Read Sidama_Qullaawa _Maxaafa EJJEETTO 20 Bible Online

EJJEETTO 20 - Sidama_Qullaawa _Maxaafa bible

EJJEETTO 20

¹Hakkunni gedensaanni aliyyeenni Daaninni, wodiidoonni Bersaabehinna soojjaatoonni Geleaadi geeshsha noo Israeele baala mitto ikkite Mitsiphara Kaaliiqi albira gamba yitu.

²Israeelete ga're baalante giddonni 400,000 ikkitannori bagado amaddino lafo Maganu manni songo giddo uurritu.

³Biiniyaami ga'reno Israeele Mitsipha xaaddinota macciishshitu. Israeeleno, «Kuni bushu coyi isi hiitto ikke ikkinoho?» yite mimmitonsa xa'mitu.

⁴Shinoonni mancho ayiddaanni Leewaawichu daware, «Aninna galte'ya gallammora Biiniyaami gobba Gibia marroommo.

⁵Gibia manni hashsha daye galoommo mine doyissino; aneno shitaera hasidhino. Ikkollana galte'ya aanira wolqatenni marro marro higge sa'eenna gawajjante reyitino.

⁶Hakkunni gedensaanni, reeshshase murmure Israeelete gobba baala soommo. Hatto assoommohu, kuni garimalu, hashakki'nannihunna saalsiisanno coyi Israeelete giddo ikkino daafiraati.

⁷Xa ki'ne Israeele kunni coyira yitinannire yiiyye» yii.

⁸Mannu baalunku mitto ikke, «Ninke giddonni mittuno qaesi higoonke; minisira ha'roonke.

⁹Mitto coye assineemmo; hixa tunge Gibiara gaadannoha fushshineemmo.

¹⁰Israeelete ga're baalante giddonni olantote sinqe dukkannore 100 giddonni 10 manna haa'neemmo. Olanto Biiniyaami gobba Gibia iillitanno woyite, Israeelete mereero assitinohura saalsiisanno coyira hasiisanno qoricha uyitannonsa» yii.

¹¹Kunnira, Israeelete manni baalunku mitto ikke Gibia gaadi.

¹²Israeelete ga're baalanti Biiniyaami ga'rera, «Tini assitini akkimale maati?

¹³Xa kayinni insa shine konne busha coye Israeelete giddonni hunneemmo gede, hakkonne Gibiaha garimale manna fushshitine uuyyenke» yitu. Biiniyaami ga're kayinni roduuwinsa Israeele yitinota dimacciishshitino.

¹⁴Kunnira, Biiniyaamootu Israeele qassara katammansanni fulte gamba yite Gibia daggu.

¹⁵Hakko barranni, katamma katammatenni dagginore 26,000 olanto qodhisiissu. Hakkuri gobbaanni, Gibia manni giddonni doorroonnire 700 guradda bagadaano qixxeessitu. Mittu mittunku corqaayyete kincho worte olte sodhannokkireeti.

¹⁶

¹⁷Israeele kayinni Biiniyaami ga're karsinikkinni bagado qodhitinore 400,000 olamaano qixxeessitu.

¹⁸Israeele magansi'nanniwa Beeteli dagge Magano, «Biiniyaamoota qasate albaanni aye sayisi'no?» yite xa'mitu. Kaaliiqino, «Yihudu balaxe fulona» yee dawarinsa.

¹⁹Israeele soodo gutte ka'e Gibia mule kunseentu.

²⁰Hakkunni gedensaanni Biiniyaami ga're qassara hadhu. Israeelete manni Gibia katamaho alba hige dirame uurri.

²¹Biiniyaamootuno Gibianni fulte, hakko barranni Israeelete giddonni 22,000 manna shitu.

²²Ikkeennano Israeelootu mimmitonsa jawaachishshe albinsa basera galagalte dirante uurritu.

²³Israeele Kaaliiqi albira shiqqe hashshi geeshsha wi'litanni, «Roduuwanke Biiniyaamoota qasate layinkimeeshsho fulloni?» yite Kaaliiqa xa'mitu. Kaaliiqino, «Ee fultine qasse» yiinsa.

²⁴Layinki barrano Israeele Biiniyaami ga're ledo olantara fultu.

²⁵Xaano Israeele qasate Gibianni fultinori, Israeelete giddonni 18,000 bagadaano shitu.

