Read Sidama_Qullaawa _Maxaafa EJJEETTO 5 Bible Online

EJJEETTO 5 - Sidama_Qullaawa _Maxaafa bible

EJJEETTO 5

¹Hakko barra Dibooranna Abiniemi beetti Baaraaqi aante noo geewo geebbino:

²Israeelete noo ejjeetto albissanna, mannuno baxe umisinni ka"anna, Kaaliiqi galatamo.

³Ki'ne mootoolla tenne macciishshe! gashshaanono qonteesse; Kaaliiqira faarseemma. Ledeno faarseemma; Israeelete Maganira Kaaliiqira geeweemma.

⁴Kaaliiqa, ati Seiiri Ilaalinni fulitto yannara, Edoomi gobbanni kaitto yannara, baatto huxidhu. Gorduwano xeena facci assite agurtu; gomichuwano waa lolaassu.

⁵Siina, Kaaliiqi albaanni ilaalla huxidhu; Israeelete Magani Kaaliiqi albaanni shafantu.

⁶Anaati beetti Semegaari yannaranna, Iyaeeli yannara doogga ontu; doogaasineno xaaddote doogo agurte wirri yite hadhu.

⁷Ani Diboora Israeelete ama ikke ka"amma geeshsha, Israeele mininni fula agurtu.

⁸Israeele wole maganna hoode hadhu yannara, olu katamu xullichi geeshsha dayi. 40,000 Israeele giddo, wonqonna amaxxo afi'rinohu mittuno dino.

⁹Ane wodani Israeelete ejjeetto ledonna, umisinni kakkaino manni ledo no; Kaaliiqira galatu iillo!

¹⁰Ki'ne waajjuulle harre guluffinanniri, gilaasete koorira ofoltinanniri, lekkatenni hadhinannirino coyidhe.

¹¹Wayi bu'a gaangaawira noota, faarsaanote huuro macciishshe. Tini faarsono, Kaaliiqi qeellenna, Israeelete qeelle kultannote. Hakkunni gedensaanni Kaaliiqi manni, katamu waalchuwawa dirre,

¹²«Diboora, kai! Kai! Kai! Kai! Geewono geewi! Abiniemi beetto Baaraaqi kai! Diinakkino qafadi» yitu.

¹³Ammanamino manni, ejjeettonniwa dirri; Kaaliiqi manni, wolqaataame bagadaano ledo anewa dayi.

¹⁴Amaaleqete sircho ikkitinori, Efireeminni ka'e daggu. Biiniyaami, ate hoode hadhuri ledo no; olu albisooti Makiirinni, gashshaano Zaabilooninni daggu.

¹⁵Yisaakoori ejjeetto Diboora ledo no; Yisaakoorinna Baaraaqino daggu; lagu giddoonni higge hoodesi hadhu. Roobeeli ga're kayinni hedo dixaadisidhino.

¹⁶Ge'reewu gooraanira mayira ofoltini? Allaalaasine ge'reewo woshshitanna macciishshateetini? Eewanni, Roobeeli ga're hedo dixaadisidhino.

¹⁷Gaadi ga're Yordaanoosira soojjaatoonni ofoltu; Daani ga're markaawete mule keeshshitu; Aseeri ga're Baaru qaccera gattu; marte baaru gama ofoltu.

¹⁸Zaabilooni manni lubbonsa mararikkinni olamino; Niftaalemi mannino hattonni assino.

¹⁹Mootoolla dagge olantu; Kana"aani mootoolla Megido Wayibba mule, Tainaaki yinanniwa olantu; birrano ikko wole qafado adhite dihadhino.

²⁰Gordoho noo beeddahe olantu; ha'rinshonsanni Sisaara ledo gaarantu.

²¹Bi'rehu Qishooni Wayi, Qishooni Wayi fee haa're ha'rinsa; lubbo'ya, jawaati! Alba higge qaafi!

²²Hakkunni gedensaanni, faradaasine guluffe daggu; faraduno kottetenni baatto lillii.

²³Kaaliiqi sokkaasinchi, «Kaaliiqira ha'lite wolqaataamo diina qasatenna, isi qote uurrate didagginona, Meroozi lowo geeshsha rumme!» yii.

²⁴Qenaawichu Hebeeri galte Iyaeeli, dukkanu giddo noo meenti baalunkunni roore, maassantinota ikkito.

²⁵Waa huucci'reenna ado uyitinosi; ayirraddaho malino uduunnichira worte, geinto shiqishshinosi.

²⁶Mitte anganni cificho amaddu; layinki anganni meencho haadhu. Sisaara gante, umosi cancantu; jaddotenni qasse, qontichosi xoroorrissu.

²⁷Isino lekkase hunda gumbisame uwi; hakko diriire, lekkase hunda waxxi yii; hakko gombisame uwinowa hee're reyi.

²⁸Sisaara ama masikootete widoonni higge la'u; guggu'laasinchu caakko giddoonni qolte, taxidhe woshshitu. «Beetti'ya faradi gaare mayira keeshshitu? Faradi gaaresi hirbino mayira bai?» yitu.

²⁹Ayirraddu meenti dawaro qolinose; ise kayinni yitinota yitanni,

³⁰«Kageeshsha ba'inohu qafado beeqqitanniiti; umu umunkunni mitte woy lame seenne adhitanniiti. Sisaara biifado imaani adhanna, anerano goowaho xaaxi'reemmaha, goondoonni imaana abbannieeti» yitu.

³¹Kaaliiqa, baarigaarrakki baala togo ikkite ba'o; ate baxxannori kayinni, soodo arrishsho gede xabbo. Hakkunni gedensaanni, baatto 40 diri geeshsha keere afidhu.