera, Aroeerinna olluuwasera, Arnooninna mulesi noo katamma baalantera 300 diro heedhu geeshsha mayira adha hoogginoonniyya?

²⁷Ani atera hunoommori dino; ane qasate ka"akkinni sao assitanni noottohu ateeti. Halaale afinohu Kaaliiqi Israeeletenna Amoonootu mereero yaannore techo yaanno» yee sokka soyi.

²⁸Amooni moote kayinni Yofitahe soyino sokka mite nafa diyiino.

²⁹Hakkunni gedensaanni Kaaliiqi Ayyaani Yofitahe aanira dirri. Isino Geleaadinna Minaase giddoonni hige ha'ranni olanto kakkayisi. Geleaadinna Mitsipha widoonni hige mare Amooni iilli.

³⁰Yofitaheno, «Amoonoota anga'yara sayisse uyittoero,

³¹insa qeele higeemmo yannara mini'yanni fule haaraera shiqannoha atera shilqote kakkalo asse shiqisheemmohe» yee Kaaliiqira xa'ni.

³²Hakkunni gedensaanni Yofitahe Amoonoota qasara fuli. Kaaliiqino insa angasira sayise uyi.

³³Aroeerinni kayise Miniiti qamatte geeshsha, hakkiino sae Abeeli-Kiraamiimi geeshsha noore 20 katamma co'o asse gudi. Amoonootuno Israeelete angara higgu.

³⁴Yofitahe minisira Mitsipha higi. Higanno woyite beettosi dibbe gantanni geebbanni haadhasira shiqqu. Iseno afi'rino mitteeti; ise agurranna wole ooso mitteno dinosi.

³⁵Ise afanni hee'renni mase imaanasi dare, «Baummo beetto'ya hunittae! Shettote aana tugittae; gatisa dandeemmokki xano Kaaliiqira xa'noommona» yii.

³⁶Iseno, «Anna'ya, wonanni Kaaliiqira afoo fulootto. Diinakki Amoonoota Kaaliiqi rabbisinona ane aana hedoottore wonshi.

³⁷Kayinnilla mitto coye calla huucci'reemmahe. Kunni ka'a mine assi'reemmakki daafira, darawo'ya ledo ilaalla gidde 2 agana seemimma'yara wi'leemma gede fajjie» yitu.

³⁸Isino, «Maahoyyena ha'ri!» yee 2 agana fajjise. Iseno hakkuyi gedensaanni mine assidhannokki daafira darawose ikkino seenni ledo hadhe ilaallate aana wi'litu.

³⁹Lamu agani gedensaanni galagalte annisewa higgu. Isino yiino gede assi; iseno mine assidhukkinni gattu. Hakka warinni kayise,

⁴⁰Israeelete seenni Geleaadichu Yofitahe beetto qaaganni diru dirunkunni mininni fule 4 barra qurta Israeelete gobbara roso ikkitu.