²⁶Israeelete manni baalunku Beeteli mare, Kaaliiqi albaanni ita aga agure wi'lanni hawarra geeshsha keeshshi. Hakkunni gedensaanni, mittimmannitanna shilqote kakkalo Kaaliiqira shiqishi.

²⁷Hakkiinni aanchite Kaaliiqi hedinori maatiro xa'mitu. Hatte yannara Maganu Taabooti hakko Beeteli no.

²⁸Aarooni beetti Aliaazaari ilinohu Finihaasi Gondooru Taabooti mule soqqamanni no. Insano, «Roduuwanke Biiniyaamoota qasate gaandonso agurro?» yite Finihaasi widoonni qolte Kaaliiqa xa'mitu. Kaaliiqino, «Ga'a insa anga'nera sayise eemmona, hadhine olamme!» yiinsa.

²⁹Hakkunni gedensaanni, Israeele Gibia gaangaawira gaa'lite agartannore wortu.

³⁰Sayikki barra Biiniyaamoota qassara fultu. Kunni albaanni assitunte gede Gibia qassara base basensa amaddu.

³¹Biiniyaamootuno qassara fultu. Katamunnino faffe hadhu; albinte gede Israeele shaa hanaffu. Kunni garinni Beetelinna Gibia massitanno doogo aananna xawoho 30 manni geeshsha shitu.

³²Biiniyaamootu, «Albinte gede gundoommonsa» yitu. Israeelootuno, «Badhillitte goshoonshe katamunni faffanno gede assino» yite ma'litu.

³³Israeelete manni gudisame noowiinni badhillitte goshooshinota buuxxe, Bealtamaari yinanniwa dagge darga dargansa amaddu. Gaa'lite nooti Israeelete olantono noowiinni Gibiara galchimi raginni fultu.

³⁴Hakkunni gedensaanni, Israeelete giddonni xinqisiisante fultinori 10,000 olanto Gibia qassu. Oluno wolqisi. Biiniyaamootu kayinni goofo iillitanni noonsata diaffino.

³⁵Kaaliiqi Israeele Biiniyaamoota qeeltanno gede assi. Hakko barra Israeele bagado qodhitinore 25,100 Biiniyaamoota shitu.

³⁶Hatte yannara Biiniyaamootu qeelamansa affu. Israeele Gibia wodhitino olanto addaxxitinohura, qeelantinoha labbe Biiniyaamootaho darga agurtino.

³⁷Gaa'lite agarte noorino rakke dagge Gibia e'ino. Base baalate farsha yite katamu giddo noore baala guddino.

³⁸Israeelenniti xaaddote olanto gaa'lite noori xaaddanno gede malaate kultino. Wodhitino garinni, katamu giddo wiliile tunnuuqqanna affanno woyite,

³⁹xawoho noo Israeele galagalte Biiniyaamoota qassino. Biiniyaamootu kayinni 30 Israeeloota shitino daafira, «Israeele albinte gede qeellanni hee'noommo!» yitanni qeexaa'litu.

⁴⁰Biiniyaamootu baalunku caaqqi yite la'anno woyite, katamu giddo wiliile tunnuuqqanni noota affu.

⁴¹Hakkunni gedensaanni, Israeelootu marro higge gawajjitinonsa; hatte yannara Biiniyaamootu goofo iillitinonsata affe massu.

⁴²Kunnira, falaqqi yite Israeelete albinni xooqqanni halallitte gobba higge hadhu. Ikkeennano bagaduwiinni digattino; hakko mereero, katammate giddonni fultino Israeele hakko manna shite guddino.

⁴³Biiniyaamoota gaangeessite, Gibiara soojjaatoonni noo dargi geeshsha shorritanni lowo manna guddu.

⁴⁴Biiniyaami ga'renni egennantinori 18,000 bagadaano reyitu.

⁴⁵Gattinori kayinni halallitte gobba Remooni yinanni kinchiwa higge xooqqanni heedheenna, Israeele doogote aana 5,000 manna shitu. Gidiaami geeshsha faana gante 2,000 manna ledde shitu.

⁴⁶Hakko barra calla reyitino Biiniyaamooti mitteenni 25,000 mannaati. Kuri baalunku egennantino bagadaanooti.

⁴⁷Leyu xibbi manni kayinni halallitte gobba Remooni kinchiwa hige xooqi. Hakkiicho 4 agana hee'ri.

⁴⁸Israeele Biiniyaami gobba galagalte higge, katamu giddo nooha meya labbaaha oosonna saada baala shitu. Hakko noo katamma baala giirte guddu.