Read Sidama_Qullaawa _Maxaafa EJJEETTO 13 Bible Online

EJJEETTO 13 - Sidama_Qullaawa _Maxaafa bible

EJJEETTO 13

¹Israeele xaano Kaaliiqi albaanni bunshe loossu. Kunnira, Kaaliiqi Filisxeemete angara sayise eenna 40 diro gashshitunsa.

²Daani ilama ikkinohu Tsoria yinanni olliira hee'rannohu mittu Maanuhe yinanni manchi no; galtesino ilte diegentinote.

³Kaaliiqi sokkaasinchi manchote leelle, «Ati ooso ilte diegennootta. Xa kayinni, godobbe labbaa beetto ilatta.

⁴Xaate kunni ka'a, woyinete xajjeno ikkito wole dimbissanno agatto aganna hoolloonniricho ita qorophi.

⁵Godobbe labbaa beettono ilatta; ilamanno qaaqqino godowaho hee'renni Maganoho baxxinoha Naaziricha[5] ikkanno. Israeeleno Filisxeemete anganni gatisa hanafanno» yiise.

⁶Hakkunni gedensaanni mancho ayiddaannisewa marte, «Anewa Maganu manchi dayino. Isino Maganu sokkaasinchi gede lowo geeshsha waajjishannoho. Hiikkiinni dayinoro dixa'moomma; isino su'masi dikulinoe.

⁷Kayinnilla, ‹Godobbe labbaa beetto ilatta; kunnira, xaate kunni ka'a woyinete xajjeno ikkito wole dimbissanno agatto aggooti. Hoolloonnirichono ittooti. Qaaqquno godowu giddo hee'renni reya geeshsha Maganoho Naaziricha ikkanno› yiinoe» yite kultusi.

⁸Maanuheno, «Kaaliiqa'ya ballo, soottohu Maganu manchi ilamanno qaaqqo lossineemmo gara kulannonke gede galagale dayona soyinke» yee Kaaliiqa huucci'ri.

⁹Maganuno Maanuhe huuccatto macciishshi. Maganu sokkaasinchino galagale hige, manchote gate ofolte nootera leellise. Hakkawoyite ayiddaannise Maanuhe kayinni ledose dino.

¹⁰Manchono doddanni ayiddaannisewa marte, «Kuneeti tenne leellie manchi techono dayiwe» yite kultusi.

¹¹Maanuheno galtesi hoode ha'ri. Iillanni hee'renni, «Galte'ya ledo hasaawittohu ateetini?» yee xa'mi. Isino, «Ee aneeti» yee dawarisi.

¹²Maanuheno, «Yiittori ikkanno waro qaaqqoho wonsha hasiissanno seeri maati? Assa hasiissannonkerino maati?» yee xa'mi.

¹³Sokkaasinchuno, «Galtekki kulummosere baala assito.

¹⁴Woyinete haqqicho giddonni fulannore baala kisidhoonke; woyinete xajjenna dimbisannore baala aggoonke. Hoolloonnire baala ittoonke; hajajoommosere baala agadhito» yiisi.

¹⁵Hakkunni gedensaanni Maanuhe Kaaliiqi sokkaasincho, «Aja meichu goco gorrine iillinshammohe geeshsha agarinke ballo» yiisi.

¹⁶Sokkaasinchuno, «Keeshsheemmoha ikkiro nafa sagale di"iteemmo; sagale qixxeessattoha ikkiro kayinni Kaaliiqira shilqote kakkalo assite shiqishi» yii. Maanuhe hasaawisanni noosihu Kaaliiqi sokkaasincho ikkinota diafino.

¹⁷Maanuhe Kaaliiqi sokkaasincho, «Yiittori wo'manno waro galanteemmohe gede su'makki kulinke» yii.

¹⁸Isino, «Su'mi'ya afate didandiinannihona xa'mitootie?» yiisi.

¹⁹Maanuheno goco gidu fushshaati ledo masse kinchu aana Kaaliiqira kakkali. Maanuhenna galtesi la'anna Kaaliiqi maala'linannire assi.

²⁰La'anni heedheenna, giirate buwani kakkalote darginni kae gordo hige ha'ranna, Kaaliiqi sokkaasinchino buwanu giddo hee're ha'ri. Maanuhenna galtesi konne coye la'u woyite alba higge kumbuultu.

²¹Hatte yannara, Maanuhe Kaaliiqi sokkaasincho ikkinota buuxi'ri. Hakkunni gedensaanni Kaaliiqi sokkaasinchi Maanuheranna galtesira dileellino.

²²Maanuheno galtesira, «Magano illetenni la'noommona reyankeeti» yiise.

²³Galtesi kayinni, «Kaaliiqi shaankera hasi'roommero shilqote kakkalonna gidu fushshaate angankenni diadhanno. Konne coye baalankano dileellishannonke; qaaqqo afi'neemmotano dikulannonke» yitusi.

²⁴Manchono labbaa beetto iltu. Su'mano Samisoni yite fushshitusi. Qaaqquno lophi; Kaaliiqino maassi'risi.

²⁵Tsorianna Eshitaooli mereero Daani qachira hee'reenna Kaaliiqi Ayyaani wolqa wonshisi.