Read Sidama_Qullaawa _Maxaafa EJJEETTO 2 Bible Online

EJJEETTO 2 - Sidama_Qullaawa _Maxaafa bible

EJJEETTO 2

¹Kaaliiqi sokkaasinchi Gelgelunni fule Bokiimi mare Israeelete, «Gibitsete gobbanni fushshoommo'ne. Akaakka'nera aammora coyi'roommo gobba haa're abboommo'nena, ‹Ki'ne ledo eoommo gondooro disoorreemmo.

²Ki'ne tenne gobba manni ledo gondooro e'inoonte; kakkalonsa dargano diigge› yoommo'ne. Ki'ne kayinni yoommore agurtine, wolere assitinoonni.

³Kunnira, insa albi'nenni dishorreemmo. Insano diina ikkitanno'ne; magannansano woshshaado ikkitanno'ne» yiinsa.

⁴Kaaliiqi sokkaasinchi konne coye Israeelete kuli yannara, mannu qoonqo naggi asse wi'li.

⁵Hakko dargira su'ma Bokiimi[3] yite fushshitu. Hakkiicho Kaaliiqira kakkalo shiqishshu.

⁶Iyyaasu manna ha'ranno gede assihu gedensaanni, mitte mittenti Israeelete ga're galagalte iqqi iqqinsawa hadhu.

⁷Iyyaasu lubbotenni noo yannaranna, isi gedensaanni Kaaliiqi Israeelete loosinoha jawa coye baala affino jajjabbi noo yanna baalantera mannu Kaaliiqa magansi'ranni hee'ri.

⁸Kaaliiqi soqqamaanchi Newe beetti Iyyaasu 110 dirisinni reyi.

⁹Israeeleno gaaraame Efireemi gobbara Ga"aashi Ilaalira aliyyeenni umisi iqqira Teminati-Serahi madaartusi.

¹⁰Hatti baalanti ilama reyituhu gedensaanni, Kaaliiqa egentinokkitinna isi Israeelete mannira assino dhagge affinokki ilama kalaqantu.

¹¹Hakkunni gedensaanni, Israeele Kaaliiqi albaanni busha coye assitu. Ba"aali magannano magansidhu.

¹²Gibitsete gobbanni fushshinonsaha akaakkansa Magano Kaaliiqa agurtu. Qooxeessinsara heedhanno gosa maganna hoode hadhe magansidhanni Kaaliiqa hanqissu.

¹³Iso agurte Ba"aalinna Astaarooti magansidhinohura,

¹⁴Kaaliiqi Israeelete lowo geeshsha hanqe saantannorira sayise uyinsa. Wolqansara aleenni ikkitinorira gaangaawinsa diinnara sayise hirinsa.

¹⁵Israeele olaho fultanno yanna baalantera, balaxe coy'rino garinni badhe wodhinsa. Kunninni kainohunni lowo geeshsha yaaddu.

¹⁶Hakkunni gedensaanni kayinni, Kaaliiqi horritannoriwiinni gatissannonsa albisoota kayisi.

¹⁷Israeele kayinni, albisootinsara dihajajantino. Kaaliiqira ammanama gibbe wole maganna magansidhino. Annuwansa Kaaliiqira hajajantu gara agurte, hakkawoyintenni doogote aaninni wirri yitino.

¹⁸Kaaliiqi albisannoha kayisannonsa kiironni, hakku albisi Kaaliiqi ledosi noo daafira, Israeele diininsa anganni gatisino. Mannu qarru batinyinni kainohunni raaranno woyite, Kaaliiqi mararinonsa.

¹⁹Albisu reyihu gedensaanni kayinni, mannu wole maganna magansi'ratenninna insara soqqamatenni annuwansanni roore bushino. Bunshe loosanna qoxxisama diagurino.

²⁰Kunnira Kaaliiqi Israeelete lowo geeshsha hanqe, «Kuni manni Akaakkansa ledo eoommo gondooro diigino daafiranna, ani yoommotano macciishsha giwino daafira,

²¹Iyyaasu reyi waro gatisinore mitte gosano albinsanni dihooleemmo.

²²Hoola giwoommohu, annuwansa gede hajajantannoeronna hooggannoro afate, tenne gosanni fonqolammonsara yeeti» yii.

²³Yiino garinni Kaaliiqi hattenne gosa hakkiicho heedhanno gede assi. Iyyaasu insa rahe shorre hunanno gede assinokkihuno kunniraati.