Read Sidama_Qullaawa _Maxaafa EJJEETTO 3 Bible Online

EJJEETTO 3 - Sidama_Qullaawa _Maxaafa bible

EJJEETTO 3

¹Kaaliiqi Israeeloota jife la"aranna olunni xaadde egentinokkiri ola rossara yee, tenne gosa giddonsa heedhanno gede aguri.

³Hatti gosano: Filisxeeme 5 gashshaanonsa ledo, Kana"aanootu gudisante, Sidoonootahonna Libaanoosi Ilaalira Ba"aalihermooninna Hamaati Lawo mereero heedhanno Hiwootaati.

⁴Hakkuri, Kaaliiqi Muse widoonni qole akaakkansara uyino hajajo ayirrissannoronna hooggannoro afate yine agurroonnireeti.

⁵Kunnira, Israeele Kana"aanootu, Hitootu, Amooraawootu, Ferizootu, Hiwootunna Iyaabuusootu ledo heedhu.

⁶Israeelootuno insa seenne adhitu; uminsa seenneno insa oosora uyitu. Magannansano magansidhu.

⁷Israeelootu Kaaliiqi albaanni bunshe assitu. Kaaliiqa Maganonsano habbe, Ba"aalitanna Astaarooti maganna magansidhu.

⁸Kaaliiqi Israeelete lowo geeshsha hanqino daafira, Mesiphexoomiyu mootera Kusiristemira sayise uyinsa. Isino Israeele 8 diro borojjimma gashshi.

⁹Israeele Kaaliiqiwa raartu yannara kayinni, hakkiichinni fushshannonsa gede, Kaaleebihu maa'nu rodii Qeneezi ilinoha Gotooniyaali kayisinsa.

¹⁰Gotooniyaalirano Kaaliiqi Ayyaani dirrisi. Isino Israeelete albisa ikke olaho fuli. Kaaliiqi Mesiphexoomiyu moote Kusiristemi sayise uyinosi daafira qeeli.

¹¹Qeneezi beetti Gotooniyaali reyi barri geeshsha baatto 40 diro keere heedhu.

¹²Israeele xaano Kaaliiqi albaanni bunshe loossu; konne assansanni Kaaliiqi Moaabi moote Egilooni Israeelete wolqisanno gede assi.

¹³Amoonootunna Amaaleqootu isira ha'lite Israeele qasse saattu wo'mino katama Iyyaarko amaddu.

¹⁴Moaabi moote Egilooni Israeele 18 diro kade gashshino.

¹⁵Israeele xaano Kaaliiqiwa higge raartu. Kaaliiqino Biiniyaamicha guracho Geraani beetto Naoodi gaarame fushshannonsa gede kayisi. Israeele Naoodira giwire anga worte Moaabi mootewa Egilooniwa sokku.

¹⁶Isino mitte cigile ikkitannota 2 qari bise tunsiisi're uddanosi giddoonni qiniitichu tafira qodhi.

¹⁷Giwireno du'mu Moaabi mootera Egiloonira haa're ha'ri.

¹⁸Naoodino giwire uyihu gedensaanni, giwire duhe marino manna ha'ranno gede assi.

¹⁹Isi kayinni Galgala kinna boncanniwa iillihu gedensaanni galagale hige mootenniwa mare, «Moote, maaxe kuleemmoheri hee'reenna galagale higoommo» yiisi. Mooteno, «Hanni gobbaanni agarre!» yeenna mulesi noo soqqamaano baala agurte fultu.

²⁰Hatte yannara moote minu iima minnoonnihura qiidadu daasi giddo ofolle no. Naoodino shiqqi yee, «Maganuwiinni atera abboommohe sokka nooe» yiisi. Mooteno ofollinowiinni gotti yee kai.

²¹Naoodino guracho anganni qiniitichu tafi widoonni qodhe noo bise fushshe mootete godowa qase xoroorrisi.

²²Amandanniwi nafa gatikkinni bise gudisante godowisira e'u; xoroorrisse badheenni fultu. Mooruno bise beeshshe amadi.

²³Hakkunni gedensaanni Naoodi daasu furcho hige fule, mine gobbaanni cufe qulfe gane ha'ri.

²⁴Naoodi ha'rihu gedensaanni, mootete soqqamaasine dagge minu gobbaanni cufame nooha affu. Insano, «Giddoonni shumate ofollella hee'rannona» yite heddu.

²⁵Agarte agarte hoogge, moote cufana fana hoogita insanni qulfe haadhe fantu. Fantanno woyite mootensa ree diriire nooha affu.

²⁶Mootete soqqamaano daasu waalchira uurrite heedheennanni Naoodi xeerti're ha'ri. Kinna boncanni widoonni hige Sertayimira sae ha'rino.

²⁷Hakkiira iillanni hee'renninni, mannu olaho fulanno gede ilaalaame Efireemi gobbara xurumba ufuufi. Israeeleno isi hoode gaaru aaninni dirritu.

²⁸Isino, «Diina'ne Moaabi Kaaliiqi anga'nera sayise uyino'ne daafira hoode'ya amme!» yee hajajinsa. Insano hoodesi dirritu. Hakkunni gedensaanni Yordaanoosinni Moaabi sayissanno lawo amadde mittu mannino sa"annokki gede hooltu.

²⁹Hakko barra, jawaatanna wolqaataamma ikkitinore 10,000 Moaaboota mittuno gattukkinni shite guddu.

³⁰Hakko barra Israeele Moaabi qeeltu; baattono 80 diri geeshsha keere afidhu.

³¹Naoodi gedensaanni kainohu Anaati beetti Semegaari, 600 Filisxeeme, handa hawuurranni gatiminni shiino. Isino hattonni Israeele diinu anganni gatisino.